珍寶巴士外表雖然好睇, 但我自己覺得一D都唔好坐, 又慢又焗, 高頻既引擎聲音好惡頂, 停車果陣仲發冷震.
大家又可唔可以分享一下坐珍寶巴士既感覺?

小弟講少少當開場,引各位巴絲繼續講落去。

(01) Metal Section 寶(九巴/中巴)
車廂燈光係各種車身0既珍寶當中
最暗0既一款(根本同中巴0既佳牌亞拉伯一樣:
除0左幾盞蓮花燈之外...
仲有街燈0既光照入0黎...(行郊區線就出事啦))
此外,3+2座位「坐唔得幾舒服」(同2+2批二手倫敦寶比較)
對第一代0既珍寶巴士而言,Metal Section車身
只不過將各款前置巴士車廂0既環境「照搬過去」
[想睇一下車廂個樣,不妨搵<鬼巴士>部「97號」(虛構)睇睇(You Tube有節錄)...
皮座墊加皮椅背...70年代咁0既服務,
比當時0既電車張木櫈好少少...90年代應該當Out-dated裝備就算啦...]

(02) 二手倫敦寶(各大公司)
可能係前一手0既倫敦運輸局要求嚴格關係...
二手DMS珍寶「洽到好處地」採用2+2座位
Park Royal同MCW車身0既車窗亦比起其他同車型0既珍寶較大
(相反0既BACo寶就真係「一景難求」...非常明顯0既對比)
而且車廂燈光方面...雖未至於全光管、連續式0既「光猛」
不過,好過MS車身0既蓮花燈...[下刪幾句:盂蘭節仲未過...]
或者因為比其他車身版本0既珍寶「坐感」更好0既關係:
城巴、地鐵、雅高當年都寧可要倫敦寶...
而唔係另外砌過架一手0既珍寶
[車身比底盤貴作怪?應該係趕住打仗先要二手車0者...]
而中巴搵倫敦寶改豪華版0既FC1...
都可以反映呢批「火柴盒」比手上批一手珍寶,
有「更上一層樓」0既舒適...
[當然,冷氣仍然仲係奢侈品0既年代,有架通風度高0既熱狗
可以吹風入去熱辣辣0既車廂內...已經算有交待...]

(03) 中巴0既亞記寶
一洗珍寶「古董」味道0既亞歷山大CB型「中巴百搭」車身
雖然依舊3+2座位設計,不過MS珍寶0個陣「鐵皮『徐』」
因為用0左防火膠板而消失...
而晌MS珍寶(長陣版)中間0既細梗窗移到車尾之後,
加埋白、淺藍為主調0既車廂色彩...
感覺上無咁熱先啦...
不過,雖則照明系統用0左倫敦寶0既光管燈箱...
可能係車身比倫敦寶矮少少0既緣故:總唔及倫敦寶0既「光猛」...
(反而上0左雞車[LV]、鴨車[DS]身上就剛剛好...)
整體而言,中巴呢批一手珍寶已經好過Metal Section車身...唔少
但係同倫敦寶比較,車廂環境就爭0左些少...

(04) BACo寶(九巴)
相信平頂寶唔好坐0既巴絲,應該十中有八九...
高到只有成年人先可以平視窗外0既車窗
整喊過幾多想睇風景0既小朋友...
小弟都唔敢估幾多巴絲「小時中伏」了
另外,下層「無橫位」座位編排:加劇擠雍感...
(44座加18個企位...想像得到迫到乜0野地步...)
而上層「監倉」式0既半封閉式車廂
無風量睇、望唔真上層「仲有幾多位」已經講過
更慘0既係通風方面,比MS珍寶更差(窗位細,令到自然進風效果下降...)
硬膠板椅背座椅(初期版本,蘋果綠色內籠年代)...
同渡輪0既座椅比較...又多一份侷促感...
總之,九巴「討厭」珍寶,可能都係同批BACo珍寶「出事」有關...
[好在,九巴最後唔落第四批珍寶訂單...
而走0左去買雞車...
否則以九巴當年0既買車經驗0黎講:乘客繼續俾錢買難受...]

珍寶巴士未必如各位想像中0既好坐:
(01) 巴士的波箱、風油軚設定...(全自動波箱版珍寶「Chok到暈」:
連中巴試過都改返用「打波子」半自動波箱...)
(02) 車身設計、配置的差別
[個人0既排序,最好0既排先:倫敦寶>CB寶>MS寶>BACo寶]
(03) 巴士公司對呢款巴士0既重視程度...
[唔計地鐵、城巴、雅高呢批新加入市場0既公司,
九巴將珍寶當成長牛0既後置引擎版使用,
考慮乘客0既舒適度方面不足...
而中巴極力維持巴士晌「可以營運」0既狀態:
結果不自覺地將珍寶繼續到1998年專利權完結之後,
小新公司仲要借助SF(短珍寶)去行山頂線...
呢個對巴士本身0既重視,
亦都導致中巴珍寶(包括二手倫敦寶)可以服役20年以上,
當然:20年後0既時速70公里
已經唔係同20年前0既一樣咁「先進」...]

最後,總結一句:
珍寶晌當年0既巴士營運層面而言:係一個試驗性0既失敗
[往後一大堆勝利二型、丹尼士祖比倫「通街走」
就知道當時後置引擎巴士晌香港...
遇到0既問題,可能比起九巴買錯薛頓Pennine 4損手一役更嚴重...]
不過,亦都係因為呢個失敗,丹尼士公司研製0既「Dominator」(巨龍、禿鷹0既始祖)、
利蘭研製0既「奧林比安」B45系列...等等,先可以晌「巴士冷氣化」0既1990年代
搶回不少往日失敗而失去0既形象分...

一、圓頂寶@九巴40
最記得那些蓮花燈，以及巴士駛經葵涌道時發出的高頻聲音。

二、平頂寶@九巴11
在上層要站起來才能看街景！

三、倫敦寶@九巴7
最記得車身標語「超載屬違例，乘客請合作」。

其實中巴珍寶同九巴珍寶個tune係咪有分別?
中巴珍寶都好行得下斜路, 薄扶林線91, 94X好多時都用珍寶, 山頂線更加係珍寶巴士天下.

回樓上:
九巴批珍寶無裝風油軑,惡渣到連車長都怕怕...
結果當年客量稀少0既路線先會掛佢地行...
(沙田區0既80K可是小弟少時[10歲左右...|||]中招0既路線...)
而中巴0既珍寶方面...
一手、二手巴士都有風油軑0既標準配備
相對於九巴批車長「出盡飲奶力先扭到軑」而言...
中巴0既車長就輕鬆好多啦...

此外,中巴0既山頂號係仲有一批SD(Dominator,短陣矮身版本)
一共6架行15號上山頂...而SF只係輔助、客串0既角色居多
(不過,當中巴缺尾牙零件,而放棄整呢6兄弟之時...
短珍寶先由副二位置「扶正」:行到小新公司批矮躉到香港為止...)

最記得細個經常坐行110既LF,
師父一路上都波波盡咁行
坐既感覺好爽, 感覺上唔比而家既新車慢

仲有一部行20既自動波LF
呢部就記得轉波既時間比其它用半自動波箱既會耐少少
同波柴好似

不過最可惜係香港一部圓頂寶都無留
真係好可惜呢