本來在下有踩單車嘅, 直至去年十月尾我買左一架電動滑板車之後,
(其實 2017 年已經入過一架, 不過果架用左兩個月摩打著唔到報銷, 冇計, 三百幾蚊美金貨仔...)
因為佢摺合方便, 拎入屋叉電都得 開始比佢嘅方便所吸引, 亦開始踩少左單車,
到今年七月, 再入一架續航力更強, 可達 60 英哩, 大約 95 公哩嘅大車
(因為佢橙色車身所以我叫佢 "大橙", 細車亦可以行到約 20 英哩, 即係大約 32 公哩),
從此踩單車就少左好多, 本來電動滑板車方便可以四圍去係無庸置疑嘅,
但係踩得多就發覺自己人懶左, 唔係咁多想郁腳,
但係我亦都會 Keep 住踩下單車, 始終人點都要做運動郁下,
不過幾時會踩下就要睇下自己心情啦, 有人可能會問:
點解唔買電動單車? 其實我都有諗過, 不過在下亦都有坐巴士
(但係買左架 "大橙" 之後, 加上依家返工近, 已經冇乜點坐),
呢度嘅巴士車頭都有單車架, 可以搭載二或者三架單車,
但係如果車頭已經放滿單車就要等下一班啦,
而且電動單車亦有一定重量, 托上托落亦有一定嘅不便,
加上電動滑板車摺起後可以直接帶上巴士 ("大橙" 都可以, 不過比較重同大架冇咁方便,
不過果架主要行長途, 巴士都唔洗坐), 比單車更方便
另外我亦知香港係唔比踩電動嘅單車同滑板車,
事實上依家市面上可以揾到嘅電動滑板車, 有少數可以去到 40-50mph,
真係可以去到一架車咁快, 不過相比揸四輪車甚至電單車,
呢啲小型車開到咁快著實太危險, 所以為左安全,
喺美國呢度不同嘅州份都有有呢啲車設有車速限制, 一般為 15mph,
而我嘅兩架車最高車速都去到 25mph, 不過我都鎖左去 20 就算,
平時踩亦會睇咪錶做人, 去到 15 就即收油,
依家喺街見到嘅 Rideshare 電動車, 更有 GPS 地區定位,
一去到一啲特定車速更低嘅地方就會自動鎖速,
不過講到底, 同揸車或者踩單車一樣,
踩電動滑板車安全與否, 都要睇駕駛人嘅個人態度,
所以我覺得香港唔比踩電動嘅單車同滑板車其實都幾無謂
不過踩呢啲車, 最重要都係戴番個頭盔~
