[Austria] When a postman delivers letter, does he celebrate?

標題句子出自球員巴洛迪利之口。郵差叔叔，有冇諗過除左派信，仲要運客？(你估玩simutrans咩？)

Postbus，唔係一間公司，而係一個制度。由於歐洲有唔少偏遠山區，市民一般都有車，但又唔係個個識楂車，所以要巴士服務，條數維唔倒本，咁點算呢？於是就產生左Postbus呢樣野，由郵政機構經營，派信兼運客，確保唔會蝕本之餘，亦唔會產生天價車費，一舉兩得。

奧地利既postbus系統，根據網上資料顯示早於1907年已經出現，ÖBB-Postbus GmbH現時亦係全奧最大既巴士公司，由Austrian Federal Railways (ÖBB)營運。ÖBB為奧地利最大鐵路公司，例如ICE列車就係由佢營運。

Postbus定線非常之流水化，基本上途經每個鎮都會入去兜一兜，打個比喻，由大美督出番大埔墟，會剷上教院轉個圈，之後再入大埔工業邨轉多個圈，之後先再到富善咁。慶幸既係歐洲人口密度唔高，就算咁兜法都唔會增加太多行車時間，因為好多時都係冇客飛站(除左特定要定點開出既中途站)。至於班次，一小時一班係正常，半小時以內一班已經係好密既事 :lol:

如果大家睇到呢度覺得postbus今時今日仲係用殘車跑窮鄉僻壤既話，咁就大錯特錯。
小弟今次旅程要前往一個名為Hallstatt既小鎮，小成點？朋友描述該鎮只有一條街，大約由觀塘行到九龍灣咁長倒，前文提及Salzburg地區有唔少產鹽地方，而呢d地方因為地殼變動而形成大大小小既湖泊，同遠處冰山融為一體成為一個個風光如畫既小鎮。

由Salzburg前往Hallstatt有兩種方法，一係火車加船，一係全巴士，而巴士服務就全程係Postbus。
講左咁耐即係點呢？首先由Salzburg坐150去一個叫 Bad Ischl 既車站，轉乘542係 Gosaumühle 轉車站(湖邊爛地轉車站)再轉543前往 Hallstatt Lahn (總站為Obertraun)

先講150，全線派車為MB O550 Integro三軸單層

150就影唔倒，用張120頂住先。由Salzburg開出既路線多數以Salzburg Hbf作為總站。
呢款長到咩咁既車，有尾軸輔助轉向，跑山區尚算輕鬆。波箱為ZF出品，係小弟咁多日行程坐過唯一一款ZF波箱既巴士。缺點嘛？就係行李艙太細，全車三分一人有行李係身已經滿位。

坐左近兩小時，到達Bad Ischl，一個連閘機都冇既火車站。話說奧地利有幾個地區都係用個Bad字開頭 :lol: