警告：溯澗帶有危險性．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

新娘潭．照鏡潭．龍珠瀑．輕鬆行～！

「放假先黎落雨」既厄運尚算解除，由上星期推到今日，由原意獨行變成山友同行
計劃好既相同路線，今次就黎橫涌石澗，但只遊橫涌又略嫌太短，所以又加料行埋新娘潭
好彩加左料，完全估唔到全日最精彩既瀑布竟然會係照鏡潭既瀑布！
全日路途雖短，但瀑景精彩不絕，最重要係橫涌真係好易行，閒遊首選呀！


又係烏蛟騰，一起步落到小橋之上，下望一個清澈水潭，由０７年第一次到烏蛟騰到今時今日
都覺得呢個水潭好靚，但都係到行之前搵資料先知，原來此水潭係照鏡潭既上源
跟絲帶沿溪邊走５分鐘到就已經到照鏡潭瀑頂，下望感覺十分虛無，因為真係非常高
橫越瀑頂起另一邊有崎嶇山路落瀑底，可以慳返唔少路程！
落到照鏡潭，嘩，一道接近廿多米高既飛瀑一瀉而下，流水被瀑崖打散成三四層，非常精彩
可惜由瀑頂到瀑底，都一直未能夠搵到方法欣賞到照鏡潭如何「照鏡」．．．
之後沿郊遊徑前往新娘潭，臨近瀑布就要沿澗而上，可能真係太出名啦，澗旁有唔少垃圾
黎到新娘潭瀑布，比起照鏡潭水量明顯唔太夠，剩下一絲絲既瀑流，反而更覺新娘既幽美
「一個幽美的新娘澎湃地照鏡」，加料既前奏都已經好精彩呢！






之後出返車路行一陣，到一彎位時轉右邊斜坡梯級而下，就到達橫涌石澗，入澗就係如此方便
沿澗而上先黎就係一個三角瀑，再黎一個大石坡，瀑流起石坡上縱橫交錯，分得非常散
沿澗輕輕轉一個右彎，就會有一高瀑藏於谷中，呢到就係龍珠瀑，又係一個非常高既瀑布
瀑布亦分成上下兩層，但要一探龍珠上瀑，似乎只可以由右崖險攀而上，起瀑底觀察過
合適上攀既路線似乎都幾唔明顯，「不做沒有把握的事！」，都係乖乖地行返左邊山路登上瀑頂
寧願錯過上瀑都唔好出事嘛！






到瀑頂後前行，好快就會見到一小水壩，此時要回頭一望，左邊山崖之上就有一座恰似人面既紅番石
水壩之後就係霜碧潭，小瀑伴隨密綠色深不見底既水潭，究竟有幾深呢？






右邊有山路繞過此潭，過後再有數過小潭小瀑，就到黎到一個無名既側瀑
看似冇路走到瀑底，右邊亦有山路引誘大家去錯過此瀑，不過點都要諗辦法到瀑底一看
其實都唔係咁難姐，到瀑底就會發現側瀑其實係分散成三，四組小瀑，一幅橫向發展既瀑布
雖然瀑布本身唔高，但比起一瀉而下既大瀑更覺精彩，過後就進入繞絲溪
雖然仲有一條雙瀑，但澗途精彩段基本上已盡，澗邊不斷都有山路可以繞行
好返快接回郊遊徑既小橋，出澗一樣非常方便呢，之後左落大尾篤，右落返新娘潭
為左補給所以我地揀左新娘潭作結，行車路出返大尾篤！





後記：
真係完全估唔到，其實新娘照鏡雙潭我係第一次黎，但就一直都無視佢既存在
原來好野一直都起身邊，失敬失敬！

ＴＨＸ　ＦＯＲ　ＲＥＡＤＩＮＧ ．

以你而家個級數
你口中「閒遊」會唔會都係好難行 ga

巴士狂徒 on 2014年6月16日 23:25:42: 以你而家個級數
你口中「閒遊」會唔會都係好難行 ga

行澗最好都係搵人帶啦

呢條澗有人帶住既話，稍稍有行過山既都會應付到（搵人帶主要都係可以有人指示你行適合既路線，唔駛自己摸錯位）
行澗攀爬係少不免的，不過都係爬一兩步咁就上到，難位全部側邊都有山路避，入澗出澗亦唔駛搵路，直出直入
以我玩過十幾條澗入面，呢條真係易到冇譜的

至於「閒遊」呢，個閒字除左解路線容易程度之外，最重要係講求心態，輕鬆慢步．細意欣賞！