香港巴士論壇

由吳啟華 » 2008年8月12日 23:10:27 (p#1464325)

見不時都有人問，小弟就將我自己既經驗分享下

首先你要清楚你起邊度買，要起外國網站買巴模首要條件係要有Paypal戶口先

Paypal 戶口點申請呢？

首先一定要有卡，Paypal係接受信用卡，銀行卡

(即提款卡其實都得，不過應該要有Visa或者MasterCard logo果ｄ，EPS我唔太清楚）

Paypal之後既步驟小弟唔多講了，跟佢既指示就得，但係買英國車最好去Paypal UK，因為有分USA同UK的．

搞掂哂Paypal既野就可以買巴模喇，不過又有分別

一個起外國網站買(e.g S&D models，Hattons)

外國網站買通常新車係唔會平，例如你買CMNL車咁，英國個邊標價係24.99磅

呢個時候你要仔細考慮下應唔應該買，考慮清楚真係要買喇就落order，

不過佢一定唔會淨係收你24.99磅，因為仲要計運費．

一般黎講起英國寄一架巴模價錢既運費係大概６－７磅，如果超過７磅即係話佢要賺埋你運費，

之後佢會出個總數比你，例如我買架Enviro400

車價:24.99磅，運費6磅，總數=30磅

匯率我當佢係15蚊港紙兌1英磅，即係30乘15，總數係$450左右

運費方面通常係越買得多，運費越平，買好多既話甚至會免運費，不過係極少可能發生

有樣野要記住，你臨比錢前係可以取消Order，但係比左錢後就一定唔得．

第二就係上網Bid(例如:eBay)

eBay比錢大多數人都係用Paypal，但係亦都有其他方法

例如Money Order，匯錢，但係小弟唔太主張用呢兩個方法，因為手續好麻煩，同埋銀行會收幾貴charge．

起eBay bid野除左有Buy It Now既logo之外，其實最好唔好咁心急即刻落bid

因為一個拍賣有好多潛在買家，會起最後幾分鐘甚至幾十秒前落bid

如果你一開始就落bid基本上有８成機會會比人過，所以最好清楚個拍賣完結既時間

最後幾分鐘前好開始落bid．同埋要不斷refresh睇下有冇人追bid．

有時要捱下眼訓架，因為英國同香港有相差８個鐘既關係．

仲有睇清楚拍賣描述，例如架車本身有冇問題同埋賣家肯唔肯寄黎香港咁，

如果佢"Post to"果欄只係寫住United Kingdom既話，

不妨問下佢肯唔肯寄黎香港同埋要幾錢運費．通常eBay既賣家收既運費可以好平，亦可以好貴．

平既小弟試過3.2磅，貴既10磅都試過．睇清楚先好落bid．

假設你贏左，唔好即刻比錢住，等賣家send左個總數比你先好比錢．

運費方面大部份賣家都願意買多一架或多架而減運費，視乎數量．

比錢既方法同起網站買巴模一樣步驟．小弟唔再多講．

英國寄一架巴模黎通常要７－１０個工作天（星期日係唔當一日）

但係有時會有早，亦都有遲．早既小弟４日都試過，遲既兩個月都得

比錢前最好同賣家講用Airmail寄，因為有時有賣家出蠱惑會用平郵寄去呃你運費

如果你選擇用空郵，７－１０日通常就會收到，超過上述日子就最好send個e-mail問個

賣家幾時寄出架野．平郵快則兩個月，遲則４－５個月，仲有你應該要祈禱，祈求架車

黎到唔好散哂，因為平郵運貨個班人唔會斯文對待ｄ貨，就算貼左易碎既貼紙都係．

平郵唯一既好處係運費平，但同時亦有機會寄失，風險較大

收到架車之後check check架車有冇問題，但係唔係叫你驗屍咁驗，如果架車有大問題

例如爛左，花哂等可以send個e-mail同賣家講，傾下可唔可以退貨＋退錢

不過如果架車只係一ｄ小問題就唔好要求退貨，賣家通常都唔會接受．

仲有退款個度賣家只會退架車既錢，運費大多數都唔會退．所以落bid前睇清楚幅圖，

QC岩你心水先好落bid．

Paypal自己設有一個投訴系統，如果你買左架野番黎同你bid個陣有唔同，但係個賣家

又唔肯退錢既話，你就可以用呢個系統去出一個case，但係你就要提出證據去證明你講既野，

最後Paypal會視乎情況去介定會唔會全數或退部份錢比你．

小弟可以分享既係咁多，我非常樂意大家幫我補充．仲有有咩唔明可以回文