警告：溯澗屬高危活動．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>大圓石澗瀑布眾多．本文不能盡錄．請參看更詳盡的遊記<<<<

---

悠閒險攀．盡在大圓！

以大帽山為源頭既石澗真係有唔少，除左出晒名既梧桐寨，同上次行得一段仔既大城石澗之外
今次既大圓算係第３條遊歷既石澗。貴為舊九大石澗之一，雖然只屬中型澗，但瀑景依然有保證！
行走「第２段」的精華段更係一路行，一路嘩嘩聲，精彩位一浪接一浪，完全唔比機會大家悶
既可以享受攀爬之樂，又可以浸水消暑，瀑布更加係可以零距離接觸，真係好值得一遊！


「大、圓」，姐係由大帽山流往圓玄學院，起點就當然都係起圓玄學院啦，經過村落小徑到達引水道
右行至見到水壩就係大圓石澗既澗口，由此起直至到龍門郊遊徑二號橋為「第１段」
此段澗途其實比較悶，雖然係處處流水淙淙，但都以流瀑為主，認真可觀既瀑布實在唔多
幸好大部份路段澗床尚淺，第１段可以講真係玩水玩到癲，只要一有小淺潭都可以水戰大圓
悶途黎講都變得好好玩！



行左兩小時先玩完第１段，終於都黎到二號橋，開始進入由二號橋至到相思林徑既「第２段」
亦係全澗精華所在！由二號橋開始上溯20分鐘左右就到達銀花潭大休，冰寒既小潭
全身而進咁浸起水到，真係凍到幾乎失溫，最後更走到瀑流上面影相，真係爽到震
襯大隊未大休完，我先行一步，因為上面既瀑布更加精彩，銀花潭後既一段叫做九龍吐珠
雖然唔明個名既含意，但就係一段連續既流瀑，真係相當精彩。等等大隊再繼續上
就有一個非常好玩既瀑布，可以走到瀑布後欣賞面前既強勁水簾，但係當水流打起身上面就完全透唔到氣啦！





過後澗道再急速上陡，有一瀑崖要攀，就咁睇埋去真係唔容易上，反而沿水流上仲更加好行
以為攀完，但之後更過份咁出現一道直瀑，點睇都摸唔透上攀路線，好彩瀑右有山路避險
繞過山路，依然都係瀑布，右路為正路，有繩set起到，但左路唔用繩上好似仲易上
過後澗勢稍為放緩，平坦左幾步，又攀過，再上就係飛猿峽，好直好誇張又好精彩既小峽
瀑布從峽中飛瀉，極有氣勢，之後起瀑右上攀飛猿崖，係全日最難位，手腳位麻麻，十分恐怖
中段有繩但都唔易上，到近崖頂位手腳位更差，抱石勉強而上，再加背後懸空感極強，真係怯左怯
好彩有張家輝撐住我！









企起飛猿崖頂，真係好開揚，原來自己不經不覺已經上左好高
回望後面成個荃灣望晒，崖後就繼續瀑接瀑，而且到相思林徑出澗位之前依然都係瀑流不絕
精彩位好似唔識停咁，到最後接返林徑，其實上面仲有個「第３段」，眼見面前依然流水淙淙
實在唔想停想繼續上，不過大隊原本計劃起呢到出澗就照跟啦，橫移相思林徑落川龍，因為自己未行過
途中見到個大石塔都唔知佢就係小丑石，要之後搵開揚位遠影埋去，之後出返大路就行捷徑直落川龍走人
大圓石澗，咁就玩一日啦！






後記：
九大石澗又分成新九大同舊九大，如果以完成九大既目標黎玩，自己似乎都玩得太慢啦
冇辦法啦，香港靚景真係多得驚人，唯有慢慢完成佢啦^^

ＴＨＸ　ＦＯＲ　ＲＥＡＤＩＮＧ ．

以下係本人於ＡＭ７３０的專題介紹，獻醜了

香港境內最廣闊的石林 鹿巢石林(27-6-2014)
輕攀樂遊白芒石澗(11-7-2014)