又黎放３日假，再次唔好比佢停！！！
今次同樣跟隨本地旅行團，從尖沙咀碼頭出現，經過鯉魚門同佛堂門等海域
離開同上次去果洲一樣既航道，走入新既航道，正式向往西貢糧船灣進發！
船離開左佛堂門之後，中途經過青洲，起海上望青洲，一隻大象在吸水呢！
再起海上航行一陣，右邊就出現一個個大大小小既島嶼，
呢到開始，就係香港地質公園火山岩園區之一．甕缸群島既所在
過左甕缸群島，再經過一個峽窄既水道．鎖匙門，出現起眼前既
就係一大幅巨型六角柱岩牆．糧船灣，亦係今次既目的地了！
到達目的地，船開到糧船灣側邊，著名既破邊洲就起花山山崖側邊了
大自然既力量果然厲害，原本係一整體既山勢就比大自然劈為兩半，
形成左今日，不論起東壩還是海上，都甚具氣勢既小島．破邊洲！
船再開往東壩外邊，第一次起海上望東壩，一次過觀賞晒大自然同人類既鬼斧神工，
之後就起東壩外平靜既海灣過駁船，終於可以登上破邊洲了！
起船上聽從領隊既介紹同指示，乘過駁船，登上了四面盡是懸崖既破邊洲，
等齊所有會上岸既團友，再次專心聽隨領隊再三指示，正式起破邊洲出發！
一開始，迎接大家既就係一段要攀爬既峭壁懸崖，難怪領隊要多次提醒大家
呢一段峭壁實在唔易走，好多位置都已經嚴重風化侵蝕，石頭變得十分易碎
有好多位一發力，石頭就斷開，幾經辛苦，大家都上到一處小平地，
膽量大既都企起崖邊影下神削峽，膽量細又好奇既，亦都不忘伏起地下影
而另一班冇上岸既團友就開始乘駁船橫越神削峽既小水道，山上山下，
大家互相呼喊，聽回自己既回音，神削峽的確有趣！
望過神削峽，影過橫越小水道既駁船，走到破邊洲山頂，
大家都起到作一個小休，順度望一望風景，山頂下就係花山下既孖洞所在
呢到出面既海真係又清又藍，再配上無敵既藍天，呢個風景真係令人興奮
之後領隊企上一個凸出山崖既岩石，大家幫完佢影相之後，我又黎玩命了！
![[flowerface]](https://www.hkbf.org/images/smilies/flower.gif "丁香丹桂茉莉 都覺得可愛")
大休完，再次跟隨領隊落破邊洲既另一邊，呢一邊唔駛再爬崖，但就要闖林
我著住短褲，雙腳真係受罪了，闖林落到岸邊，雙腳已經被植物割傷了
不過換來既，就係一幅氣勢磅礡既巨形六角柱岩壁，當我落到岩壁底下
原來仲有團友起山崖之上，起崖下影返上去，大家都變得好渺少呢！
沿岩壁邊走過去，出現一個小水池，呢個就係破邊洲另一個出名既景色．
貴妃池，可惜潮漲將貴妃池同我地隔開，大家都只好離遠一望貴妃池了
哈哈，大家又玩得太忘形了，另一個領隊又開住駁船叫我地離開，
大家跟隨島上領隊，綑岸走到上岸既地方上船，離開了早上既破邊洲之旅
出發到下一個景點．糧船灣
震撼，壯觀．大自然的鬼斧神工，大自然的偉大傑作！
離開破邊洲之後，上回大船黎到小白腊，側邊有另一個海蝕大洞，
亦係西貢著名既木棉洞，起小白腊海灣上再次轉乘駁船，
登上了一個陸路都可以到達，一個起０９年已經想黎，結果搵唔到路而告吹，
一個未有萬宜水庫之前，曾經係離島既地方．糧船灣！
從糧船灣月牙溝既岸邊上岸，直接黎到月牙溝，呢個係一個小水溝
起溝內既海水真係好清澈，而且整個溝都可以見到底，雖然水唔算深，
但水底下都養活了不少生物，海參，水母，都困起溝內，等待下一次潮漲黎到，
佢地就可以再次返回大海了！
一團人觀賞過美麗既月牙溝，正式上山了，開頭登山既路唔算難行
一陣間就行到一處完全冇樹蔭，金黃色既山脊．黃金壁，起三十幾度既高溫
再加上整段浮沙碎石路，大家真係行得好辛苦，不過辛苦得黎既回報
就係從高處觀看月牙溝，小白腊，木棉洞等等既景色，西貢既景色總是一次又一次結大家驚喜！
穿越黃金壁，攀上山崖邊，望出去既風景實在令人讚嘆！
呢到就係世界級既巨型六角柱海岸群．萬柱海岸！
站起山崖邊，一幅又一幅巨大六角岩壁，亂中有序，超過30米高既六角柱
極具氣勢，所有團友都大讚呢一幅美景，雖然未必能夠用靚黎形容，
但就絕對係壯觀景色既表表者！望住同一個景色，我都不禁影左好多相呢！
起呢到，大家實在唔捨得走，對著偉大既風景，烈日當空遇著崖邊清勁既海風，
呢到真係曬得黎好舒服！不過時間關係大家都只能跟隨領隊離開，
走過觀洞坳，又再一次望到東壩既弱波堤了，之後下降到海邊，呢一段落山路實在唔好走，
烈日當空再加上體力既消耗，而且仲要闖林，落山既路真係感覺難關重重
最終落到斧劈崖，唔知係乜野力量使我回頭一看，原來另一個水溝．十字溝
就出現起眼前既遠處，拍過照，觀賞過，再走到花山底下既一個石春海灘
此時已經有團友捱唔住高溫既煎熬，直接走到海中降溫，
而唔想落水既團友就起石春灘覓一處遮蔭既地方休息一番，等待大家緩緩咁起山頂步下．．．
等齊人，駁船又巧合黎到接大家，大家都拖住疲倦既身軀，登上駁船，大船
再次起海上觀賞破邊洲，船就起程回航了！今次足足跑左幾個山頭呢！
後記：
糧船灣既萬柱海岸，原本係2011年《萬宜水庫外傳．糧船灣》既預定行程
可惜果次最終搵唔到路，亦行錯左路，將最壯觀既景色完全地錯過左，
等左一年，估唔到會係跟隨本地旅行團黎到呢個地方，而且仲能夠登上破邊洲
呢個機會真係好難得，因為一般既地質公園團都唔會登上破邊洲，
企起破邊洲之上，海下面都已經有3,4隻另外既團駛到觀賞，但都冇再駁船登島
網上唔少圖片都係起花山頂望過去破邊洲，但起破邊洲再望過花山頂
真係極少既機會，難怪領隊都笑言話我地"益左"對面花山頂既行山友
話比佢地有機會影到破邊洲有人！而上次錯過左既萬柱海岸，
睇過網上甚多既相片，都不及親歷其景，用自己既雙眼看到既震撼
大自然，果然令人讚嘆不絕～！
ＴＨＸ ＦＯＲ ＲＥＡＤＩＮＧ ． 多謝大家費時閱覽此文章！
![[photo]](https://www.hkbf.org/images/smilies/Photo.gif "傾偈無圖無偈傾")
～ 