![[flowerface]](https://hkbf.org/images/smilies/flower.gif "丁香丹桂茉莉 都覺得可愛")
今次行程，就係黎吉澳同鴨洲既離島探奇一番
因為係報團既關係，行程既自由度其實唔大，不過勝在去既地方都充滿特色
而且如果唔報團，幾乎係冇辦法去到吉澳呢～！
行完荔枝窩，起吉澳午餐，到鴨洲深奇，一班人一齊玩的確幾熱鬧！
放假又一大早起身，早上大家都起大學站點名，等齊人就跟住領隊出到碼頭
上年東平洲都係起馬料水碼頭上船，所以開頭既船程都影少左相
不過今次有別於以前，以往我地都係坐船尾影浪，今次就決定企船頭
睇住自己坐既船乘風破浪，橫越赤門海峽，船頭景色又有另一番風味了！
船繼續航行，過了赤門海峽，最後就停起海岸邊，呢到就係黃竹角咀
香港著名既鬼手岩就係起呢到，鬼手後既山崖色彩亦都好有趣！
船一直停泊起海面，大家就一直咁影相
呢到如果要行山去的話又至少１０小時，影相其間我都不斷望下海岸邊
不過都最尾我都未能發現到附近有上山既路，只見全部都係懸崖峭壁
停左一陣，船就繞過黃竹角咀，進入黃竹角海既水域，
呢到有香港最美水域之稱，皆因海岸線邊全部都係紅色，係香港最大規模
同獨有既紅色海岸線，呢一到，真係好靚好有意思～！
船再經過紅石門水域，終於可以起海上望到紅石門既水壩
２００７年都同朋友都行山到過呢一條水壩，好懷念呢！
過左紅石門水域，海面顯得特別平靜，起海面上出現一個又一個細少既島嶼
呢到就係另一個海上小桂林～印洲塘！呢到真係可以用"波平如鏡"黎形容
即使船起到高速航行，都完全感受唔到海面有起伏，
呢到真係可以起船上企定定咁影相，起海面再觀賞埋印洲五寶，
即係印洲塘上既小島嶼，觀賞完之後就起海上同另外既船鬥快爭碼頭了～！
最終，我地快過人地既船少少，爭到了優先上岸既權利，第一個目的地
就係荔枝窩，另一個２００７年我同朋友到過既地方，不過今次既景色
同０７大有不同，潮退露出了一大片石灘，荔枝窩既客家村落亦有翻新過
雖然話係幾年前黎過，但感受已經唔同晒
黎到一定要觀賞一下荔枝窩後既風水林，亦係荔枝窩既名勝之一～通心樹皇
一棵中空，但係仍然健康咁生存著既大樹，比較可惜既係
樹底下既樹洞已經比閘封左，大家以後都冇得再爬上樹上面既洞影相了
幸好我地都起０７年時影過 ＸＤ．．．
![[sosad]](https://hkbf.org/images/smilies/icon_sosad.gif "So Sad"){kind=icon}
之後大家跟隨領隊觀看另一棵樹皇，其實呢到係有兩棵樹，
粗大既樟樹幹卻被榕樹既氣根纏繞住，兩者已經結合為一體，再不分離了
再走一段路，另一棵過百年既老樹～五指樟，一樣都係樟樹
同一個根部分成五支主樹幹成長著，不過領隊講其中一個樹幹於二戰時
已經被日本人斬左，而家只剩下四指同埋另一個樹幹既傷口
之後入返荔枝窩村既圍場內走，過去另一個荔枝窩名勝～白花魚騰森林
好奇怪點解０７年既時侯，一個咁有特色既森林會完全一張相都冇影過？
觀賞過後，大家集合到碼頭登船，不過呢一刻再有３,4個本地旅行團黎到
寧靜既荔枝窩變成了熱鬧既旺角，最終等左十幾分鐘先上到船
出發往另一個地方：吉澳．鴨洲～！
有特色既吉澳午餐，有特色既海上浮鴨～！
