香港巴士論壇

廢事相簿又唔掂
放定Facebook 網上黎, 有更加多相睇的
http://www.facebook.com/media/set/?set= ... 4c48c72013

斜路．公路．山路，一次過玩晒３種路！

既然放年假，與其日日呆起屋企，不如又搵野玩下！
今次行程：由東涌出發，經東涌道，伯公坳，長沙，塘福，石壁，
羌山道，昂平大佛，大澳道落大澳，之後經東澳古道山路到深屈
經過數條鄉村，最後出返東涌
從地圖睇，足足係整個南大嶼山一個圈，
最終，由早上１０點出發，玩到下晝５點半先走人，又過左一個刺激既日頭了

起東薈城出發

經過古蹟

正式上山的車路了


講返條路，由東涌行到東涌道，中間經過東涌炮台古蹟，不過就唔入去睇了
之後開始正式上斜，可能仲未熱夠身，第１段上到伯公坳既斜路，
的確踩得幾辛苦，再加上今日天氣幾熱，上緊既時候有諗過"不如落返山算la"
不過諗諗下之際見到其他車友，唔覺唔覺跟左人地上到去伯公坳
之後大家互相幫大家影下相，人地行先，我就再休息下先，
由東涌上到伯公坳，好慢好慢咁踩，最終行左半個鐘先上到山頂．．．

伯公坳既頂


起伯公坳休息完，落山既車路，超好玩的
我覺得我絕對有本事揸電單車，由伯公坳落到長沙，只係５分鐘既事
最高時速過左６０km/h，呢段路真係好好玩好刺激，
相信如果有快相機的話，我會比佢影超速(因為段路限50 )^^

落山既車路

5分鐘就到長沙了


不過落山落得太興奮了，錯過左入越野單車徑既路口，不過錯有錯著
黎到長沙，望住長沙既沙灘，風景真係好靚，相信總比越野單車徑既水渠邊更好景色
之後繼續沿車路一直行，去到石壁，又係水塘呢，水塘既風景不論係邊個水塘
都係一樣咁靚，而起水塘上，亦可以離遠望到大佛既背脊，
不過而家望到既大佛真係好細粒．．．

長沙既沙灘


到達石壁水塘

大佛...仲有好遠路呢

水壩邊



過左水壩，影埋大嶼山郊野公園既牌，開始上羌山道大斜
踩左咁耐，條氣終於返返黎，一口氣踩到上昂平道，雖然都用左半小時
但已經冇攰既感覺，之後轉入昂平道上大佛，雖然上斜，但真的越踩越順
不過又用多半小時，黎到大佛，終於肯黎個大休了，周圍走黎走去影下相，
又買下野飲，呢個時間飲可樂，的確係最滿足既事黎
之後就上車落大澳了！(這還是大休嗎? =.=)

影下個牌先

黎到分叉路口, 轉上昂平

一整個石壁水塘

石壁水塘

上到市集了

昂平

大佛


落大澳既路，ｗｏｗ，又好好玩，全程追住架巴士尾落斜，好快就到左大澳
之後起大澳好輕鬆的隨意遊覽一番，大澳永遠都會令人感覺到好輕鬆
完全冇大城市既急速感覺，睇下景，影下相，之後就往東澳古道出發了

追住巴士尾, 好快就落到大澳

大澳


高架屋

曬蝦醬

東京碼頭


遊覽的小艇

離開大澳了


東澳古道．一開始就已經係山路，呢一段幾好玩，不過去到中段上山位
都係抬車收場，但總結成段off road路，比起大欖涌水塘更加好玩
之後變返油柏路同樓梯，不斷落樓梯，最終落到深屈，此時我仲未食野
去士多食少少野先，之後繼續上路，中間經過幾條古樸村落，
不斷起ｄ村路上上落落，除左丁屋就係樹蔭下走，呢段路幾長，但行得幾快
最終去到其中一個涼亭，呢到好清楚望到成個機場，
飛機升升降降，除左細個起九龍城望過之外都冇再望過了
起呢到望左一陣，休息左一陣，上車再行，１５分鐘左右就出到東涌了

東澳古道的起點

off road 路段

好靚既海灣

完成off road 既路, 變返行人路

到達深屈, 好好行既村路

之後起村到上上落落, 冇乜景睇, 黎到沙螺灣

到達涼亭

望到整個機場

起飛

大休中

從深屈開往東涌既小艇

見得返東涌了

回望今朝上山既路~ 東涌道

背後係今日停駛左既昂平360

最後, 都係起東薈城走人了


其實仲想去埋欣澳先走，不過礙於時間同體力影響下，最終都選擇左起東涌走

大嶼山．一個踩車既好地方，將來有機會我一定會再黎的！！

ＴＨＸ　ＦＯＲ　ＲＥＡＤＩＮＧ

本文章評分: +3

 

評分:

會員	時間	評分	評語
EU7649	2012年6月28日 02:34:11	+1
hkmtrhah	2012年6月28日 09:26:25	+1
RON028	2012年6月30日 23:20:13	+1

你究竟係一團定一個人週為去

kmb_68x :你究竟係一團定一個人週為去

一個人玩, 起上伯公坳山路時先遇到一團人(其實人地都係得4個)
之後就你過下我, 我又過下你咁, 同埋一齊上大斜
到大佛之後人地就起深屈走, 我就落大澳, 大家就此分手

其實唔係唔想話跟團去, 不過跟團既話
路線冇得自己鐘意點就點, 而且自己d 假通常都夾唔到人地出團時間
至於自己組團去, 自己鐘意點行, 人地就點跟, 好處係乜都自己話晒事
但係帶團既話, 自己既責任同壓力都會好大, 又要顧及人地能力同安全, 我自問自己冇咁既本事
雖然話可以講明責任自負呢d 免責說話, 但如果人地出事, 免到法律責任都免唔到良心責備

最終, 我寧願一個人玩, 自由度大d , 自己鐘意點就點, 出事就自己攞黎, 冇事就自己滿足
自己起架車到, 衝斜呢野夠刺激, 上山又考自己意志同體能, 玩off road又練到自己技術
不過唯一缺點就係悶......

巴打知唔知大嶼山有邊d on-road既路段推介畀一個非爬山車既用家？
利申：小弟諗住帶架Venzo FS1過去

Naphthalene :巴打知唔知大嶼山有邊d on-road既路段推介畀一個非爬山車既用家？
利申：小弟諗住帶架Venzo FS1過去

推介我唔敢講，不過其實由東涌道行到嶼南，過石壁上大佛，再落埋大澳
其實全部都係車路，只係你要預左會有１：６－１：１０既大斜路等住你上
平日去就少車好多，紅日去我就未試過，不過相信到時會幾多巴士行

如果唔想玩咁大既斜路，都可以由逸東行東澳古道去到深屈
全段都係村既石屎路小徑，不過都係有上落斜，只係唔會好似東涌道上大佛咁要行長命斜
之後沿路走又得，深屈再上大佛都得，不過深屈上大佛你都要預左又係大斜

如果都仲係覺得有難度既話，欣澳行翔東路來往東涌，相信係最易
全段都係車路，有ｄ位會有少少斜路，不過都只係微微地，唔難應付，如果未玩夠可以入埋迪士尼

其實我玩左幾次山，都見過有小輪徑／小摺玩山，大欖越野單車徑果到，上到大帽山波波都見過

大嶼山入面，自己玩過同埋有認知既路就得以上呢幾條，仲有其他路有待開發