http://hk.apple.nextmedia.com/template/ ... coln_id=20

享有「中央十台」稱號嘅亞視，明晚 9點半首播玩謝疑似下任特首候選人嘅政治 talk show節目《我要做特首》，亞視原定在紅隧九龍入口掛大型宣傳海報，點知廣告代理卻唔肯接呢單生意，節目監製胡恩威好嬲，話有政治審查。紅隧歸運輸署管，政府打壓言論自由嫌疑水洗唔清。
有「智破地產黨」字眼

被封殺嘅海報由本土藝術家「又一山人」設計，中間有胡恩威個樣，左右有六位疑似下任特首參選人卡通造型，包括唐唐、振英哥、范太、黃仁龍、鬍鬚曾以及泛民派嘅袋巾梁。亞視發言人噚日話，十幾日前將廣告設計交畀代理紅隧廣告板嘅博納（ POAD），前日收到博納通知廣告設計「不適合」展示，唔做亞視生意。
亞視話對此事深表遺憾。據八方所知，博納要求亞視刪除海報上六句喺特首參選人下面嘅標語，但亞視拒絕。八方覺得最有可能出事嘅係「誰想做太上皇？誰是真命天子？」同「零零叁參選　智破地產黨？」兩句。
博納常務董事馮靜婷承認廣告設計通過唔到內部審查，「係商業決定，冇特別政治考慮」。但佢拒絕說明具體原因，只係話一向要將廣告設計交運輸署審批，呢次係博納先否決，通知亞視時同時知會運輸署，佢強調政府絕冇干涉。運輸署發言人話，冇收到紅隧管理公司交嚟亞視呢個廣告申請，而審批時會考慮廣告會否影響交通安全或有冇淫褻不雅內容。畀錢做宣傳都被封殺，胡恩威激到生蝦咁跳，「係我個樣嚇親人，定係唐唐個樣會嚇到人撞車？呢個係通識節目，又唔係叫煲呔下台或財爺早唞，完全冇煽動性，係咪政府落柯打唔准接？」
胡恩威：損言論自由

胡恩威指封殺事件打擊香港言論自由，可能嚴重影響收視，又話個人聲譽都受損，「我做公民教育節目，佢就抹黑咗我好似做攻擊政府節目」。佢話保留追究權利。相比起 CCTVB，亞視搞政治節目出位好多，前年《香港亂噏》諷刺時弊，疑似觸怒權貴被腰斬，呢次《我要做特首》結局如何，真係要拭目以待。

唔知大家會唔會去睇呢?

胡導既舞台劇小弟睇過幾套...覺得系幾反應倒社會現實或者系人既諗法.
例如之前既"唱K回憶錄"...所以我對e套"我要做特首"系有幾大期望.
因為我覺得胡導能夠透過e套野反應出香港一啲社會問題,諷刺時弊. 可惜.....