注意：本路線須要配合潮退時間才能通過，部份路段亦會泥足深陷，有興趣者請量力而為！

一星級的綑邊路線．五星級的印塘景致！

西流江．位處於新界東北最偏遠的一條小漁村，現在只剩下數間村屋以及幾位老村民居住
除了海路之外，陸上路線就只有踏上昔日破舊隱蔽的村路，又或者像是今次的綑邊路線！

講話呢條係一星線，其實分分鐘連果一星都冇，的確估唔到，地球上竟然會有一條咁易綑既邊
出發前又好似以前咁睇左唔少其他人既遊記，個個都講到咁冇難度，心諗綑邊喎，易極有限啦！
到今次自己行完，完完全全接受左網上既記載，嗯！真係好易行！
新界東北群村，連西流江都行埋之後，似乎所有村都已經到過了，聽到過鎖羅盤將要發展
所以今日既行程就係要一心一意，到完西流江之後再去鎖羅盤，結果又玩一日啦！

日日都咁好天，放假日，又黎天陰陰，不過少左個太陽，今次真係行得好舒服涼快
睇過潮汐，１１點左右會退潮，所以決定唔再一早出發，搭0940班次既小巴，又黎烏蛟騰
今年又係第幾次黎呢？落車係1015，可以慢慢行，過左九担租之後一段，就會有一上一下分叉路
新界東北次次行親都係行下路，上路完來一次都未行過，今次要行下先，一下子就到犁頭石廢村
過後就已經係三椏村了，因為目標係西流江，路上幾隊人都係行荔枝窩方向，只有我一人出碼頭
到左碼頭，一望個海岸，點解潮水仲未退既？望一望天文台既潮汐表，ＯＭＧ！
預測既同錄得既竟然相差半米咁多，眼見海岸仲起水入面，坐起碼頭等都唔係辦法
結果都係坐左半個鐘，都係行去小灘再睇下啦！



經過呢段冤枉路黎到小灘基堤，望到海岸邊終於都出左黎
唔諗了，原本順綑既而家就變左做逆綑，一走到海岸之上，迎接我既係一大堆色彩豐富既岩石
呢邊既海岸岩石，欠缺了統一性，但係又多采多姿，金色紅色黑色白色，真係乜石都有
從小灘走出一個轉角位，整個廣闊平坦既海岸出現了，嘩，呢條就係西流江既邊黎？
唔講真係以為自己行起沙灘上，不過有ｄ位就真係幾麻煩下，因為唔想一腳泥
結果要起紅樹林入面穿插，還好今次終於可以力保不失(濕)，經過涌灣咀，再到了哥岩
點解叫了哥岩呢？隻了哥又起邊呢？望住個岩壁，我諗唔通，想不透呢=.=
過左了哥岩，一大個深入既海灣出現，呢到就係牛屎湖灣了！一下子綑到牛屎湖村基堤同小碼頭
再一下子綑到西流江碼頭，唔好睇少呢個灣，比佢咁樣凹一凹死我，要花多半個鐘時間先去到西流江
到左碼頭，後面有村路上山，不過今次係綑邊，當然繼續落海邊啦，終於都望到啦
海上的一個印章小島．印洲，再行過幾步睇，反而又覺得好似有隻獅子背住我坐咁
又再過幾步，到達西流江既破爛碼頭，此時兩隻凶猛既狗仔衝出黎狂吠，我當堂嚇一跳
然後又得啖笑，雖然狂吠但絕不凶惡，走到埋黎仲可以摸下佢，好得意呢！
之後西流江小村入面既婆婆走出黎，駛唔駛買野飲呀！緊係好啦，回魂可樂．．．
雖然今日涼到２Ｌ水最終都飲唔晒，不過都係忍唔住可樂既誘惑，仲有就係第２到未見過既．曬魷魚
唔通起呢到既特產？連平時唔係點講野既我，同健談既婆婆一傾就15分鐘
感覺上成條村好似得返佢一個咁，好似好寂寞咁，傾完就好似催眠左我咁，結果咩野學校
咩野犀牛望海古穴，咩都唔記得了．．．1400，再次接上綑邊路，綑返三椏村
呢邊有一兩個位比較難，不過對比我以前綑過既都只係ＢＢ班，1450返到三椏村！















再次往荔枝窩方向行，天呀！去小灘果段路又要行多次啦！好彩唔程唔長，早上見到未鋪既路
而家就成條鋪好了，又黎到唔知黎左幾多次既荔枝窩，都熟晒，唔遊覽啦
所以向鎖羅盤方向行，見到路牌，又黎天呀！此時係1530，去鹿頸要４小時
豈不是又要行到天黑？目標定好了，唔理了，加快腳步就好了，
結果20分鐘就由荔枝窩碼頭黎到鎖羅盤基堤，一遊鎖羅盤村，同幾年前黎既分別真係太大啦
樹少左好多，陰森感覺盡失，只係廢村仍在，希望今次唔會係發展前最後一次到此一遊啦！
離開鎖羅盤，跨過一小山就到榕樹凹村，好彩仲記得山路係要入屋搵！
再過一段平坦山路，黎到谷埔->鳳坑->到鹿頸先係1720，連小巴時間都夾埋呢！





後記：
行埋今次，東北既海岸線就真真正正只係得返鹹魚埕一段未行過了！
新界東北既海岸真係好多彩多姿，放眼每處都係美景，而最有趣既係，
成條海岸線好似係為行山人士而設咁，大致可分為：鬼手到紅石門既高難度線
紅石門到三椏既中級者向，同埋今次三椏到小灘既入門級，難度各異，但景色同樣一絕！

＞＞＞＞更多圖片＜＜＜＜

ＴＨＸ　ＦＯＲ　ＲＥＡＤＩＮＧ ．