#1
(1)瀟瀟灑灑不算愛嗎？
《愛式》軟硬 + 黃耀明，1993（並無收錄於《Y100》精選系列）
原因：呢首係黃偉文第一首派台作品，如果話代表性，呢首一定有。軟硬同黃耀明將初期 Wyman 既愛情觀唱出黎，一 D 都唔簡單。
(2)你用無限濃情密意，來造迷人玩意，埋在沒名份手指，感覺多麼似，嘉勉光圈變天使
《小玩意》彭羚，1995
原因：呢隻可以話係將 Wyman 同彭羚各自推上一個高峰位置既歌曲，《小玩意》係彭羚其中一首大家記得佢既作品，將一個幸福小女人心情寫得相當漂亮，絕對係近年結婚歌曲之中一個經典。
(3)今天躺血是我心，即將痛在你心，身分對調發生...
《（你沒有）好結果》李蕙敏，1995（並無收錄於《Y100》精選系列）
李蕙敏當年好多呢類型怨曲都係出自 Wyman 手筆，我選擇呢首除了因為代表性高外，呢首歌詞對對方怨恨程度都係李蕙敏史上最重，並非隨便一個歌手能夠咁重怨氣得黎係 handle 得好既。
(4)帶琉璃冠冕 襯毛毛披肩 到浮華市面 兜一個圈 巡視半天
《小王子》黃耀明，1996（並無收錄於《Y100》精選系列）
晌黃偉文填詞生涯裏面，係得呢首歌係講呢本名著既。（期間楊千嬅同 GEM 各有一隻歌講，但係都唔關阿 Y 事）如果你話點解我會揀呢隻，真係頭幾句詞已經好深刻印象，好有童話感覺既一份詞，可以細味一下。
(5)地上靜的很，天空多悔暗，情人一轉臉，有萬箭穿心
《未忘人》李蕙敏，1996（並無收錄於《Y100》精選系列）
雖然話《（你沒有）好結果》係最好，不過要選擇第二好，一定係呢首。又係當今冇人可以 handle 既歌詞，你教現今邊個歌手唱，sorry，冇 feel。如果要現在沙聲既 Amanda 唱呢首，肯定更中，更怨恨...
(6)好想唱一蕨歌，叫你認清楚我，我也曾到來慶賀...
《時代曲》陳奕迅，1996
陳奕迅第一首被人記得既歌曲，寫出一個人於一場表演既心情，唔係人人都有呢個能力（sorry，張學友唱呢首都未必可以...）。試過去唱 K，呢首歌大家都話難，難在呢份詞有意思，但係冇可能求其唱左佢。
(7)歡樂今宵，虛無飄渺，那樣動搖，不如罷了
《歡樂今宵》古巨基，1997
某程度上 Wyman 寫左好多首係某位歌手既代表作，呢首古巨基 1997 年事業高峰作品，更加係膾炙人口，肯定了古巨基假音王子既地位。將一個當年做左六千集既電視節目，寫成一夜感情，今宵快樂，唔係人人都有呢個功力將我地覺得係 A 既定律，寫成為 B。
(8) 奴隸獸，奴隸獸，東一隻西一隻東一腳西一腳給批鬥，抱著頭退後，十秒便失守
《超人的主題曲》陳奕迅，1998
我係想唔到 Wyman 可以寫得出一首根本係小朋友都一定識唱既歌曲。當年我估計自己喜歡陳奕迅既開端，一定係佢（《時代曲》當時其實我未聽過，係之後有去唱 K 先識），亦難得有一首中文版既動畫主題曲係我喜歡既（一向我係日文行先），應該話，邊個會想聽返原裝超人迪加主題曲呢...haha。有時候，歌詞唔需要太過高深，呢個就係 Wyman 兩方面都做到，最好既例證之一。
(9)想盡慶投入鏡中暢泳，讓紅唇及眼晴按著我動靜做反應，望鏡中倒影如若照出一臉風情，或許不必再用自尊與自由換愛情
《自戀影院》盧巧音，1998（並無收錄於《Y100》精選系列）
大部分人覺得《垃圾》比較好，我會選擇呢首。佢亦都係我 2001 年有第一部 MP3 以來從來未試過離開過我 mp3 player／手機既歌曲。將自戀既感覺，寫在鏡子之中，不斷迴轉，「越繁華越冷清，這也我寂寞但高興」，甚至係盧巧音至今我認為最好既作品。
(10)什麼叫絕望 抬起眼望望 如今我在你面前呈堂 隨便收看
《絕》高雪嵐，1999
隻歌正式係佢既。好難解釋點解佢呢個歌詞係正，只係將一個人絕望心情寫得好中。歌詞裡面，連最後希望都冇埋，確實係悲慘既最高。
(11)誰來為宇宙爭取到自由 誰來為世人忠心去防守 是我這位正義大朋友
《正義大朋友》謝霆鋒，1999（並無收錄於《Y100》精選系列）
成個班底就係《超人的主題曲》，可以話係續集，不過好多人好似唔識。當然，當年有最好既，大家會好容易忘記，其實兩首詞大家要一齊睇先發現，原來係上下集。甚至，呢首歌上面 D 歌詞，唔一定係超人，可能係你身邊既朋友都唔定.....
