(麻帆良市時報記者高坂 穂乃果報導)
自 1960 年代起, 九巴嘅單層巴士車隊,
都係以英國嘅 "亞比安" Albion 車廠出品嘅巴士車款為主,
以服務客量較少或者雙層巴士唔能夠行走嘅地區。
隨住市區某部份新型公共屋邨落成入伙,
但係呢啲地區基於地理環境限制無法使用雙層巴士行走,
九巴於是喺 1970 引入比原先購入嘅 Victor 系列載客量更高嘅新巴士 --
Albion Viking EVK41XL, 作為行走呢啲地區嘅主力車款,
佢地擁有達 35 呎 (約 10.6m) 長嘅車身, 可載達 80 多名乘客,
已經十分接近一架短陣雙層巴士, 例如九巴嘅 Daimler A, B 型等巴士嘅載客量。
呢批巴士使用 Leyland E0.401 引擎, 連接 GB277 5前速手動波箱,
並且由 Metal Section 提供車身, 前尖後圓嘅車身設計,
加上佢地修長嘅車身線條, 令佢地得到 "火箭" 嘅綽號。
佢地投入服務初期係行走東九龍路線嘅主力車種,
服務藍田、高超道同慈雲山等位於高地嘅公共屋邨居民,
後來亦被調派往新界區繼續服務。由於佢地嘅特長車身,
為左要方便行走新界部份道路, 例如林錦公路呢啲路窄嘅高山路段,
部份巴士亦被截短車尾部份車身整整一隻車窗嘅長度。
九巴原本打算引入 150 架同款巴士, 但係因為廠方唔能夠如期交貨,
最後只能以 50 架新車完成交易, 至於餘下嘅 100 架新車訂單,
最後落入另一間車廠 -- Seddon 嘅 Pennine 4 型手上,
但係呢批車喺香港問題多多, 仲成日無故自焚, 令九巴大感頭痛,
最後喺九巴車隊服役只有十個年頭至 1980 年全數退役,
相比之下, Albion Viking EVK41XL 型巴士喺九巴服役嘅時間,
比 Seddon Pennine 4 型巴士仲要長得多, 最後喺九巴服役嘅Albion Viking EVK41XL 型巴士,
一直到 1990 年先至正式功成身退, 一共服務左九巴達廿年寒暑。
今日, 麻帆良市正式歡迎九巴 Albion Viking EVK41XL 型巴士登場!!
呢款被車長戲稱為 "火箭" 嘅維京型巴士,
市長 Super Bus 話雖然冇乜印象有冇坐過佢地,
但係卻對佢地印象尤深, 原因就係因為佢地修長嘅車身,
同埋行車時同勝利二型不遑多讓, 震耳欲聾嘅引擎聲,
佢最有印象嘅係喺小學果陣, 大概係 1985, 86 年果陣,
有一次返學, 見到有一架 "火箭" 行 15 號喺馬頭圍道掠過,
呢個情景令當時 Super Bus 有少少驚訝,
皆因當時 15 號已經差唔多全部用哂雙層車,
果一日竟然見到仲有單層巴士客串, 對 Super Bus 嚟講,
以依家嘅巴士迷術語稱之, 已經算係特見啦,
同埋去元朗見到呢啲上奶黃下紅嘅單層巴士, 都會有一種講不出嘅特別,
或者係因為喺當時嚟講, 九巴嘅車隊之中, 雙層巴士已經佔最大多數,
而且亦全部配上紅頂紅裙腳嘅九巴車身色,
單層巴士可以話係少數民族, 而且亦只有呢啲巴士仲沿用上奶黄下紅嘅舊車身色,
而呢啲單層巴士喺當時更加開始買少見少,
亦令到每次 Super Bus 見到佢地出現, 都會禁不住要望多幾眼。
Super Bus 仲話, 雖然九巴後來引入嘅三菱, Dart 仔同長矛等巴士車款,
又係單層車款, 而且又有冷氣, 坐得仲舒服,
但係亞比安呢款啲舊款巴士嘅獨有個性, 係依家任何一款新款單層巴士都比唔到嘅!
今日呢兩架亞比安維京 "火箭", 正為大家返回 1970 年代,
亞比安維京喺香港嘅一段光輝歲月同那些年嘅回憶!
隆重歡迎! 九巴 Albion Viking EVK41XL 型巴士, 見參!!
今日中巴大雞同時到埗, 見另文:
t689613.htm
新落地版行 40, 兹證明只出 250 架, 此為第 110 架
奶黃色車頭版行 17, 兹證明只出 250 架, 此為第 106 架
正式落地!!
新落地版, AR7716 後來被編號為 L235
司機位門亦可以趟開
奶黃色車頭版, 係作為一人控制, 上車入錢嘅識別
引擎喺正司機位隔離, 司機揸車熱到嗌哂救命, 都係開住度門揸車先至夠爽!
同 Seddon Pennine 4 合照,
Seddon Pennine 4 外表比火箭討好, 可惜中看不中用,
仲為九巴帶來眾多麻煩, 相反火箭外貌實而不華,
比 Seddon 更可靠耐用, 一直到 1990 年先至正式光榮引退
九巴亞比安家族
本文其中主角之一, AR7701 (L226)
猴年將至, 喺度借此機會講句: 恭喜發財!!
Thanks for reading~
