挑戰自己既毅力，體力，意志力．蚺蛇尖上登峰造極！

今個９月，見到某單車討論區，有車友成功登上一座難度極高既山．蚺蛇尖
我就開始心癢癢的，想試一下自己既能力究竟可以去到邊！
於是，今個９月就黎一次最終極既旅程，呢一次亦係我２６年人生入面
玩得最刺激，最攞命既一次～拎單車登上蚺蛇尖山頂！終於，我做到了！
亦係我十幾年遠足歷程入面，最有滿足感既一次！

放假繼續一大早就起身，食完早餐，準時起８點半出發，經過西沙公路，
大網仔路同北潭路，一小時左右既腳程就上到北潭凹，亦係今次既真正起步點
麥理浩徑第２段既出口，小休過後就沿水泥小徑下落至赤徑，
早上既赤徑水漲得好高，差少少就浸到上路邊了，之後起赤徑碼頭再一次小休
儲足氣力再上大浪坳，今次就黎個大休了！休息左至少半小時，
正式今日既變態之旅！

出發．泥涌

北潭涌

萬宜水庫入口

北潭凹．正式進入山路

赤徑．荒廢村落

赤徑碼頭

登上蚺蛇的入口處

蚺蛇簡介

入口處大休中


起入口處，首先抬車上一少段，之後踩一段，密林既位又再推一段
不知不覺就到左蚺蛇坳，起呢到望到前面有點誇張既爛路斜坡，
就開始諗，做！還是放棄！此時自覺自己仲有好多體力，最終決定一於上山
今日既終極抬車之旅正式開始！一開始迎接我既就係好直既浮沙路
頭兩三段既浮沙路都仲可以一腳上到尾，不過之後有一段更加直既山坡
終於都要停低一下一下咁慢慢上，之後既路更加越上越慢，
結果上頂時間亦比自己估計既耐，用左2.5小時，終於上到頂啦
呢一刻就好似成個世界都係我既，好開心，好滿足！
蚺蛇尖，平時行山都已經係出名既挑機危險路線，今次竟然就我一個人既力量
安全咁上到山頂，從來都冇諗過自己既力量竟然有咁大！
上到山頂，山下超靚既千溪海岸就成為左回報，影過相之後，終於
都要起山頂曬住咁大休了．．．

正式上山！

單車與蚺蛇

蚺蛇尖．雄偉的山脈

ｇｏ！ｇｏ！ｇｏ！！！

起呢到諗緊返唔返轉頭

蚺蛇警告牌

正式上山

剛上完既山峰

危崖險脊

回望上山既路

山頂在望

到達山頂！


山下連綿山脈

遠處大灣，鹹田灣

千溪海岸


正所謂上山容易落山難，休息左接近半小時，正式落山，當然上山難行既路
落山亦唔到好得幾多，開頭既落山路全程托住架車小心翼翼咁落，
落到一處平位終於可以踩到車了，一直就到米粉頂附近，之後再落山
呢一段，我真係冇辦法踩落去，唯有再一次推推抬抬咁落，唔覺唔覺
落到山下近東灣既營地，竟然已經係下晝５點半既事，
前面仲有一座山要過先到達大灣，呢一段路真係要快ｄ走晒佢，
要趕起入黑前到大灣，結果，就同我預料一樣，天黑後就到大灣了
臨近中秋前夕，月光特別光，露營既人亦都特別多，落到大灣，
忍唔住要同月光影返張合照，之後就再搵路到鹹田灣了．．．

落山往米粉頂

回望山頂

入夜．大灣


入黑後要搵路果然唔容易，起大灣沙灘邊既草叢堆走左幾次，
終於搵到一條比較上寬闊既小徑了！經過小徑，好快就到鹹田灣，
落到鹹田灣，見到海風士多，終於都有得坐了，一坐低，
個人就即刻癱軟左起張椅到，未叫晚飯，已經叫左一支可樂，辛苦左一日
呢支可樂稱得上係最美味的，之後叫左碟炒飯，雖然幾貴，但係勁肚餓既我
食到飽晒都食唔晒，果然係份量誇張既一碟炒飯！食完飯，坐左起椅到
吹住士多外，海邊清勁既海風，實在唔捨得走呢，
最終起鹹田灣海灘側邊影多張相，正式再次踏上麥理浩徑，返
回今日早上既起點．北潭凹！夜晚獨自一個人起山林裡面闖還是第一次呢！
不過到左上斜路段，嗯．．．我真係再冇多餘力氣了=.=
上斜既路全部都係推車上，落斜先再上車行，最終，搞到１０點先到北潭涌
剛好見到有的士，我寧願上車都唔再踩返馬鞍山，終於起的士上結束今日攞命既旅程！

鹹田灣開餐

再見鹹田灣！


後記：
蚺蛇尖．我早起０５年既時候已經行過一次，當年行既時候，
路兩邊都唔係太多草叢要闖，隔左７年，再一次重遊舊地，路密左好多
上山頂既路亦都感覺上比以前既爛，終於，再一次上到蚺蛇尖山頂
山下既風景多年以黎都係一樣咁靚咁令人嚮往，反而之後落山，
比上山既路用得更加多時間呢，由早上８點玩到晚山上１０點，
咁長時間都係頭一次，相信將來，我仍然有機會再上蚺蛇尖
但係拎住架單車，相信就只此一次了，下次再黎到麥理浩徑踩車的話
都係正正常常行到大浪西灣算了．．．

更多今次旅程分享

ＴＨＸ　ＦＯＲ　ＲＥＡＤＩＮＧ．