(12)來擁抱著我 形成漩渦 捲起那熱吻背後萬呎風波 將你連同人間浸沒 靈魂逐寸向著洪水跌墮
《漩渦》彭羚、黃耀明，2000
將愛情寫作一個漩渦，兜兜轉轉。我寫唔出太多評論，不過呢首詞，我都唔會特別解讀，只係正，就係咁。
(13)我係一個發育健全既女人 需要各種營養既平衡 男人 新衫 現全加約會 零食 珠寶 護膚品運動 工作 交友再旅行 購物 娛樂 見男人
《婦女新知》莫文蔚，2000（並無收錄於《Y100》精選系列）
哇.....唔睇以為呢首歌係女人寫既歌詞，呢次 Wyman 寫得好中，究竟一個女人需要 D 乜呢？（當然個別唔一定係必須）寫晒，哈哈。仲有佢 D 時裝精身分，哈哈，個句「這就是我們購物狂的命運」，需要解釋嘛...
(14)有價無市 有氣有力 清盤封屋都不可怕 性格最貴 我已決定不減價
《大大公司》Swing，2001
呢個歌詞，可以當作 Wyman 性格、Eric Kwok 性格，或者好多人對自己有自信表現既寫照，我有實力，絕對唔怕賣得貴，呢個係所有設計師，或者所有製作人既心態，我自己呢，哈哈，唔算創作人吧...
(15)不想變師奶阿叔 放低你包袱 請將你僅有朝氣一折清貨 通通放出
《趴啦趴嗱》林心如，2001（並無收錄於《Y100》精選系列）
陳年跳舞歌，我唔知點解覺得呢 D 根本唔係香港歌手唱 D 廣東跳舞歌特別正（另一首，當然係謝金燕既《嗶嗶嗶》啦），顯得 Wyman 好玩得既一個詞。
(16)喜歡你讓我下沉 希望你讓我哭 能持續 獲得糟蹋亦滿足
《痛愛》容祖兒，2001
老實說，容祖兒呢批歌係同李蕙敏歌詞既怨恨度，差一大段。不過，少女 D，入屋 D。呢首歌，係我確認容祖兒可以做到天后既一首歌，難得好歌好詞，請細味。
(17)如果盛世之戀 到日落時就結束 開遍全城燈火 照亮了天際 試問白晝會否不完 繼續熱鬧在下午兩點
《日與夜》張學友、林憶蓮，2002
903 廣播劇歌。呢隻歌係兩位演繹得天衣無縫之作，遺憾從來冇二人合唱出現過 live...好，講返詞先，隻歌填得好優美，唔係旋律咁簡單，而係個詞好似新詩咁，好靚。配合個劇之外，根本隻歌再寫多個歌劇都仲得.....
(18)同樣都叫瑪利亞 同樣都信瑪利亞 同樣得到恩寵一樣每天得我愛護嗎 為何一個每夜上街 應接著路人賣花 又有一個卻旁邊有我陪著喝杯茶
《曼谷瑪利亞》Shine，2003（並無收錄於《Y100》精選系列）
其實隻歌個故仔好簡單，就係有兩個叫 Maria 既女仔，晌曼谷同香港係有兩個唔同既經歷。呢隻歌其實係好謝安琪 D 歌咁，係要慢慢 lun 先明白，呢個世界有人富有人窮，有人溫飽有人饑荒....（感慨...）所以應該要珍惜身邊既一切擁有既...
