咁當中有兩個朋友係 N216 沿線乘客，咁我見 N216 可以轉 N293 播，咁就陪埋佢地一齊走（要知半夜得一個人返屋企係好慘...）
咁呢當時我搭既 N216 去到旺角，前面係有部 N293 既。據我所知 N216 必須要晌富豪東方酒店落車先可以轉 N293
（唔係點解係咁「下一站設有分段收費」？）
於是我去到九龍城落車，咁但係前面o個部 N293 已經絕塵而去，咁唯有等下一班啦。（亦唔會搭 N796，無謂浪費左個轉乘）
等左十分鐘係有一部 N796 經過，而 N293 表列班次係 9-10 分鐘既，即係九巴已經脫班（不過唔係奇聞，亦未係重點）。
部 N796 走左之後 6 分鐘，咁就有部 N293 黎到。當時車站並無任何指示話如何使用轉乘，
而部 N293 車頭亦唔似我當日搭過 N241 同 N216 咁，有張通告寫明「落車付款」，
咁我就上車拍卡啦（好合理o者，你冇寫我唔記得，又有幾奇？），而當時司機係並無阻止亦無提醒，最終八達通好似係扣左我 $4。
之後部車去到牛頭角上村個站，當時車站及對上五個（即係譽港灣、采頤、坪石、啟業同淘大）站並無乘客登車，但係就有人拍卡落車，
我就奇怪啦，乜部巴士係落車而唔係上車俾錢架咩？於是我就開始 panic 啦，就同個司機好老實咁講，最終個司機叫我去到物華街落車都容許我，呢度要多謝個司機先。
或者到呢度你就會問，點解唔搭到尚德先扮野呢？我就係免得到尚德落車要比多 $15.2 落車，到時損失大過我晌觀塘轉 N29（$8.5）／N796（$9.1）
當時我留意到一點，就係 N293 16 分鐘一部車，開 ADS，去到物華街開走埋，全車只有約 30 個乘客。
咁我就由物華街行返落觀塘市中心，當時 N796 大概都係 20 分鐘一班咁上下，點知出現以下圖中情境....
係呀，呢部 5049 黎架，頂閘返將軍澳呀～～
條 N293 兜足成個將軍澳咁多，班次又同 N796 差唔多情況下，可以得 30 個乘客，
人地新巴只係做調景嶺、市中心（我送埋你日出康城咧），頂閘.....
成個故仔想表達 D 乜呢
九巴星期五突然話「因為上半年蝕左千二萬，需要積極考慮加價」。但係，加價之後，服務水平日低，
唔好講日頭 D 咩 1A 呀咁啦，見過無數次深夜旺角返馬鞍山既通宵小巴人龍之長，可以排成百幾二百人，但 N281 站頭係冇乜人搭佢。
而家觀塘無人住咩？觀塘小巴黎十班十班都爆，我都唔見 N293 有車黎載我
而家山上居民唔多咩？秀茂坪小巴條遠遠人龍長過 N293
而家山下居民唔多咩？N796 既載客量遠遠高過 N293
司機有良心提醒乘客又點？指示唔清晰，年中呃過幾多搭呢 D 通宵巴士乘客，條數肯定襟計，
人地新巴上車比錢，落車拍多次卡，乘客搭車不知幾咁方便，
以前住港島區就有個經典例子，如果閣下係要晌深夜由小西灣去耀東，係要先搭 N8X，上車拍一次，筲箕灣落車再拍一次，
轉車時只需要晌 N8 拍一次卡，就可以得到最大優惠。
點解新巴城巴涉及兩間公司（幕後雖然係同一間）既 N8/N8X 都可以咁輕易方便乘客，
我搭九巴又要我記住上車唔好比，落車先比錢，又咩轉車票，喂大佬呀，我搭通宵巴士都係因為我半夜要返屋企者，
你仲要我記咁多野，神經病咩......
![[sosad]](https://hkbf.org/images/smilies/icon_sosad.gif "So Sad"){kind=icon}
