已經搭入人生新ＧＥ一頁，十六號巴士全冷後已經再沒有開窗的專利巴士行走,而對巴士的熱情亦都減退。
　　我係一位巴士愛好者（呢個ＴＥＲＭ應該比巴膠貼切好多），小時候，家住屯門，而家殘存ＧＥ晝面返小學個時朝朝集隊剩係望住上面部Ａ５９經過，個時坐得最多就係鐵巴，因為唔會無ＬＡＬＡ出九龍，而且鐵巴基本上好多線都係得一隻車型，就係都城，點解鐘意巴士亦都係因為鐘意搭呢隻車個時片灣正同埋可以係樓上車頭食風ＧＥ感覺。當然，小學個時阿媽點會比你坐上層車頭，危險ＡＲ　ＭＡ，所以就係坐第二同第三排已經好開心，而且鐵巴Ｄ垃圾班次（Ａ５９，６５５，６５６個Ｄ坐底最密都１５分鐘一班），根本就係無咩人會搭，所以完全可以霸住三個位黎坐，當時就緊係好想坐車頭，人總係會有慾望先會有衝勁，搭下搭下就好鐘意坐巴士，而且仲想總站到總站，我諗係想享受一個所謂＂完整＂ＧＥ車程。
　　當然都有出九龍ＧＥ時候，１，２個月一次，所以都好珍惜，而通常坐ＧＥ車就係５８Ｍ利蘭，無論車窗（深色Ｄ），引擎聲，坐位編排，巴士公司ＬＯＧＯ，全部都同鐵巴完全唔一樣，所以第一次搭個時係好新鮮，而且上車時仲有Ｄ人用地鐵飛過個部機，好似好得意。另外，個時根本無碌車呢個概念（呢個ＴＥＲＭ係呢幾年先有），個個司機都踩爆，不過係睇下部車去到盡係幾多，加埋個時仲有抽氣風扇，細個有抽氣扇抽下風已經覺得好夠，（行屯公部部都開到７，８０咁爽仲洗鬼冷氣咩其實），雖然３＋２逼逼地，但無人會發牌氣，當全世界都係咁ＧＥ時候，你唔覺自己係受害者。不過有時搭番黎係荃灣上無位個時都要分開坐，而最有可能有位就係３坐位中間個逼位，細個坐晒成程屯公覺得周身唔自在，但都無辦法。
　　到左有冷馬個時，我其實仲慘，有時有冷馬黎都要等下班，因為熱狗同冷馬一條友差成２蚊，成家就可能差６，７蚊，夠俾多一個人錢。仲有就係個時因為係俾ＣＡＳＨ，所以都只係會準備定熱狗價ＧＥ錢，由於佢ＧＥ班次好似係梅花間竹ＧＥ關係，所以都唔會等太耐，盡量都係等熱狗出熱。
　　到中學時候，先至可以終於第一個人自己搭Ａ５９，緊係坐車頭ＬＡ，個種視野ＧＥ廣闊同埋可以操控大局ＧＥ感覺俾到我好大滿足感。
　　因為搬屋ＧＥ關係，每朝就要搭６５９轉輕鐵，一開始係用冷氣６頭，個時覺得好正，因為有冷氣得黎係２＋２座位，但咁短程係完全無動力上上層。當然，連我都無動力上ＧＥ時候其他人就更加無動力，最後大家都開心因為變左做４頭正掛。呢個掛牌只係ＨＯＬＤ左好短ＧＥ時間，因為需求關係，本黎２部４頭加到做５部６頭，再每個月加一部，加加下加到最後變左１６部車，而最後係要加番熱狗做正掛，呢個冷變熱應該好少線經歷到，又坐番Ｍ仔，正常人應該會唔開心，因為冷變熱，但自己就好似重拾番以前ＧＥ回億咁。
個回億坐到６５９ＣＵＴ個時都仲係用２部Ｍ仔黎頂住，所以呢條線都陪左我中學一半ＧＥ時期。個時仲係要賣飛，朝朝６點幾上車，好多時卡佬廢事轉一野吸我成９點先上車，如果個時我得閒係可以坐輕鐵坐到１１點，仲有一樣野就係有８仔個時可能無６５９　ＤＡＴＡ，次次都係見佢打住路線係６７０。除左熱狗，放飛仔個盒而家鐵巴已經無再用，而個盒個時除左俾卡佬放飛仔，亦都俾我知道搭緊咩字軌，因為會印埋係個盒度，６５９ＧＥ字軌仲記得係６１－６７，蛇車就會寫住ＳＰ１－９。
　　突然有一日經過見到２７６Ａ雜排軍車型但我又分辨唔到ＧＥ時候，就有衝動去學識車型。一開始個時真係剩係識得睇住個車碌同水牌黎認型號，巴士論壇邊有人報特見同ＰＯＳＴ相呢Ｄ野，個時上論壇剩係ＤＯＷＮ　ＭＭ２ＧＥ巴士黎玩，唔知點解個時對住部剩係可以咁前後黎行ＧＥ車都可以玩得好開心。
.....未寫完,續.