放假前既幾個工作日，我一直都留意住放假日既天氣，多番失準既天文台
預測依然係多雲有雨，直到臨放假前一晚，天文台先至將落雨既圖改為天晴
於是就臨時臨急，將原來沈悶既假期改為多姿多彩既離島之旅！
而今次既目的地，就係～長洲～ 一個香港人熟悉，著名既小島
不過對自己黎講就似係曾經黎過，但又冇乜印象既地方，而今次既行程，
就幾乎都將成個長洲都全走了，全日都起藍天白雲底下走過，
一直行到入黑，皮膚都曬得通紅了！
再次放假又神咁早咁彈起身，計計埋埋，似乎我都連續十幾日假期冇休息過
食完個早餐，搭車到碼頭，時間又再次預少左，於是大家都要跑到碼頭追船了
今次搭左慢船，坐上"普通位"那一層，跑完熱完，再加上通風差又冇冷氣，
成程船感覺都好悶熱，話雖如此，但係大家似乎都對船上感覺好新鮮咁
不斷咁走黎走去冇時停！起中途遇到一隻去澳門既快速船，我就趕到船尾影
隻船真係超快，再加上船尾既熱氣流同長長既浪花，真係好有氣勢．．．
經過左４０分鐘左右既船程，大家終於都再次踏足長洲了，
到達之後就開始計劃今日既行程路線，原來係想行一行市集先，
之後再上山去張保仔洞，不過唔知係點樣既情況下，
不自覺地就跟上地圖紅色既家樂徑路線行，走上了人煙稀少既細小山徑，
走上高地一kill 標距柱，眺望長洲全景同長洲灣既海岸，藍天底下望到既景色
海更加藍，山更加翠綠，遠處更加可以望到甚有氣勢既鳳凰山同大東山
兩座大嶼山既高山，山頂依然都係隱藏起雲霧之間，呢個角度望真係幾有趣！
![[flowerface]](https://www.hkbf.org/images/smilies/flower.gif "丁香丹桂茉莉 都覺得可愛")
起高地望完遠景，接回小徑落到西灣，海邊的一排長椅甚感寫意，
大家起長椅邊拍過合照，再次返回小徑向張保仔洞進發，經過天后亭同公園
路邊既小蜥蝪似在歡迎大家黎到張保仔洞～！因為大家都冇帶電筒，
黎到洞口前，考慮左一陣，決定裝返個手機手電筒功能深洞，
走入著名既張保仔洞，短短既洞穴好容易就行過到第二邊了，出返黎
望住藍天白雲，忍唔住又要玩下飛jump影相，今次影出黎個效果
真係似起天上飛一樣，起到影過玩野相之後就再到五行石，
不過實在真係唔知五行石係點既樣，最終經過左都冇影到，一直走到白鰽灣
先知自己錯過左，但係出現起眼前既白鰽灣沙灘，風景真係好靚，
起沙灘上休息過，走左一陣就返回市集補給一下，走入大菜園區既複雜村路
誤打誤撞下就到左關公忠義亭，之後就向南氹出發～！
到左南氹，又一個好靚既小海灣，熱左大半日，呢到終於都有一陣陣涼風吹過
大家都起到休息一陣，再經過小徑走到小長城，呢到有唔少怪石，
但除左花瓶石叫做比較神似之外，其他都只係平平無奇，結果小長城呢一段
感覺上似係白行的，之後再走到觀音灣，東灣等公眾泳灘，再到市集
正式起市集內遊覽一下，再幫襯一間有唔少客人既鋪前既大大串薯片
的確係幾特別既小食，之後不斷起橫街窄巷中穿穿插插，一直走到黃昏
此時先開始今日既午餐，求其咁搵間餐廳醫完肚，趕得切觀賞長洲既日落
日落既光線加上避風塘內既漁船，就成了一幅獨特既日落照！等到天黑之後
就搭上高速船離開長洲一日遊了！
後記：
自己其實都唔太清楚以前有冇黎過長洲，對呢到真係印象唔多
今次接近全走左長洲，感覺的確幾新鮮，對比起市集，
自己反而對家樂徑既風景更加有興趣，再加上藍天白雲，唔少景色都突出起黎
不過整日既行程，都起烈日當空下走過，最終而家當然又曬傷了
但係見到長洲既另一面，即使曬傷都覺得值得了＾＾
更多相在此
ＴＨＸ ＦＯＲ ＲＥＡＤＩＮＧ．
![[photo]](https://www.hkbf.org/images/smilies/Photo.gif "傾偈無圖無偈傾")
