香港巴士論壇

依家成日講起居屋/公屋，
冇錯公屋/居屋應該供家庭為主，
但當愈來愈多年青人需要公屋/居屋時，
其實我覺得應該發展更多供單身住戶的小型單位大廈滿足需求

小型單位大廈係市區比較多，
例子有何文田邨雅、欣文樓，東區的康東邨、翠樂邨，
呢類屋邨的單位面積相信同當年的徙置大廈的單位差唔多，
擺張床後已經唔多位剩，
有獨立廚廁，
以一個人純夜晚用黎訓覺的地方來算夠用，
住四個人的話真係好迫，
但因為單位細令每層單位數目較多。

呢類單位雖然細，
但安全標準唔低，
因為絕大部份小型單位大廈都加設完善的消防警報系統，
全座所有走廊同單位都設有花灑頭同已連接自動警報系統的煙霧頭，
確保火警時在無家人幫助下都能自動報警。

廢話講完，
點解我想有更多小型單位，
係因為未來公屋/居屋仍以家庭為主導的話，
其實供不應求，
而且申請上樓的速度亦都好難加快，
居屋係市民需求愈來愈大的情況下，
相信亦需要照顧更多的單身人士，
家庭唔係一朝一夕可以建立，
係現今的經濟環境下香港的年青人要建立家庭相信更難，
如果不再為單身人士發展更多資助房屋，
相信他日就算起返居屋，
對唔少人來說仍然意義不大。

大家認為未來的公屋/居屋發展應朝向邊個方式？

只係講公屋
------
其實曾經有師兄問過我類似問題

其實而家既家庭 , 都係 4 個左右
以前既幾百尺大型單位根本唔再需要存在
不過而家建屋都係講求多方面 , 冇計

甚至要計埋家庭增長因素 , 300-400 尺已經係極限
好似以前 Y3/Y4 一般既細單位已經足夠
玩到新和諧型既單位 , 真係多謝哂

不過反正都係公屋, 玩統一標準設計已經足夠
大量預製件 , 大量統一貯存反而可以降低興建成本同建築時間

新既非標準型又係哂氣.....
-

我唸房署仲係用緊十年前的慨念黎起樓，
當時好多人剛剛由臨屋/徙置大廈轉上新樓，
和諧型的單位起大d的確有更大吸引力，
而且當時又剛剛科技爆破，
人人屋企都愈擺愈多設備，
當時來計300-400呎可能會細o左d，

但今時今日風水轉流轉，
當好多人揸住架ipad已經生存到，
再加上現今家庭愈來愈唔敢生細路仔，
而家唔少家庭所需的設備又少返，
所以好似樓上所講，
新和諧型的大單位我都覺得浪費o左地方，
不如整多d單身單位仲好

而且我覺得十字型公屋比舊長型更唔實際更浪費地方，
十字型公屋可能因為每隻翼面積細，
變相G/F的機房就佔o左兩隻翼，
可以整設施的得另外兩隻翼，
所以而家的公屋搞到冇哂G/F商舖，
最多係G/F起凸出的空間整間幼稚園，
亦因為咁十字型的設計我覺得冇哂彈性，
唯有整標準設計，
反觀以前長型的彈性大好多，
單位大細又易話事，
有G/F商舖更顯得盡用土地，
還掂依家房署都唔會再賣新商場比Links，
不如考慮起返長型仲好

依家新的非標準設計我覺得似屏風樓外都唔覺得特別之處

GZG50 :依家新的非標準設計我覺得似屏風樓外都唔覺得特別之處

而家D Non-Standard Block我覺得通風唔錯，至少好過NH1果D
上個星期去o左葵聯邨，出面哂到死但係樓入面又唔覺太熱
同一情況去到彩盈邨，簡直同蒸籠一樣

而家D新邨唔整D獨立商舖出o黎點加green roof

作為補助性房屋,
我認為未來的居屋發展方向一定要與私人樓宇市場脫軌
如果唔係即使有幾多的居民被興建,班人都會將居屋當作衍生工具
無助夾心階層解決住房問題