果洲群島, 位於香港東南面水域, 對出係一望無際既大海
受到風向及水流既影響, 前往果洲群島並冇定時渡輪航班,
而適合上岸既季節就只有夏季既6月至9月, 而且亦要配合細海浪先能夠登岸
而島上既景色, 因受強風及海浪既長年侵蝕, 島上形成香港最壯觀既石崖,
海蝕洞等天然地貌, 果洲群島, 早於2011年玩完離島之旅後已經吸引住我,
等左大半年, 終於有團去了
打完風, 擔心完天氣, 7月1日終於出發, 去我期待左半年既旅程～果洲群島
一早就到達尖沙咀碼頭等上船, 難得今日有好天色, 為今次既行程生色不少
起碼頭到等齊團友, 點齊名, 登船....同時因為係回歸日, 維港上有船隻巡遊
算是起程既少少驚喜
之後一直沿維港到達大廟灣的海域, 呢到上次去東龍島亦都經過過,
已經有大浪既心理準備, 今次船唔埋東龍島岸, 繼續經東龍島對出既佛堂門海
前往果洲, 呢一段, 海浪突然變得好大, 船不斷上下左右劇烈晃動
團友們都放聲尖叫, 有d 人害怕, 但係又有d 人好興奮, 當然包括我^^
而船長亦勇敢地起海上加速航行, 絲毫不與海浪退讓, 令一個半小時既船程
增加左唔少樂趣!
刺激, 好玩, 係我對今次船程既感覺, 亦係今次果洲之旅其中一個難忘回憶
經過1.5小時既驚險海上遊, 終於到達今次第一個上岸點~
～果洲群島~北果洲
鬼斧神工．北果洲．大自然的震懾景致
到達北果洲對出的媽灣, 大家都到船的下層, 等待駁船接送上岸
駁船來到, 大家都分批起海上轉船, 幸好媽灣係一個凹下去的海灣
與佛堂門相比, 呢到顯得風平浪靜, 上駁船都未至於太危險
經過導遊既幫助下, 大家都安全上岸, 沿石屎樓梯向山上行
首先略過了月球崖及大炮石, 直接到達200號燈塔, 沿燈塔下走
便到達一個震撼既風景, 沉船罅, 呢到四面盡是直崖, 下面不斷傳出的海浪聲
視覺, 聽覺, 觸覺互相影響, 令呢到更加令人生畏, 但習慣了後又不是怎樣
走到崖邊感受一下, 走上石頂望下海邊, 走到燈塔望望遠景, 大自然總是不斷給人驚喜
在沉船罅感受過, 影完相, 睇完景, 跟隨導遊既步伐, 來到一處平台
近距離觀賞大炮石, 月球崖, 地獄岩, 西式棺材石等等的石景
大量的六角火山凝灰岩景色, 像一個大蜂巢般, 千奇百怪, 實在壯觀,
崖下一潭清澈平靜的海水, 正好與出面大風大浪的海面形成強烈對比
起平台上留影半小時左右, 隨導遊既步伐, 走到小碼頭準備離開
嗯...又一次在海上轉船了
其實觀賞北果洲, 以上既景點只係走了北果洲的三分一, 其餘北果洲既景色
都在難行, 艱險既地方上, 不過並不是今次行程的一部份, 所以只好起乘船時觀看
上船後, 正式向南果洲出發, 船圍住北果洲行,
月球崖後面是一大幅侵蝕而成的六角巨崖, 景色十分壯觀
再經過南果洲邊既海上小桂林, 起果洲灣海上休息同食過午餐
跟住就開始之後既旅程
～果洲群島．南果洲
精彩．南果洲．超巨型的海蝕大洞
起海上午餐半小時後, 駁船又開到大船邊, 今次我同朋友急不及待
做左導遊以外第一個乘客, 導遊以外第一個踏足南果洲的人
之後等左一陣, 都係唔等齊全團人, 自己同朋友行到落石拱門對出既小沙灘
石拱門果然係香港難得一見既海蝕洞, 站在洞口前, 氣勢實在強大
抬頭再看洞口頂, 似乎我地自己私下離隊, 已經比大隊拋離了,
所以立即經附近山路追回大隊, 當追到大隊群時, 我地已經身處洞頂...
