警告：石澗路線多屬危險玩意．遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

～雨後放晴短線遊．屏南瀑景多姿彩～

經過左三月尾一場二千萬年一遇既黑雨，好幸運地放假日終於出返個太陽
原本今日計劃跟其他山友既路線去搵分流既秘景，不過朋友突然邀約
長途同偏遠既路線即刻唔駛諗，咁就大獲啦，中短路線我自己一直都冇計劃過
突然間改線，究竟去邊好呢？

一早起身，即刻起網上面搵遊記計劃行程，一搵又個幾小時！
中短路線又要有景睇，再夾埋大雨過後，仲記得上年雨後梧桐寨真係精彩到極點
所以萌生左個念頭，不過搵條澗仔玩下，起雄心網上望到屏南，見呢班高手連落雨都照行
似乎難度唔高，正當以為正合我意既時候，搜集資料做功課了解路線既同時
伴隨著既係此澗一次又一次致命既意外，由於太過即興，要即時搵腳似乎已經冇乜可能
獨行此澗即刻覺得變成一件高危既事！嗯．．．不過既然資料都已經搵到七七八八
始終都係死心不息，一於親自去到石澗附近睇睇水量再決定行程！


又花近一小時車程，南涌落車入村，去到澗口水壩後一望，連日大雨後水量竟然唔算太多
決定入澗，此時突然幾把人聲高呼，起澗前地龍口既工程人員極力地禁止我再前行
又一件出乎我意料既事情發生，既然冇得再行，只好回頭，再諗諗去邊好呢？南涌郊遊徑？
最近係你啦，冇辦法當係超閒遊啦，只係15分鐘路程，竟然已經去到屏南中游既小橋
「下面入唔到姐，咁不如上面落去啦」任性的我突然起腦海諗到如此絕世既「屎橋」
一於就落去，開始落時有兩三個位頗難搞，大概因為係落既關係吧！先到老龍潭
再到全澗最好睇既草裙瀑，繼續落到大穴潭，原本條「屎橋」計劃去到呢到就上返去
不過望落去景色之美實在難以忍耐，結果行行下又落晒去，起地龍口見返禁止我入既工人
今次佢地都冇聲出了！！！











又起澗口出返車路，又再上返南涌郊遊徑，又去到中游既小橋，今次就進入屏南既第二段
一開始係一段林澗，行一段轉個彎景色突然開揚起黎，一大幅石坡伴隨著緩緩流水
澗道變得非常斯文又平易近人，沿途流水，小瀑，小潭，處處都係非常吸引既靚景色
回頭一望，原來自己已經錯過左舊肥豬石，離遠影算了，再上多一段轉個右
性格溫文既屏南突然性情大變，兩道澎湃瀑布出現眼前，十分精彩！
不過上攀兩道瀑布就真係要非常小心，全日最難亦係呢個位置，但對比其他玩過既石澗
都只係小菜一碟，過左雙瀑對上，又黎多一個雙瀑，呢到就係網上所講既九疊潭
過左兩道雙瀑之後，又再次變返平緩既澗道，間中都有潭有瀑，好快就到老龍田
亦即係南涌郊遊徑既上段，估唔到既係石澗既岩石唔少都好乾爽，但郊遊徑竟然又濕又滑
不過好彩條郊遊徑本身都唔難行，好快又出返車路，見天色唔錯，再上埋尤德亭睇下風景
原來中短線都可以如此精彩！










後記：
正所謂嬉山莫嬉水，幾易既行澗其實都存有風險，尤其當發現屏南石澗近年發生左咁多事
起早上計劃此線之時一直都起到掙扎究竟行唔行好呢？同時亦搵多幾條短線
好似雞公嶺，未行過既麥三等等，但似乎冇一條短線夠屏南吸引，最終造就了今次行程！
屏南石澗澗途雖短，但瀑景不絕，今次揀呢條線閒遊都總算冇揀錯呢！


ＴＨＸ　ＦＯＲ　ＲＥＡＤＩＮＧ ．

最尾幾張相認真精彩！