(19)圖書館中那水手服 有否對我笑 不記得了 松板屋中那東京夢 聖子變作了舊時路標...維園之中那燭光下 那一臉憤慨風化失去 紅館之中滿天偶像 殞落在生活裡
《下落不明》黃耀明、林憶蓮，2003
成個歌詞其實係好似我地人生既過程，可能身邊既人同事，經過時間洗禮，已經下落不明，或者你已經搵唔返一 D 野，同上面既結論相同，大家要珍惜。
(20)一天一點傷心過這一百數十晚 大概也夠我送我來回地獄又折返人間 春天分手 秋天會習慣 苦沖開了便淡
《心淡》容祖兒，2003
點講呢，真係中間最密集呢幾句歌詞，又係對可能散既愛人夭心夭肺既一句歌詞，亦係難度極高（我覺得呀下，容祖兒 D 歌好多呢 D 密集式都係出自 Wyman 手筆），仲要成句聽完，豁然開朗。
(21)新宿街頭十餘萬人 怎麼竟然撞回熟人 問我共你 何解於街角擁吻
《地下街》周國賢，2004（並無收錄於《Y100》精選系列）
隻歌其實係城市系列三首之一（另外既係《赤城千葉》同《漢城沉沒了》）。Wyman 寫既歌好多都有日本相關（呢個亦配合早年周國賢個日本 J-Rock feel），寫既係地下情，用地下商店街呢個日本產物黎借代，好有創意既一份詞黎。
(22)你當我是浮誇吧 誇張只因我很怕 似木頭似石頭的話 得到注意嗎
《浮誇》陳奕迅，2005
Eason 係神，係人都知。神人唱神曲就係呢 D，因為其實個歌詞我覺得係寫黃偉文自己，多過寫陳奕迅，亦難得兩個都係咁既人，所以....大家一齊~~~你當我是浮誇吧~~~~~~~~
(22)愛 原來無路可退 停留在重災區 著了燈 仍呆坐這裡 這關係像架車困擾擠塞的市區
《塞車》謝霆鋒，2005
以塞車形容一段感情有幾寸步難行，相當現代既歌詞，係既，有時關係既野，係真係用唔同既物件／事情，配合謝霆鋒既不羈形象，再加上今次係周國賢作曲，點解出現一個咁好既化學作用先得架...
(23)沿途是翻天覆地雷狂雨飛 既說過後會有期 怎可失去你 怎可放棄 昂然踏入這禁地 就算有 軍隊封路 圍牆建起 都衝得過都也未怕死
《最後的茱麗葉》容祖兒，2006
呢首歌個副歌太強，我抽唔到邊句係精句。主要原因佢可以入三十大，係因為成段副歌好感動，去寫一段至死不渝既愛情，唔會因為一 D 外來野，阻隔兩人一起。Wyman D 情歌多數負面，正面成咁，少數，容祖兒唱，再加分。
(24)忘掉愛過的他 當初的喜帖金箔印著那位他 俵起婚紗照那道牆及一切美麗舊年華 明日同步拆下
《囍帖街》謝安琪，2008
2008 年確實係冇好歌既一年，幸好還有謝安琪。一向好鍾意呢 D 社會性既歌曲，謝安琪多數係佢合作開既班底，Wyman 算唔係經常合作個批。當年囍帖街拆樓，一聽呢隻歌就有一種不期然既感覺，詞裡面既意境，如今已不復還。
(25)全年度有幾多首歌 給天天的播 給你最愉快的消磨 流行是一首窩心的歌 突然間說過就過
《年度之歌》謝安琪，2009（並無收錄於《Y100》精選系列）
比起《最後的茱麗葉》，其實呢首更加係全首都係精句，更難抽精華。因為係既，謝安琪因為前一年既《囍貼街》突然冒起，佢歌詞中「高峰過總會有下波」，真係連呢句都中埋。我知 Wyman 唔係抽水，但係呢首歌亦係提醒各位，人生係有高有低，有 D 時候停下來「鞠躬了就退位 起碼得到敬禮」
