首先講講下午茶果次先，小弟點了最愛的熱狗。
同場有4款：分別係漢堡包、熱狗、炸雞一件及蘋果批下午茶餐，配熱飲或汽水$12 (凍檸茶加$2)
近觀，可見相當多芝士碎，口味非常濃厚。
及後無耐，基於得手一券：購買夏威夷堡套餐一份，送夏威夷漢堡一個，故短時間內再度幫襯之。哈哈，其實唔咪話有券的話我都會去試下既，始終未試過有關漢堡。
二十七蚊一份餐，有夏威夷漢堡一個、中薯條同中汽水一杯，同牡丹樓差唔多價錢；送多一個包，更見超值。
購買之時無晒薯條，職員交低左個牌俾我之後話會有人囉落黎。
先黎兩個包先！好大個，雖然唔咪三層，但係重量同size已經同牡丹樓巨無霸比肩。
黎晒！影張全家福先。
夏威夷漢堡現真身！
其賣點乃其熱帶感覺，期待當中，稍後一試便見分曉。
煙肉又熱又香，o係囉起個包的時候已經感受得到，相信會非常惹味。
菠羅一塊，真係夠晒夏威夷^^ 水果入饌不太鮮見，不過入落漢堡似乎無出蜜蜂仔其右。
除左呢兩名主力成員之外，仲有生菜、芝士同埋燙口牛肉漢堡一塊。
經常講話食物夠熱已經成功了一半，蜜蜂仔呢方面做得幾好。
開動了囉！
吃落去，味道真係相當之好；菠羅配上煙肉的確係一個良好的配搭。之前無食過一款漢堡有類似既特別味道，好有熱帶風情，就似食左夏威夷風光薄餅咁；醬汁用上白沙律醬，突然間又有種食緊沙律既感覺走左出黎，哈哈。煙肉… 真係好出色既煙肉，唔怪得burger king食包要煙肉需要加幾蚊，看來有其箇中原因。
份量好多，兩個包小弟容納唔到，拿走吧^^
離開之時，見有飯品推介，或者稍後日子再試試吧！
總評：記得蜜蜂仔以前開左唔少分店，宜家就得番一萬零一間，可能漢堡包呢個市場的確俾牡丹樓霸左而致。Burger king既曾經撤離、哈迪斯、wendy’s既消失可以見到呢一點；不過漢堡風氣隨著mos同burger king捲土重來又似乎轉入百家爭鳴時代：牡丹樓價目表加完一次一次又一次，已經令一d其他舖頭賣既食物價錢相若，大家就會諗下食下第d口味，總好過對住d縮水包好吧！
今次食經告一段落，謝謝閱覽^^
