香港巴士論壇

忙左一排又出黎貼下相，貼返部已被好多人遺忘既 E200
下面既相係相機同電話劣影再執過晒，請洗眼


幾個月前搭火車路經倫敦南部市郊 Buses Excetera 公司其中一間分廠
位於 Merstham 火車站隔離



最近鏡頭有部圓碌碌 B7L，當係追返前日中秋節應下節



特登走黎搵 ETC Bus 間廠，重點當然係廠門口個部原裝正版 Enviro 200，
E200 底盤連車身最少生產左 4 架，一架從無出牌，披著自家 Hybrid 色彩，俾 ADL 保留緊
其餘三架去過唔同地區服役之後，輾轉加入晒 ETC Bus 公司



正路閒日 E200 應該係隔離 town 做緊生意，但聽講已經有一部退左役，就去廠碰下運氣睇下見唔見到拆開既 E200
見唔到傳聞已退既 S13，但見 S40 完整無缺停係廠門口



原裝 E200 車身比較四方，唔知係咪源自 Plaxton (或者 Northern Counties) 個邊既設計喇
A 柱同擋風玻璃個樣有少少向中間方向收窄，有少少 Optare Solo 既影子



Enviro 200 車頭左中右三截組件線條連貫，唔知係咪就係二代 E300/500 個笑樣 bumper 設計來源
原裝設計兩邊隻窗仔線條係彎向 bumper 組件，新頭幅唔再向中間收窄，個尖咀亦改左向後，無晒舊版個種霸氣



英國司機批評 E200 盲點特多，舊版唔知會好少少定係差唔多呢



車上唔難搵到 Transbus 標誌，E200 經歷 Transbus 至 ADL，曾被寄予厚望，當然都會有西瓜波水牌




E200 原本設計個鏡臂好似香港個堆咁樣伸出黎，但英國好多公司改左做鏡仔同埋屈返埋車身度貼著前門



車門地台上教人前門上後門落既箭咀標語重係度



如果 Bus Lists on the web 資料無錯，其實底盤編號 102-105 四架 E200/H 好似各有不同
唔知係咪原本打算試驗唔同長度/車身/動力配搭喇

以鐵牌型號計，E200 Dart 鐵牌一路都係寫 Dart 4，呢幾部先係正版 E200，
原來原裝 E200 設計最高負重係 13 噸幾，比 E200 Dart 多左大半噸
不過標示出黎都係用返 11 噸半咁上下，同 Dart/B6 差唔多



聽過一個講法，英國巴士司機鍾意同上車乘客保持同一視線水平，
心理上雙方係平起平坐咁既效果，可能因此英式巴士司機位通常都特別高

27 座 43 企，E200 份宣傳單張話比起傳統單層巴士載多 25% 人，部車係 10.4 米長



車入面既黃箭咀一路伸延到車尾；座椅用色似似地倫敦其中一間巴士公司，好似係 London General
前排係圖書館揭返巴士書介紹 E200 部分，先知原來 Enviro 其中一項新嘗試係無凳腳座椅
由拍攝到執相都無為意凳底好似爭咁隻腳



車尾騰空左，自然要搵車廂位置擺油缸，只係估唔到中型巴士油缸咁細，兩條友已經坐著晒個油缸



車外輪椅板掣唔知有無廢到，路線牌一早換左橙牌



ETC 三架 E200 都貼錯貼紙，全車總負載都只係 11 噸半，佢貼著淨重 12 噸
只可惜網上同巴士書所有搵到既 E200 相都睇唔清淨重數字
只知道其中一部係 8 噸幾，睇落合理得多，Dart/B6 都係差唔多



尾軸上既假凳向下斜，前面無遮無掩，不過潛在危險應該唔大
坐個度應該辛苦到全程車唔會訓得著/低頭睇到書望到手機



繼續西瓜波標誌；唔係太熟英國巴士營運方式，Surrey County Council 標誌唔知代表咩呢
係咪通常一個 town 既巴士都有呢類市政局角色資助/協調各間巴士公司同埋路線網絡？
只知通常英國大學會資助當地巴士公司兜入校園既其中一條巴士線，提供優惠價甚至通宵服務



