我諗畫巴士的時代已經係好耐好耐之前（我諗大約十一、二年前左右），當時只係用住部 Window95 之後畫畫畫，Print 左出黎自己收藏，
當年因為家人係觀塘返工的關係，經常都會搭 70X 來往北區同觀塘，所以當年70X 當然係繪畫的主角之一
第一代公開的小車頭，於 2005 年 11 月公開，係第一次貼上論壇的處女作黎，相當之「精美」，
當年紙巴士其實幾盛行，所以開初呢一堆小車頭同紙巴士的精細度差不多，當然大小就有很大分別
仲記得當年我仲係年少無知，好難得貼上唔同的討論區度大家第一次望，緊張左我好耐
，最後第一次貼已經有幾位的板友比左唔少的意見我改正大量的錯誤，個一刻我又係興奮左好耐，亦都開始的起心肝開始畫小車頭
第一代的小車頭，線條好簡單，用色亦都相當之簡單，因為所有的光暗位都無打到出黎，
同時間邊線都全部係用黑色，好處就係快同埋易上手，只要畫岩形狀已經可以，所以當時畫一個小車頭大約半個鐘已經執好
第二代的小車頭，於 2006 年 4 月公開，當時第一代出左的產物唔係好多，只不過係出左 AD 3AD ADS 三種，就出現了第二代，
因為當時出左的產物其實真係唔多，所以小車頭的熱潮還未算好熱鬧，只不過係閒時一兩篇文
第二代的小車頭線條開始圓滑化，另外亦都開始嘗試用到漸淡的效果去造無狗牙線條的效果（當然效果唔太好），
於當年黎計我諗都可以算係一大的進步吧，因為始終都只係用小畫家慢慢畫出黎，當年自己的技術都未算好有突出的進行，
但因為小車頭的大小好適合做頭檔的關係，好多的板友們都想有一個自己的小車頭放頭檔位，所以小車頭的訂製熱潮亦都慢慢興起
當時我製作的小車頭類型突然間增加得好快，當年不論金車白板熱狗的都曾經畫過，
例如有 BL 3BL S3BL S3N 3N DM 的熱狗，AD AV AL 白板系列，AP APM AMN ASU ATE AVBE 3ASV ASV ATR ATS 的金巴，AA AN AM 的單層等都有，
加上動畫 GIF 的技術開始普及，我就開始製作了「小車頭齊搞牌」的系列訂製品，畫面入面可以定時搞牌加上水潑都還可以
而小車頭訂製熱潮我諗我都係表表者之一，不過唔係正面的表表者，而係反面的表表者，
因為當年訂製的人真係好多，結果我的記憶中曾經限過每日最多只接受兩張訂單，同時間最後因為根本應付唔到訂單的數量而最後停製
，最過癮係當年有一份野叫「車頭齊搞牌計劃之補償方案」，係為了補償部份因為訂了而未收到貨的會員而設的一份方案
（當年撻訂的情況好常見，因為訂製的氣氛實在非常之濃厚，基本上無限制的話一日收廿幾位板友的訂製都已經係少數目）
而第二代小車頭的年代，亦係小車頭最豐盛的年代，不過樹大招風帶來了不少板權及濫製的問題，
例如當時因為無水印的關係，好多時會有板友直接拎其他人畫出黎的作品去做頭檔簽名檔，甚至改頭換面扮自己畫等等，頗為凌亂
風風雨雨經歷了一年，第三代小車頭於 2007 年 4 月出爐，
因為開始要忙於應付不同方面工作的關係，所以呢一階段的出品開始愈黎愈少，亦都已經再無任何的公開訂製活動，
用途通常都只係畫完貼出黎比大家望兩望，之後又無人回覆（當時無讚好功能）咁樣就收返埋，同埋整頭檔咁樣
左手角的 FT144 小車頭如果係當年的板友應該會有印象，因為我當年的頭檔就係佢黎，
比較特別係當年曾經遇上打風之時，頭檔就會跟蹤風球的編號之有所改變，愈大風愈黑咁樣，最高的紀錄只係去到九球風球部車吹到歪左
（十號風球的圖當年我有畫過黎備用，可惜最後都無機會用到
）右手邊的富豪康豪小車頭就可以明顯見出第三代小車頭同第二代小車頭的分別，
第三代小車頭的用色明顯有較強烈的對比，白者愈白黑者愈黑，加上加強真實光暗的對比，所以內籠普遍都用較為暗的顏色，
線條方面使用了更幼但更為圓滑的去狗牙線條，以及加強凹凸陰暗面的用色，亦都開始注重到不同深淺線條所形造的凹凸感同真車的凹凸作比較，
對小車頭走向真實化可以算係一個頗大的進步
由於學業愈黎愈繁重的關係，所以第五代的小車頭終於係 2010 年的 4 月公開，亦都係暫時最新一代的小車頭，
可能會有人問咁第四代的小車頭係咩樣，嗯其實第四代的規格同呢篇文入面提到的絕對有很大的分別，
因為第四代小車頭係全數使用 Photoimpact 繪畫，而本文入面的所有小車頭都係以小畫家繪畫（第三代起由 Photoimpact 輔助取色），
所以放係呢篇文入面講會有格格不入的感覺，如果有興趣的用私人訊息聯絡我，我會傳送唯一一張第四代的小車頭比各位望望
第五代小車頭的特色就係完全擺脫了以往三代小車頭的用色條件，特別係「以深為邊」的原則完完全全地打破了，
因為開始體會到光暗凹凸面的表達係除了使用深色線之外，亦都要用比平面還要淺的白色線亦表達，所以基本的白色部份唔再用白色，而使用了灰色，
加上再深化跟隨需要使用了不同粗幼的反狗牙邊緣，以及車頂接近無邊的「反光車頂」的繪畫，令到整個感覺有如影一張真相出黎，效果相當不錯，
雖然內籠的線條未有跟隨到外殼使用了反狗牙的線條，但對於整體的感覺影響不大，加上了膠牌之後亦唔錯
右手邊上部的係第二代小車頭時期的 AM 小車頭，而下方就係第五代小車頭時期的 AM 小車頭，可以明顯見得出分別，
加上第二代的 AM 小車頭錯處實在太多，於我個人覺得實在不能接受的情況之下亦都較其他車頭為先重新繪畫過，最後至少我個人能夠接受到
AM 車頭擋風玻璃兩邊的窄隙 加上 整個圓圓胖胖的車身 都令到重繪時的難度大增，所有畫出黎的效果就 ……
由於難度大增的關係，所以繪畫一個小車頭的時間已經由以往的半個鐘，增至大約六至七個鐘左右，基本上一晚都只係對住小畫家慢慢點
其實近年小車頭的發展可謂停頓，因為於未有明彩的帶動之下很難有東西去吸引各位的畫家各展所長，
而家明彩的重新興起，希望各位一方面重新發揮自己的繪圖才能同時，亦都能夠把握機會好好增值自己，將自己的小車頭作品推向另一個高峰
未來我個亦都會將部份的時間再新撥到繪畫小車頭上，希望屆時能夠繼續跟各位同步成長，亦都能夠將有用的技巧傳授給各位有興趣的會員
![[sosad]](https://www.hkbf.org/images/smilies/icon_sosad.gif "So Sad"){kind=icon}
仲Save埋 可惜之後洗左機 