(26)真想不到當初我們也討厭吃苦瓜 當睇清世間所有定理又何用再怕 珍惜淡定的心境 苦過後更加清 萬般過去亦無味但有領會留下
《苦瓜》陳奕迅，2011
再高一個層次，其實《苦瓜》用黎比喻人生係一個簡單得黎高深既比喻。係既，而家我同各位可能都唔識欣賞，或者我地人生到達一個層次時候，大家就會明白呢個道理。當然，「珍惜淡定的心境 苦過後更加清」呢句，晌 2012 年晌我自己腦內係繼續迴轉，因為應該作為自己工作既格言就真。
(27)牆紙一般貼在門牆是我 填充畫面那內容 無權伴你躺臥 想知這角碎花 只裝飾你的堂皇神殿麼 可曾被你欣賞過
《牆紙》容祖兒，2011
翻查紀錄方大同作比薛凱琪既作品多數由 Wyman 填詞，咁點解反而係後幾年既容祖兒會入圍呢？講真，唔難明，因為呢個係暗戀心情，原來借代愛情為旁邊一塊牆紙，真係高難度架，人地行過掂過唔理你就係唔理你，如果
以下三隻年份不明，或者有年份爭議，因此放到最後
(28)你做初一 我做十五 你是火星 我是地球 碰撞之間 各自亦有各自的千秋 你做初一 我做十五 註定冤家 狹路聚頭
《初一十五》黃偉文、吳君如，有說係 1993-1995 之間，真確年份不明
呢隻真係經典啦，以前 D 嗌交歌邊會動真火架，聽完仲有得啖笑既感覺係好難架，仲要兩個本身唔係唱歌，我唔話佢掂都唔得啦...
(29)人間百萬年 一生不過少半點 等不到歌曲都奏完 時日會磨蝕掛牽 年月會耗損信念 趕快跟我共舞一段
《帶我去跳舞》關淑怡，隻歌係 1997 年商台《新人類年代記》廣播劇主題曲，但係出碟係 2006 年先有（並無收錄於《Y100》精選系列）
呢隻歌我 1997 年既時候話係我呢生人聽過最正既作品。當然當時年紀小，係講誇左。不過當我 2006 年搵得返呢隻歌（因為我做網台頭三年都係不斷搵呢隻歌，可惜當年冇有心人上載），我就真係又係長駐 MP3 機（長駐 MP3 機超過三年既歌咁耐得三隻，《帶我去跳舞》、《自戀影院》，同埋《地下街》）。鍾意既係 Shirley 獨特唱腔、而阿 Y 呢份歌詞其實都好有意思，就係及時行樂。
(30)呼吸一閉起 彷彿可以飛 飄上天際空氣 最後驀然回頭望這地 發現已死 不應偏執到死 先清楚記起 根本這是歪理 你會為情人涯完毒氣 但你卻對生命兒嬉
《井》張敬軒，隻歌張敬軒話 2010 年起貨，但係派台係 2012 年既事（此曲並未趕及收錄於《Y100》精選系列）
據知張敬軒作呢隻歌既時候係有抑鬱症既，當時 Wyman 寫呢首詞，我睇返其實本來係一隻慘情野，點知內裡 dep 落係另一件事，就係呢首曲最重要最後幾句，其實係鼓勵各位要由井底爬起，唔可以輕視生命....
好，寫完，歡迎大家討論下。以上除第十五首外，全數 Youtube 可以輕易搜尋得到。
後記：
其實呢個嚴選過程中我係搵到唔少好正既舊歌，如果你要我玩嚴選 40 都仲得，不過我懶。
Wyman 寫比楊千嬅 D 歌好多都好普通，而用得最多既何韻詩，就因為隻隻其實差唔多，冇乜亮點，因此亦不見在榜。
真係如果要數第三十一位邊個咁不幸，我會選擇薛凱琪《給十年後的我》，一首好感動但係從來冇派過台既歌曲黎，
嚴格黎講佢應該係平排上高任何一隻....
