警告：帶有危險性．遠足安全最重要！以下遊記只屬分享性質．新手勿試！
>>>>今次路線起壞機入面，乜都冇了>>>>
＞＞＞＞更多圖片＜＜＜＜
>>>>更詳盡的遊記在此<<<<

---

尊貴會員獨享．田尾坑精華遊.....=.="

歡迎獨自光臨今次既田尾坑精華遊，行者請預備寶礦力一支，同名貴智能手機一部！

唉，笑並唔係咁講的！ 今次玩呢條田尾坑，真係多災多難，先係起步到西灣路時遇上百年一遇既雷雨，再起田尾坑手多又手臭地拎電話出黎掉落水，短短兩秒，只能對手機說聲Ｒｉｐ，成為多年行山以黎最貴既一次行程．．．


田尾坑，源起於大枕蓋同田尾山之間，澗末流入萬宜水庫，而西灣路車路至萬宜水庫一段為此澗精華所在，澗途非常短，但瀑景就十分精彩，瀑高潭深，甚有大澗風範。

今次就因為下晝約左朋友，所以又只能搵ｄ短澗輕鬆一下，田尾坑上次冇行到，時間唔多既今日當然係首選！ 避完雨後，沿西灣路車路前進，留意天橋，第一條天橋下都有一澗，但田尾坑起第二條天橋下，直接起天橋邊落澗，一般石澗路線都係上溯，而今次比較特別既係要沿澗而降，好快就已經有一潭一瀑，呢到就係放翠瀑，影一影，望一望，仍見雷聲此起彼落，都係快快手搞掂條小澗比較好！






之後走過一坑峽後，景色又再次開揚返，而前面就係一幅高崖，呢到就係丹壁雙瀑，沿左邊山路下降到第一層瀑底，再沿瀑邊下降到第二層瀑底，丹壁雙瀑係要兩條瀑布一齊睇先係最靚，當然獨立黎睇，澎湃既瀑流都非常出色，繼續下降都仲有會幾條流瀑同大潭可以欣賞一下，好快就已經望到萬宜水庫啦，直奔到萬宜水庫邊又係第一次，原來不論高處定係塘邊，萬宜一樣都係咁吸引人既目光， 精華段玩完就要沿澗上返去，可以再一次欣賞一下沿途景色，返返黎丹壁雙瀑，景色實在係太靚啦，好想起手機都留返一兩張，點知呢一下就出現完美跳水，難度分3.6，凌空翻騰都唔知幾多圈，評判一致舉牌10分 ，手機用唔夠一年就正式「入水為安」，既然已成事實，傷心都冇用啦，走返去天橋位出澗鬆人，個人就輕鬆閒遊，荷包就一ｄ都唔輕鬆了。















後記：
之後搵朋友，原本出街就變成去維修中心，一句底板ＢＢＱ後再索價近千五大元，救舊機不如都係換新機（藉口！一定係藉口！！！ ）
最終選擇．防水電話之必要！

ＴＨＸ　ＦＯＲ　ＲＥＡＤＩＮＧ ．