香港巴士論壇

Sources: 電視台+電台新聞/HK Yahoo News

著名電視足球評述員, 兼前香港甲組足球員林尚義, 朝早被發現喺住所內昏迷, 送院後不治, 終年74歲。

有"阿叔"之稱嘅林尚義1934年出生, 16歲嘅時候開始球員生涯, 先後效力過東方同傑志。1960年更代表中華民國參加羅馬奧運, 到72年轉投流浪。當時佢有"重炮"同"倉魚"等嘅稱號。喺當球員期間, 佢兼職擔任評述員, 亦做過教師。72年"阿叔"掛靴, 先後喺多間傳媒機構包括港台, 商台, 亞視同無線擔任評述。佢嘅獨特評述方式, 深入民心。"阿叔"亦都拍過廣告同客串多套電影。

98年世界盃期間發生一段小插曲, 當時喺法國做緊直播"阿叔", 未有為意電視鏡頭正進行緊拍攝, 誤以為隔離嘅韓毓霞同郭家明同香港主持通緊電話, 所以拎咗包煙出嚟準備食。後來經郭家明"提點"後, "阿叔"先收埋支煙。但由於香港錄影廠嘅主持同嘉賓目擊整個過程, 引起全場忍俊不禁。

05年初, "阿叔"40幾歲嘅太太劉惠芳因病逝世, 令佢大受打擊, 一度決定8月約滿後退休, 後來被無線挽留。到06年7月10日世界盃賽事完結後, "阿叔"宣佈正式退休, 結束30多年嘅電視評述生涯。佢當時話, 一生人總有退休嘅時候, 又冇後悔作出退休嘅決定。

今朝早, 報販如常派報紙到"阿叔"屋企, 發現佢兩日都冇拎走報紙, 於是通知看更。家人趕到嘅時候, 發覺"阿叔"喺廁所暈倒報警。"阿叔"被送到律敦治醫院後, 延至中午宣告不治。

各界人士對"阿叔"嘅離世深表惋惜, 又讚揚佢係後輩嘅榜樣。

阿叔嘅離去, 實在係我地香港人嘅一個重大損失。佢同伍晃榮簡直可以話係"絕代雙驕"!! 而家兩個都已經唔喺度, 真係唔知再有冇"接班人"!