船駛離荔枝窩既碼頭之後，正式向吉澳出發～！經過十五分鐘左右既船程
終於能踏足吉澳既島上，落船段經過一個翻新左既碼頭
第一時間就係到餐廳黎一個有特色既海鮮午餐，
吉澳既特產～墨魚丸同茶果，真係好好食～！一團人食過午飯後，
就到吉澳廣場，遊覽吉澳荒廢左既村落，姻緣樹同天后廟，
之後就上船向鴨洲出發．．．其實吉澳既旅程真係好唔夠喉，
午飯過後都唔多時間去遊覽一下，呢一樣就係令我覺得跟團既唔好處之一
不過誰叫只有沙頭角禁區開出既街渡，先可以去到禁區外既吉澳呢．．．
船之後經過吉澳海，前往鴨洲，海上望鴨洲，一隻巨大既海上浮鴨就起眼前
船長特意繞過鴨頭，比我地起海上遊覽有特色既海蝕拱～鴨眼洞
之後先再到碼頭上岸～！踏足鴨洲，呢到真係好特別，好多奇石都起島上
領隊帶領一團人環繞鴨洲一圈，一開始就見到好得意既人面岩，
隨後再有篤地石，起崎嶇既岩石地上，我同朋友走得好快，完全拋離左大隊
好快就到鴨眼洞，這就是行得山多既成果吧～！ ＸＤ
起鴨眼洞趕著影完合照，趕著走上洞頂再影人潮，離開大隊原本既路線
登上鴨洲只有28ｍ高既山頂，一睹鴨洲全景同印洲塘既景色，
再趕頭趕命咁落返碼頭，全程都趕頭趕命，原因係因為大隊並冇預到時間
比我地上山頂，咁就唯有我地行快ｄ，比時間自己上山頂了～！
起鴨洲遊覽過後，大家隨船再回到吉澳，等待一班原本已經到達碼頭
卻出了些少差錯而遲大到既行山團，起碼頭一等就一小時了，
領隊亦同時決定放大家上吉澳，再繼續買下手信食下野，
可惜既係領隊最終唔比我地登上吉澳既山頂小亭，未能夠一睹吉澳既全貌
等待期間我地都買左一碗豆腐花黎食，唔同地方既豆腐花有唔同既味道
最終，原本５點起大學散隊，變成５點先起吉澳離開，行山隊終於都上船了
行山隊既領隊向我地輕鬆隊講返遲到既原因，原來行山隊因為打風之後，
山路變成密林，連領隊都迷路，最終佢地闖林出返山而遲大到
不過眼見行山隊一行19人，個個都變成泥鴨咁，大家都實在冇辦法怪罪落去
其實每一個旅程，都須要有一點瑕疵，一點"小插曲"，才稱得上完美～！
之後船直接起吉澳離開，唔再經過紅石門，取另一邊海域直接到達馬料水
船上唔少人都疲態盡現，唔少人都已經呼呼大睡，由早上企船頭要爭位
到回航時得返我地企船頭，分別真係大呢，最終５點散隊既馬料水碼頭
我地６點先到達，大家謝過了領隊之後就各走各路了～！
後記：
其實今次既行程對我黎講實在沒有抱太大既期望，因為一黎驚落雨
二黎荔枝窩我地都曾經到過，再黎就係掛名"輕鬆組"既路線，
自己心目中既"輕鬆組"只係吃吃喝喝，行行企企，感覺上冇乜"睇頭"
不過意相不到既係多左兩個領隊，多左一大班既團員，就咁起左化學作用
海岸線上，以至到荔枝窩上面既一草一木，有著領隊賣力既解釋，
即使係到過既地方，亦都新鮮感大增～！有著一大班團員，
雖然大家素未謀面，但亦令到整個行程熱鬧起黎～！雖然話係輕鬆組
但係意想不到竟然都會有些少難行既地方，同樣係"吃吃喝喝，行行企企"
但係比我既感受卻大大不同～！再要慶幸既係，
天文台預測係話有雷暴同大雨，最終雨冇落，反而仲有機會見到藍天
一切種種既原因，都令今次既旅程得以圓滿～！
ＴＨＸ ＦＯＲ ＲＥＡＤＩＮＧ
![[photo]](https://hkbf.org/images/smilies/Photo.gif "傾偈無圖無偈傾")
