嚴重警告：此路線須要非常大量的攀爬．部份位置十分險峻．遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

險中暢遊馬鞍山．險峽眾脊處處攀！

今次又起網上搵遊記，又搵到ｄ得意野！一月既時候玩過黃金壁脊
算係對陌生既馬鞍山有初步認識，睇完人地既遊記，原來雁谷附近仲有一眾峽谷山脊可以玩
一於跟足人地既遊記，跟足相同既路線，將所有谷脊一次過玩晒！
今次路線由110礦洞廢屋附近起步，先上石壘脊，險攀石壘峽
到吊手岩主徑後落金毛狗峽，返回雁谷迷徑後接吊手岩北脊返回主徑，
再由靈猿左臂降至迷徑，然後又再經折雁峽上攀吊手岩主徑，因為黃金壁脊已經玩過
所以最後由吊手岩主徑降至燒烤場完成！
有險攀，有碎石，有泥坡，仲有崖邊，雖然部份位置環境險峻，而且頗有難度
但實在玩得盡興！


先黎石壘脊，石壘峽．只行石壘脊，其實只係一條崎嶇山路．除左可以下望馬鞍山市之外
其實都只係悶路一條，沿脊去到一分叉路就可以離開石壘脊，左轉下降到石壘峽
先係以之字形上攀，過一苔蘚小棧道後，就係全峽最險一處泥坡，此位置下面係崖
上攀亦只能靠樹而上，曾一度考慮過要敗走，試試手位，原來險要之中亦有足夠手位
再問問同行山友能力，決定攀上，難位過後就係石壘峽中既疊石．可沿疊石窿上攀
亦可以起左壁繼續扶樹而上，過完險位，好快就上到吊手岩主徑







之後就係金毛狗峽．起主徑會望到一舊好易認既崖邊大石，入口就係起石既右方
開始下降時路況非常斜，只能小心扶樹而下，途中有一兩個壁要攀下
有攀爬經驗的話都可以輕易應付，之後就係碎石路，除左會落石之外，難度不大
往上望開始見到峽谷山勢，左右兩壁極為震撼，抬高頭往上望，兩壁就似穿入天際
霧氣從峽流入，十分精彩！之後當然唔好錯過金毛狗峽既主角．金狗毛蕨
再下行一段又返到雁谷迷徑！




吊手岩北脊．全日最好玩既山脊！全程幾乎都須要攀爬，不過大部份都有手腳位
而且輔助用既繩亦非常多，雖然好多睇黎都好穩陣，不過就真係須要先好用
途中當然都有險位，有一個崖邊險位完全要靠繩上，背後係深淵，心理壓力非常大
之後都有幾個難位，不過只要小心應付，險得黎都算易應付！
之後當然又上到吊手岩頂啦！





靈猿左臂．再向吊手岩主徑落山，今日大霧就搵唔到靈猿頭既提示
一直都擔心搵唔到左臂入口，然而同行山友真係好眼力，地上岩石比人寫左個「左」字
再對一對ＧＰＳ，呢個肯定係靈猿左臂，沿脊下降，又係非常斜，部份路段左右都係崖
可惜起霧入面行，此線既景點．靈猿頭完全都望唔到，只好專心落山，小心翼翼
又返返去雁谷迷徑


最後係折雁峽．再次向吊手岩北脊方向行，到北脊前一個路口跟絲帶上走
沿路直接到達崖壁底，先有兩條小繩輔助上攀難位，再接兩舊巨石，上攀亦只能靠樹
難度不在攀爬，而係濕滑既石面，之後就係一大段碎石林徑，右方亦開始出現一個巨壁
繼續沿森林上走，絲帶左右分佈，選行左邊一陣就到達折雁台，台後又有一個險位
左右兩邊都要攀爬上頂，大霧下似乎冇乜懸空感，但相信好天時會十分驚險！




之後又上到吊手岩頂，沿主脊落燒烤場，因為黃金壁脊已經行過，所以今次就略過
大霧下終於都有驚喜，吊手岩都有雲海，作為旅程既尾聲，十分精彩！



後記：
驚險既石壘峽．精彩既金毛狗峽．最好玩既吊手岩北脊．大霧下最無癮既靈猿左臂
仲有刺激既折雁峽，吊手岩以北既一眾山脊估唔到可以咁好玩！
不過今日濕度頗高下，行得唔算輕鬆，而且身體亦散唔到熱，感覺幾辛苦
決定了！等到年尾涼快又好天既時候，此線一定會再玩！

上面提及有關黃金壁脊及折雁台的照片．請參看「黃金壁脊．鞍山探奇」的遊記

ＴＨＸ　ＦＯＲ　ＲＥＡＤＩＮＧ ．