我唔太知應該係邊個區發表, 不過見下面有歌 post, 所以就貼係度.
下面有個 post 係梁詠琪既《女兒雄》, 但我想講隻歌又唔係《女兒雄》, 雖然都係同一隻新碟既歌..我驚回覆又會有 OT 同埋推 post 既疑雲.
如果真係出錯, 麻煩板主幫手移 post, 先謝.


梁詠琪出左新碟, 隻碟質素就一般, 維持「梁詠琪」水準囉: 唔難聽, 但突出既歌唔多.
今次佢揀派台歌揀得好, 第一首派上電台係《夏花秋葉》, 應該呃到唔少人買隻碟.

《夏花秋葉》最近係商台 903 都應該播得幾多, 希望你地會聽過.
是咁, 今日我就想向大家推介呢一首歌. 先睇睇班底.

夏花秋葉　　作曲/編曲/監製: 于逸堯　填詞: 林夕

如果唔預先寫, 仲以為係楊千嬅既新歌: 歌名有詩意, 仲係于逸堯作曲林夕填詞.
而亦同楊千嬅多首于逸堯林夕聯手打造既歌曲(例如愛人, 再見二丁目)一樣, 今次《夏花秋葉》都係非常之好聽.

先講一講于逸堯既曲. 佢既曲如果係散發哀愁, 好多時都係咁樣淡淡地, 慢慢咁滲出來.
今次既曲係非常之于逸堯, 好靚. 編曲彷彿借鑑《愛人》, 中後段以弦樂墊一墊.

林夕份詞更加配合到于逸堯, 佢兩個真係合作無間, 份詞唔稱得上係最好, 但配合. 不但配合于逸堯, 亦都係梁詠琪.
「那一天那個他共誰路過，樹蔭中聽風雨似歌……
　謝了花，結了果，被誰踏破，哪一個會變遷更多。
　葉有色，樹無情。沒有憂慮未來，年輪一圈轉了無窮年代。
　下次他，假使於這裡路過，大概沒心思聽風雨感慨。　　　」
由夏花到秋葉, 寫出一段感情由花, 到枯葉, 到「人情自有枯榮」, 無奈而真實.
呢一類題材唔係少見, 但林夕今次係交到水準, 冇浪費到于逸堯既心機.

至於梁詠琪, 無可否認佢唱歌係好左, 不過始終唔算得上係實力派.
係《夏花秋葉》入面, 佢演繹得相當唔錯. 高位係有瑕疵, 而同時感情好足, 完全發揮到歌入面既無奈, 唔會過火, 唔會太淡然.

所以有人話隻歌好似華星既楊千嬅, 我認同. 由班底到演唱人, 同十幾年前既楊千嬅別無二致. 而帶來既感動亦有其影子.
我覺得呢隻歌真係值得一聽.