警告：綑邊，石河路線屬危險玩意．山地塘(陰山)路徑分支亦多，遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

失敗滋味唔好受．再來南丫玩到夠！

南丫島，自己已經有幾年冇黎過，但講到島上面既山脈，自己就真係從來都未玩過
幾日前再黎南丫島，一心想玩深灣石河同陰山既一大堆石景，因為自己任性，因為自己貪玩
唔聽山友比既指示，結果終於都嘗到第一次既失敗行程！
既然失敗左，重新檢討過，收拾挫敗既心情，重新再黎南丫島玩多次，今次就要聽話跟返足人地比既路線再玩一次啦！




繼續再黎索罟灣，同一條路直上陰菱坳，今次就唔落東澳村，而係試條新路起山上行隱徑落深灣
再次綑返大角條邊，不過今次水漲，有唔少位都幾難搞，最終去到山友講既小海灘，轉上第２條深灣石河
無錯，深灣石河係有兩條既，上次搵唔到路既同今次呢條都係深灣石河，不過今次呢條就冇咁壯觀
雖然係咁，但上攀來得非常容易，一陣間就已經上到山脊之上，第一舊出現既陰山石景，就係麻麻地似既犀牛石
視線一轉，前面就係非常出眾既地標景點．天空祭壇，上攀祭壇唔容易，落返黎就更加難
結果一個人落黎都係要施展飛躍道咁跳返落黎，不過真係好高，之後落一落山坳位，上望就有一個飛來石
真係好奇究竟咁大舊石係點樣托左起其他石上面呢？





過後開始就要上返山，先有一個戴左帽既鬼佬石，再上就見到另一個出眾既石景．沓板石
兩個大石上下層疊，形成一個巨型既跳板形狀，大自然除左識鬼斧神工，仲係一個識得計力學既工程師呢！
過後就可以專心直登山地塘，亦即係陰山山頂，起山頂上都有明顯分支，一邊落蘆鬚城，我就選擇落返陰菱坳
途中就肯定會遇上不文石同肥豬頭，其實仲有隻手指石，不過竟然比我錯過左，只好遠遠咁影過去．．．








返到陰菱坳，只係下午1320，可以玩埋對面既菱角山，山上又有一大堆石景，而且仲有一條靚樓梯
輕輕鬆鬆就可以上到菱角山頂，原來呢座小山都有唔少遊人上黎行，落山前都有一個好得意既狗仔頭
之後就落山直達模達村，上次敗走其實都有經過，但真係冇心情再影，今次就補返飛，行多幾十分鐘後
又返到黎索罟灣，估唔到行左咁多都只係1430，可以慢慢食返個下午茶，再同茶餐廳既貓貓玩
時間尚早，仲可以閒遊遊人不絕既郊遊徑去埋榕樹灣，望埋闊別左好多年既大風車，去到榕樹灣
又可以慳返幾蚊船費，今次報仇之旅都算係超額完成了！







後記：
估唔到石河再加陰山既路程係咁短，本身都有諗過出埋大角咀（唔係九龍果個）
不過冇搵過有關路線資料，再加上衰過一次，今次就重點玩返自己已經計劃左既野先
下次再黎南丫島，應該會玩第２個角，相信又會好好玩^^

ＴＨＸ　ＦＯＲ　ＲＥＡＤＩＮＧ ．