車尾位坐入面個位乘客膊頭相信都會頂著窗框個角，感覺唔荒好受
尾排乘客身後個堆機件都幾袖珍，唔多影響天然光傳入車廂



唔係太明白整兩塊墊既用意何在，即使係預料短途乘客會企係落車門側
應該都唔會兩條友齊齊整整面向車頭咁樣立正企好，但同時又阻著半邊落車門掛



牌箱組件同個蓋都特別大，食左車尾窗上半部分，似乎重收藏著其他機件



事後先知原來無影過門位，走廊地板引導乘客去後門落車既箭咀頭都只係影到一張



車尾四四方方，相當有型



E200 其中一項大膽設計就係呢個 Enviro pack，將熱氣同廢氣引導至車頂先排放出黎
原來 E200 都係孖喉，唔知同香港既孖喉蠆係咪同一原理呢



機件係晒右邊，右邊尾軸周圍既組件比左邊闊，
兩邊尾軸配上肥仔軑後，可以騰空走廊空間
司機位後面塊玻璃既處理方式同 Plaxton Dart 幾似，遠望都係透光既



個 enviro pack 放係車尾上方，而尾轆又大大個，都幾怪相



車尾好似墜左落去，唔知係咪為左遷就落車門，尾跨個位唔可以整得太斜，部車睇落好似求其上條斜都已經會挖底咁



左邊尾轆位放腳位同右邊一樣咁少，爭在無緣嘗試睇下 E200 定 Plaxton/E200 Dart 頂腳 d
自己搭英國 Dart 坐左邊低地台位，根本連膝頭都伸唔到入去，香港個 d 頂腳車真係小兒科



輪椅背板比較畢直，重有一碌黃色鐵杆手柄俾輪椅人士用，早期 E200 都保留呢碌黃色杆



右前軸後面既入油位



軑盤有埋 Dennis 標誌，一部車竟然儲齊三代牌子名



聽講 Voith DV500 波箱運作起上黎似 Allison，可惜一路搵唔到資料
係司機位隔離望左好耐先見到波掣盒，原來都係黑色掣，裝係右邊控制台同凳之間
紅色個位唔知係咪司機遇襲警報掣呢，記得有司機批評過 ADL 車竟然將個緊急掣裝係司機膝頭位隔離
郁下就撞響個警報，自己嚇自己，相信亦包含呢堆 Transbus 型號



以前下載落既 E200H specs sheet，睇落個原理似係 series hybrid，
GX56BKZ/S12ETC 車頂都有一餅野，但上網摷過行車片段，似乎又唔似係混能，唔知係咪已停用或者其實係裝假狗喇

E200/H 尺寸同後尾既 E200 Dart 唔同，唔怪得話 10.4 米載 70 人
細心睇車窗長度/柱位同 E200 Dart 唔同，軸距較接近 10.8 米版 E200 Dart

唔係太熟機件野，E200/H 車軸名稱聽落幾生面口，聽講 S13ETC 就係搵唔到尾軸零件而退役
另外原來 optional 設備有降低車頭/車尾揀，聽落都幾新奇，唔知 S40ETC 係咪降車尾降過龍呢




ADL 接手後，似乎曾經想發大 Enviro 200 黎玩，以往官網都有介紹單張可以下載




左邊個部泊街車，同右邊個部相信係由 E200/H 改圖而成既紫色內籠唔同
左邊個部擋風玻璃仍然貼著 ADL 內部使用既怪獸車編號 SD41，上次 4 月去 Dennis 廠已經見 SD41 編號轉左落去一部白色歐六 E20D 度
ADL 保留著 SD37，最終有出牌既 GX56BKY/S13ETC 同 GX56BKZ/S12ETC 就係 SD38 同 SD40



一路都無 SD37 既消息，只知前年曾經出席一個公開活動，但去過 Alexander/Dennis 廠都唔見
宣傳單張上既 SD41 如無意外就係本文主角 SN54GRU/S40ETC，亦係最多故事既一部車，
此車先後係倫敦同埋 Stagecoach Devon 地頭俾巴士公司試用，相信曾經同唔少前香港巴士擦身而過
後者亦係過去三年自己住過既地方，望著呢架同自己先後係同一地方生活過既車，感覺相當奇妙


