警告：溯澗帶有危險性．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

乾瀑濕壁冇眼睇．一窮東龍登大東

一東龍，一青龍，原意今日唔係東龍就係青龍，早上黎到東涌上望，大東山被雲霧沒頂
如果行青龍上到大東天池都係沒頂咁就冇意思，所以都係揀返東龍，話說今次係我第一次玩大東水系呢！

今年應該要行好多次黃龍坑道，因為自己都幾想可以玩晒咁多條「龍澗」(諗下好了)
當然香港三大險澗之一既臥龍，我驚青唔敢試就唔包括在內！


講返今次，起黃龍坑道車路上面其實都已經望到東龍石澗。「咦！冇瀑既？」，起車路之上已經深感不妙
起豎井跟小徑入澗，沿途只見緩緩流水，上溯一段就已經黎到連環瀑，淨係聽名字都已經覺得精彩
雖知．．．似乎我真係太心急，今日唔應該玩「龍澗」，連環飛瀑竟然乾水，意料之外既事呀！
我應該係比網上靚極的圖片沖昏頭腦，既然黎到，算了繼續上！



第一層瀑壁睇落手腳位唔錯，決定一試正攀，缺水就係好在咁，成段崖壁都乾爽，幾好攀
好快就上到第二層瀑，缺水下並不可觀，望到瀑壁有繩，原本想再試正攀，不過條繩都幾唔可靠
都係乖乖地行山路避險，再經第三瀑，瀑底有個好似壺穴咁既小洞，大水相信會幾好玩




離開原本好精彩既連環瀑，上面就係伏虎潭，個名真係好強勢吓，不過個潭都細得幾可憐吓
再加上只係開水喉力度既瀑布，又係無可觀，登上瀑頂下望，碧綠既伏虎潭原來都幾靚



東龍最正就係一瀑接一瀑，好快就到全澗最壯觀既鷹頷瀑．．．係原本最壯觀
黎到瀑前就只有黑色濕壁加「水喉漏水」，原本靚靚既東龍如此地令我失望，其實一切都只能怪自己
不過瀑底小潭都唔差，大東水系最吸引人既地方，相信都係清澈透底無污染既玻璃清潭
再起左邊山路上瀑頂，又有橙色淺潭加小瀑，最過癮係瀑壁十足樓梯咁，大自然真係幾估佢唔到
原本既精華路段黎到呢到已經告一段落，多謝收睇，再上就可以左走離澗返郊遊徑！










咪住先，咁就離澗？反正出返郊遊徑都係冇野好睇，不如一試溯盡東龍，感覺上都唔多人會咁玩
難得起澗中，電話都收到信號，即時上網再查吓上源點行，原來都唔難，反正都係悶
咁就悶到上大東山頂啦！
走過充滿絲帶既路段，接下來澗容就變成石河一樣，大石處處，再見唔到緩緩流水
而且林蔭蔽天，雖然沿途冇太多景色，但感覺非常原始，不過太陽曬唔到落黎亦都令周圍長滿青苔
原本幾好行既澗道都變得好濕滑！小心翼翼窮盡東龍，臨近山頂前三面崖壁突襲
現場睇好有南巖擎天峽既氣勢，唯一只係樹林實在太茂盛，要窺看死胡同狀既崖壁得花點功夫
相片實在解釋唔到，只能現場感受氣勢，起右邊輕攀崖壁出澗，好快就接上大東北脊既山路



輕輕鬆鬆登大東，之後再黎大東山影下屋仔，今次就玩下玩具相， 五月既山嶺已經變成處處翠綠
山．始終都係綠色先靚，初夏大東之美的確係非筆墨可以形容，當然呢樣只係個人感受啦
之後再去大東天池，將來溯盡青龍石澗都會起呢到出澗，但我實在忍唔住要先行一探了
最後向南山落山，雖然只能望到乾水既瀑壁，但今日都總算精彩^^


後記：
上次南丫迷路敗走要報仇，今次東龍缺水又要報仇，14年我真係夠晒多仇恨
下次再黎東龍將會係大水之時(希望啦)，中間出澗再玩埋小藏龍，真係諗起都興奮呀！ＸＤ

ＴＨＸ　ＦＯＲ　ＲＥＡＤＩＮＧ ．

最後．以下係一直有投開稿既山友，邀請我一齊寫既第一篇報章遊記介紹
http://www.am730.com.hk/article-205206
不過我讀得書少，文章內容依然很「爛」