(麻帆良市心跳巴士迷俱樂部會長 Monika 報導)
德國 MAN 猛獅出品嘅巴士產品喺九巴車隊中始終都係屬於少數民族,
九巴自 2000 年起首度引入 MAN 嘅巴士產品使用至今, 總數亦不足八十之數,
亦因為佢地數目之少, 每當佢地喺路上出現, 都會吸引到唔少巴士愛好者嘅目光。
九巴喺 2015 年起至今, 引入合共 29 架 MAN A95 雙層巴士,
A95 係 MAN 喺 2013 年以出口海外市場為導向嘅產品,
其設計源自主要供應德國本土市場嘅 A39 低地台三軸巴士,
而且根據唔同嘅動力配備, 而有唔同嘅成品命名,
其中九巴喺 2021 年引入, 為數 7 架嘅 MAN A95 雙層巴士,
亦係九巴最新一批引入嘅 MAN 巴士產品,
更係九巴首批使用 12.8m 長度設計嘅 MAN 雙層巴士,
當中型號分別為一架 ND363F, 其餘 6 架為 ND323F,
由型號嘅數字可知, 佢地引擎嘅馬力分別有 360 同 320 匹,
九巴喺為佢地安排車隊編號時, 亦以此作出區分,
ND363F 被編號為 M6EX1, 而其餘 6 架型號為 ND323F 嘅 A95 則被編號為 M6FX1-6。
呢批巴士同前批 21 架 A95 (AMNE1 同 AMNF1-20) 一樣,
使用由馬來西亞嘅 Gemilang 順豐客車 (彭順國際) 提供,
由 MAN 授權製作嘅 Lion's City DD 雙層巴士車身, 而且係 Facelift 版本嘅設計,
並且使用九巴嘅第三代 "城市脈搏" Heartbeat of the City 紅色塗裝,
已經成為九巴新車標準規格嘅玻璃幕牆樓梯, 亦喺呢批 A95 巴士上首次出現。
呢七架巴士喺去年七月起陸續投入服務,
與九巴一直以來引入嘅 MAN 巴士一椽, 呢批巴士亦被編入屯門廠管理,
主要活躍於行走來往屯門至九龍區嘅長途路線。
今日, 心跳巴士迷俱樂部隆重歡迎九巴 MAN A95 雙層巴士登場!
MAN 呢個德國商用車品牌相信好多人都一定唔會陌生,
但係喺一眾由 ADL 同 Volvo 出品嘅車款作主導嘅九巴車隊中,
MAN 嘅存在似乎顯得比較渺小, 不過亦因為佢地嘅少眾,
每當喺路上出現, 佢地嘅身影始終比九巴其他巴士顯得更加別樹一幟,
亦為九巴車隊中千篇一律嘅車輛款式帶來一點點綴。
今日到埗嘅呢兩架九巴 A95 巴士, 雖然機械規格各有唔同,
但係同樣配上帶有剛烈性格嘅車身線條, 令呢批九巴 MAN 巴士嘅型像呼之欲出,
再加上全紅色嘅 "城市脈搏" 車身塗裝, 更為呢批 "大猛男" 加添多一份辣味!
講到呢度, 我地亦急不及待一睹呢兩架九巴 "大猛男" 嘅真豐采!
隆重歡迎! 九巴 MAN A95 雙層巴士, M6EX1 同 M6FX1, 見參!!
M6EX1 @ 260X, 證書編號 0949, 限量推出 1300 架
M6FX1 @ 58X 證書編號 0148, 限量推出 1300 架
正式落地!! 心跳巴士迷俱樂部歡迎兩架火辣大猛男!!
M6EX1 @ 260X
M6FX1 @ 58X
正所謂雄兔腳撲朔, 雌兔眼迷離, 雖然兩架 A95 嘅動力配搭各有不同,
但係單憑車身外表, 無論係模型定真車, 大家又會唔會分得出兩者有乜大分別?
(其實我自己都分唔出)
你都話分唔出? 虧你仲話你自己係巴士專家~ (笑)
咁我都唔係乜野巴士都識㗎嘛大嬸!Hey 我唔係大嬸呀! (加送一野批掙)嗚嗚嗚~~~ (痛楚的呻吟)
九巴的大男人
Thanks for reading~