當日 E200 行過既路線，而家已經大規模用緊 Transbus/ADL 既單層產品，
由創新既 E200 變成回歸傳統既 E200 Dart，一款車撐起成間廠，對 ADL 黎講總算放下心頭大石，
巴士公司亦樂於見到 Dart 既後繼產品，延續英國中型巴士神話，
但對用家黎講，對 E200 Dart 既評價就係另一個極端
外銷版數量有限，觀感尚可，至於英國本土版，若以 "毀譽參半" 形容，已經算係講得非常客氣


不過點都好，Enviro 200 最初既銷售對象就係倫敦
而 E200 演化過程中，有唔少新元素都係倫敦同埋倫敦周邊地區作為首批測試對象
Enviro 200 MMC 既動力配搭，過去半年亦已經係倫敦同埋周邊地區測試緊，
睇下下次得唔得閒剪片或者整理好 d 行車錄音再講，不過話唔定到時 E200 MMC 已經正式發佈

_________________
1344 HV4841 | 9037 HW8373 | 32103 MIG4760 | KX07HDJ

_________________
此乃系統自動輸出之板務信息，恕不接受讚好。

睇下睇下先發現
第一代E200個設計同北美依邊既NABI既其中一隻車頭「新」設計好似

咦我有冇影低呢...搵搵先

_________________
大學生 ...

6215 on 2014年9月12日 05:24:00:睇下睇下先發現
第一代E200個設計同北美依邊既NABI既其中一隻車頭「新」設計好似

咦我有冇影低呢...搵搵先

係咪類似呢度入面 959 果架?
http://www.dukecityfix.com/group/abqbus ... oup%3A8287

_________________
Welcome to our Doki Doki Literature Club!

最jeng 都是果兩張太師椅xd
希望魚蛋灣和 新城NWS 可以買多D這款 E200 和Citaro 來代 NL262
ff ing

其實佢個設計雖然慳位，不過車門位於一頭一尾，萬一頂閘果陣中間啲人需要落車果時就真係自求多福啦…都係喺中間加返隻中門好啲。

這一種Enviro 200同我哋香港隻Enviro200有一些不同

論壇板務訊息

【警告】#15987　#lotsunho@hotmail.com p2846794.htm#p2846794 " 【論壇通用規則】 8.6 不得發表只帶有附和性質或只為表達情感的短小回應，或沒有附帶理據的簡短評語 違例者最高處分（第 8.1-8.8, 8.10 條）：每篇違規文章凍結戶口 30 天 " 感謝　閣下在本論壇發表文章，唯請留意以上規則，謝謝合作！ 如有疑問，歡迎與當值板務人員聯繫、在板務討論分板提出或電郵本壇。

_________________
Tigus

這架車系E200舊版和Facelift 合體版？同埋，點改個個wheel cover 和前輪的一模一樣。同埋 底盤都好低喔 。

SS390 on 2017年5月17日 21:39:57:這架車系E200舊版和Facelift 合體版？同埋，點改個個wheel cover 和前輪的一模一樣。同埋 底盤都好低喔 。

你所講嘅兩種車款其實原本係叫Enviro 200 Dart, 機械結構同Dart相近
而呢部係喺Enviro 200 Dart之前推出嘅車款, 設計上當然同Dart差好遠, 亦因為呢個嘅設計唔普及, 所以賣唔出同埋導致而家Enviro 200 (Dart)嘅出現

_________________
現在是少女時代
以後是少女時代
永遠是少女時代

第一次見識底盤可以咁低，上坡，會不會容易造成刮底呢？還有，wheel之上的座椅真係好不人性化。

底盤咁低

Nice photos of the prototype Enviro 200. I remember seeing this one at Showbus 2005 many year ago. This was the initial plan to make it a full flat floor from the front to the back but it was revised in 2006 with the engine at the back central mounted as the original design was undesirable for provincial operators. Therefore the bus was redesigned with revisions from 2006 to 2015 where the MMC replaced it.

Here is DE6/YX58DVH that was new in 2008 and taken at Hatton Cross near Heathrow in London.

多謝分享咁多相，又學唔少到嘢

多謝你分享咁多內龍相 呢隻車都幾型