到達洞頂, 附近全部都係懸崖, 又走到懸崖邊, 感受著涼風, 觀賞震懾景色...
之後經導遊帶路, 上到南奶頂既山頂, 觀看對面既山頂．北奶頂
遠望原來係一隻猩猩頭呢~! 轉個身, 再參拜一下全香港最細的天后廟
聽著導遊的介紹, 原來天后廟已經經過多次修葺先變到而家呢個模樣
聽完後, 導遊分開了兩組, 一組行短線, 全部係易行既路, 一家大細岩行
另一組就係我跟既長線組, 甚少遠足或體能較差的話相信好難跟上
之後就跟導遊, 由南奶頂走到北奶頂, 站在北奶頂山頂, 觀看下方既打浪排
前方既大排, 二排, 三排等海上小桂林的小島, 遠方既東果洲
眼前的小島盡是奇特的形態, 起山頂處, 影左好多張相呢.....
之後再跟著導遊步伐, 走到石拱門前的小沙灘, 呢個我地登岸後直接到左既地方
其他團友在此影相留念, 我都再翻影多次, 等齊行長線既團友, 再出發往第2個景點
呢個景點相信冇導遊帶領的話, 自己係唔會搵到, 因為並非真係有路行去
必要時就要沿山坡草地行上去, 行左一陣終於到時南果洲最險既一處．千丈壁
起呢到靠崖邊影相, 的確十分危險, 為影相每個'發燒友'都只敢伏起地上爬前影崖
千丈壁底下就是三叉洞同迴流洞的所在, 不過恐怕唔會有辦法落去了
觀賞完千丈崖壁, 再向石室出發, 去石室既路並唔好行, 草地下是平是凹
最後都係要用腳踩左落去先知, 最終走到石室, 呢到雖然焗,
不過都不失為一個避暑既好地方, 之後導遊表演一下崖壁倒掛,
百厭既我都決定跟佢玩一次, 果然有趣!!
起石室休息左半小時, 另一組既導遊乘著駁船開過黎石室,
通知我地其他人都已經上返船, 此時呢一邊既導遊先如夢初醒
發現我地已經遲過短線組好多, 最終連原路走既路都唔夠時間
跟著導遊, 一群人一齊玩綑邊, 呢次係我人生中第一次玩綑邊呢
沿著海邊既山崖壁斜面上面走, 確實係一大考驗,
不過呢樣恐怕只係最低程度既綑邊呢, 之後, 連碼頭都唔去了
直接起崖邊上駁船返回大船, 等齊人後就急不及待的開船走人了
乘船原路返尖沙咀, 浪已經冇早上既咁大, 整首船上, 團友都對果洲依依不捨
有影相的, 都起船上互相分享自己既照片與所見所聞, 即使大家互不相識
呢一刻都好似朋友一樣無分彼此~!
果洲群島, 留比大家既唔止係大自然既美景, 仲有一份難得既人情味同回憶~!
後記:
已經好多年冇一個行山路線可以令我咁興奮了, 對上一次相信係靠自己能力
好努力咁做資料搜集同搵路, 最終成功帶到自己同朋友一齊到達紅石門
今次既旅程, 由出發坐船, 到上岸觀石, 再到回程, 全部都亳不無聊
所到之處, 雖然只係佔果洲群島大約一半既範圍, 但已經帶比我唔少既驚喜
島上好多既經歷, 到而家都好似歷歷在目一樣, 禁不往要同大家分享
而且所到既地方, 相信好多都會成為我此生難忘既回憶
(同樣感覺, 就只有礦洞深險比到我)
相信來年我會再次參加果洲團, 黎一個深度探險遊呢～！
ＴＨＸ ＦＯＲ ＲＥＡＤＩＮＧ
![[photo]](https://www.hkbf.org/images/smilies/Photo.gif "傾偈無圖無偈傾")
