又黎放３日假，黎到第２第３日，連續玩通宵，唔好比佢停！！！
去完地質公園，睇過六角柱石，行左幾個山頭，玩到好攰，一大覺訓到天光
黎到20號，體力回復返唔少，再黎實行今個８月預定既行程．鳳凰觀日！
出完一日街，到夜晚時間就入到黎東涌，食過晚飯，大家就開始傾起步點
最終決定搭的士上到昂平再起步，夜晚黎到昂平，有一種幽深既感覺，
雖然只係晚上９點左右，但四處冇人，成個地方就只得我地幾個，
靜靜地走到心經簡林，終於聽到人聲了！
走上心經簡林，原來係一班影星發燒友起到追星，晚上既心經簡林
光害很少，整個夜空都可以清晰望到大大小小既星空，經過呢班發燒友既指示
原來８月既夜空，可以望到整條銀河星團，佢地一群人用著一堆單反相機
輕易地就將整條銀河拍下，反觀我地就只係用ＤＣ機，算係免免強強咁影過
但係親眼看到既銀河，原來真係好靚！相比起萬宜觀日既星空，
呢到天上既繁星真係多得誇張，完完全全將萬宜比下去！
起簡林影完星空，互相分享過自己既作品，我地就暫時道別，
開始我地正式既旅程！以前萬宜觀日夜行車路，心情真係輕鬆得多
而今次就真係真真正正咁夜行山路，心理上出現一種無形既壓力
雖然今年年頭都行過一次鳳凰山，但日頭同夜晚既山路分別實在太大了
世界就似只剩我地幾個一樣，夜晚走左一陣，唔覺唔覺就已經走到天梯
回頭一望，遠方金光閃閃咁，望真ｄ原來遠處就係澳門！之後繼續走上天梯
中途都見到唔少小動物，晚上既鳳凰山生態真係好多姿多采！
走過天梯，感覺上好快就上到斬柴坳，好快就到山頂了，黎到山頂，
周圍竟然都冇霧氣，山下一幅東涌機場既夜景真係好靚，雖然山頂都黎過一次
但咁開揚既景觀就真係第一次見，起山頂上，亦比起簡林下見得到更多繁星
不過山頂上真係太大風了，大家最終都係要走入避風站坐下，食下宵夜，
當大家都關上電筒之後，忽然聽到避風站內有其他聲音，開燈一看，
幾隻老鼠就起身旁，嚇得大家都走出避風站外，最終站內比老鼠佔據左一晚了
不過企起亭外睇老鼠，原來並唔係想像中咁可怕，望得耐反而覺得佢地可愛
最終冇得起站內休息，走到標距柱邊坐下，又見到有一隻好得意既生物．
竹節蟲，之後，濃霧黎到，夏天炎熱既氣溫，起山頂反而十分寒冷
原本諗住落雨先用既便利雨衣，成為了大家晚上既保暖衣，大約零晨過後
其他觀日出既遠足朋友都上到黎了，晚上既鳳凰山頂變得熱鬧起黎，
大家都傾談達旦，等待日出，起山頂既夜晚真係毫不無聊！
![[flowerface]](https://hkbf.org/images/smilies/flower.gif "丁香丹桂茉莉 都覺得可愛")
大約等到5:30AM左右，深沉既天色開始變得光明，大家都開始擺好相機
一致將相機對準東面，不斷既等待，遠方開始出現一層層紅色既霞彩
夾雜著清晨山間的霧氣，鳳凰山既日出層次甚為分明，等到6:03AM
呢個天文台公佈既日出時間，天色終於明朗起來，但一場比較大既霧氣
亦隨風而至，正當大家都失望既時候，山頂既霧氣消散左，
反而山下依然重霧深鎖，太陽亦從濃霧間出來了，拍下來既照片
就似起飛機上影到既一樣，大家都站起雲霧之上，此刻既景象實在太感動了
過左一陣，太陽光線終於可以令人感覺到熾熱，山野間既雲霧亦開始消散
一陣陣薄薄既煙霧伏起連綿既山脈之上，此刻既太陽光線太猛了，
唯有捨棄太陽，只將山間既煙霧拍下，一層又一層，山間與雲霧完美的配合
又一種令人讚嘆既自然力量吧～！此時部份既行山朋友開始離開了，
回頭一看，一道小彩虹就出現起背後既山下，大家都不忘為它拍照
之後大家都離開了，山頂上又再次剩低我地一少隊了，大家整晚都冇休息到
等到另一次既濃霧，我地亦都帶著疲倦既身軀，落返昂平了．．．
落山既路實在走得太辛苦，但中途既另一道彩虹，算係大自然專為我地送上既獎勵吧～！
後記：
《鳳凰．飄渺》作為了今年第一次既遠足旅程，行程過後，即時就計劃
決定今年一定要黎一次《鳳凰．觀日》，不過見過網上不少既日記，網誌
都記載著唔少失敗左既鳳凰觀日，整個日出都起濃霧之下完結，
甚至見有人講過自己上左幾次山都未能欣賞日出既"慘痛"經歷．．．
所以今次既鳳凰觀日，實在係同大自然賭緊運氣！不過感覺自己真係好幸運
第一次上山就能夠見得到有如仙境般既日出美景，雖然仲未算得上完美
日出一刻都一樣比雲霧蓋住，但見到雲層與晨曦光線既轉變，已經甚感難得
鳳凰山日出，確確實實係香港最美艷既日出，淨係睇到網上既相片
都已經令人讚嘆不絕，親歷其中，看著雲層色彩不斷既變化，
有如電影一樣咁精彩，最後落山更能夠遇見一道彩虹，如詩既景色
又留起大家既回憶裡面了～！
ＴＨＸ ＦＯＲ ＲＥＡＤＩＮＧ．
![[photo]](https://hkbf.org/images/smilies/Photo.gif "傾偈無圖無偈傾")
![[sosad]](https://hkbf.org/images/smilies/icon_sosad.gif "So Sad"){kind=icon}
![[banghead]](https://hkbf.org/images/smilies/icon_banghead.gif "我撞牆死左佢算啦！"){kind=icon}
