見simutrans區咁靜，開研究post刺激吓人流先

前言
受制於simutrans技術所限，車輛唔識切線，一格路只能夠雙線雙程或者單線單程，大大限制咗玩家設計道路同埋城市。
以我個城為例，大部份道路都係單格。因為以雙向來講，單格路已經可以提供雙線雙程；反而雙格路為免交通混亂會用兩條唔同方向嘅單程路來整，同單格路一樣係雙線雙程，除咗佔地多咗之外無咩分別。

透過兩條單格嘅單程路去達致兩條線，喺高流量高速公路的確可以增加流量，但係去到城市多站嘅地方應用上會有困難：
一係喺路中間停 頂住後面啲車，如果同一條路有飛站快速線真係多得佢唔少；

一係透過巴士站灣去停站，巴士可以駛入去停車，避免塞住後面，但係如果個站灣經常無車停嘅話就嘥咗幾格位，尤其係好似CBD呢啲塞車得來又無位嘅地方。


因此我今日下晝就基於simutrans嘅限制，研究點樣令到巴士可以cut去慢線停站之餘可以用來做行車線，用盡晒來回四條線。
希望呢個設計可以應用喺高車流量、多客又可以用納多格道路嘅地方。

設計及實驗
實際運行畫面

上下都係同一樣野，不過下面長啲

平面圖


有四條路兩個方向，每兩條路一個方向，有車站嗰邊模擬慢線/左線，左線每三格就有兩格T字路口，先出後入，目的係等巴士可以切線埋站同出站，同時亦都可以keep住行左線。
兩格T字路口就好似上面張圖咁，先整成U字巴士站灣，再係出同入口加No Entry同One Way Sign，最後將佢哋連埋，避免有車逆走引致gridlock。

講吓個實驗係點做啦，首先我買咗40架車，紅色黃色金色白色各10架每四個站埋一次。
實驗目標係架車可以切線埋站，埋站後識cut返出快線，同時比巴士切線嘅兩格T字路口唔會做成混亂塞到成個圈死晒。

以下就係實驗結果：


紅色嘅路線無咩特別，識切線出入站幾好。


黃色有少少新發現。圖中可以見到兩邊左線中間都係無巴士站，依我觀察黃色嘅車會視乎左右線嘅情況而選擇喺邊個T字路口cut線，好似上圖咁。

金色同紅色差唔多，無咩特別


白色嘅路線最得意。初頭白色呢組嘅車傾向長期行左線，我估因為站位出口問題。
後尾(打打吓呢篇文嘅時候)發現白色嘅車都會因為交通情況而一早cut去右線，好似上面張圖所畫咁。

總結
好喇做咗個實驗打咗咁大段野，等我總結吓有啲咩發現啦：
1) 透過咁起路口法，巴士係識切線埋同出站嘅
2) 巴士會因為站位、附近道路走法同埋交通情況而選擇行左/右線
3) 喺呢個實驗裡面，佢哋嘅路線多數好似上面咁最多得兩條，未知呢種設計應用喺更長、更多車嘅路段會唔會有其他嘅變化


唔知大家點睇？如果唔明可以喺下面交流吓，因為好似講得1999。

你話係咪驚天大發現又唔係，不過終於諗得掂點樣可以令到四線雙向嘅路段可以停站同時唔會塞住其他車～

我暫時都無市區重建或者起新區嘅計劃，所以呢種電車路/大馬路式嘅道路設計短期內應該唔會用。
大家可以諗吓點樣將呢種設計融入城市裡面，係就係怪相啲，但係起碼可以實現到4線/6線雙向。路口設計都有少少idea，遲啲再update。

市區入面用雙線都嫌多[sosad]
起得四/六線寧願搞分流

其實在巴士路線上set 返途徑點，到指定位置先入慢線埋站會唔會簡單d?
如果按上圖既整法要利用到既空格都唔少.........

同埋有一個問題不知道大家有無遇過，就係舊save入面的巴士路線上如果有空白途徑點，
在更新主程式後，當巴士下個停止位置是空白途徑點，就會變成「尋找路線中」塞死左
(但更新程式後新開設的路線沒有問題的)

題外話:有無人諗過可以透過修改simuconf 等等既文件去達致想要的效果?(例如幾時cut線，因應交通狀況去改路等)

本來諗住拍埋片先一次過回，但係搞來搞去個fraps都有問題，襯個post未鎖推一推先

花果山美侯王 on 2017年2月15日 03:51:03: 市區入面用雙線都嫌多[sosad]
起得四/六線寧願搞分流

有位不妨起，喺市區望住多線塞車慢溜真係幾正，
配合埋choose sign仲可以整到架車見到有站位就cut入去停，幾得意

K . C on 2017年2月15日 19:24:39: 其實在巴士路線上set 返途徑點，到指定位置先入慢線埋站會唔會簡單d?
如果按上圖既整法要利用到既空格都唔少.........

K . C on 2017年2月15日 19:24:39:
題外話:有無人諗過可以透過修改simuconf 等等既文件去達致想要的效果?(例如幾時cut線，因應交通狀況去改路等)

唔需要set途經點，佢哋識自動cut線，呢個適合啲大站超過十條線嘅轉車站用，可惜我個save兩年前已經改以鐵路為本，無晒呢啲大站
至於改file呢啲咁高難度嘅動作，真係留待其他師兄發掘
不過以我所知simutrans啲車識揀路行

K . C on 2017年2月15日 19:24:39: 同埋有一個問題不知道大家有無遇過，就係舊save入面的巴士路線上如果有空白途徑點，
在更新主程式後，當巴士下個停止位置是空白途徑點，就會變成「尋找路線中」塞死左
(但更新程式後新開設的路線沒有問題的)

我又未試過喎，會唔會係你喺版本大update嗰陣升級(e.g. 101.0>102.0/110.0)
反而「尋找路線中」呢個錯誤成日都喺路線運行期間改線發生。

當你本身架車停/經A點，你打算刪除A點改停B點，如果有車個行程去緊A點嘅話，佢會變咗changing schedule。。。除咗賣車無其他辦法

初頭斬腳趾避沙蟲開條新線取代，但係如果你條線超過100部車，逐架轉線都幾麻煩，所以除非係大改走線，如果只係改個別站位/途經點，我會用下面嘅方法。

就係喺嗰條線嘅行程表原有站位 前/後 加 站/途經點，視乎情況，如果新站喺舊站之前，就係路線表道insert新站喺舊站前面，若干架車之後啲車就會開始停新站，呢個時候就喺新站噤停架車開schedule，然後喺路線表刪除舊站，跟住睇吓比你噤停嗰架車會唔會變咗無schedule，有就ok，無就set返原本行緊嗰條線，之後就大功告成，站位搬咗同時無車死火

如果嗰新站喺舊站之後，就喺舊站嘅上一個站噤停架車，方法一樣，改完線至放架車走就唔會有error。

利申用緊110.0上唔到120.3