曾經發誓不會重遊的塘肚古道．結果．．．．．．

今次重遊塘肚古道，應該話係被迫重遊( )，因為未行過紅花嶺，而且黃金礦洞既吸引力
結果又再行多次冇景好睇既塘肚古道，半年來既第２次呢！不過好彩既係今次終於都搵到塘肚廢屋
４月初遊果次搞咩呀？廢屋就只係起數步之遙，竟然咁都會錯過左，太過份啦！！^^
不過今次都值得行多次既，上次４月錯過左太多野，今次終於可以一次過行返晒
雖然已經係十月，但竟然都會熱到好似火爐咁，今次完成之後，比上一次攰得多
返到屋企都頂唔順即刻撻落床，夠晒皮了！



比平時早多半小時集合，一早黎到粉嶺，又搭車到出發點，上次４月既終點就係今次既起點
沿禾徑山路接上紅花嶺軍路，一開始就已經係一條斜斜既車路直登山頂，知道左軍路入口
下次可以踩單車去^^！呢條車路沿途景色好好，雖然上斜，不過都算輕鬆，到達山頂附近
訊號塔成為一個唔錯既拍攝景點，一張"飛躍進步相"當然唔少得，影完相，開始就係山路
兜兜轉轉，到左最後３個大斜坡，第１坡密密地，第２坡條路幾明顯，最好行，
到第３坡就落得好急，不過都仲未係最難既一段，一下子黎到新桂田右坑，由呢到開始下降黃金洞
正正式式用晒屁股黎行路，手位都ＯＫ，但腳踩到既幾乎都係鬆，仲加送左唔少落石
幾經辛苦，終於黎到黃金洞外既大瀑布，涼住洞口既天然冷氣大休！





大休過後，開始要濕腳了！進入黃金洞一探，蓮麻坑呢到究竟有幾多個礦洞呢？
總覺得探極都探唔完，洞內牆壁剩餘既礦物，電筒照耀下閃閃生光，好靚呢！
而且呢個礦洞，歷史記載的確曾經有黃金出產過既紀錄，雖然要見到幾乎係冇可能，不過都值得一探
再加上洞穴必定有既飛天老鼠，好乖咁比我影佢相擺埋上網，近睇蝙蝠仔真係幾得意
不過呢個洞規模比較少，相信有３－４層，但全部都係由直井連接，上唔到又落唔到
輕輕一探黃金洞之後，再次行返剛才超斜既山路上返山，落又恐怖，上都唔易
出返澗位，走上碎石坡，正式穿林去塘肚，３０分鐘路程，終於黎到上次都到過既直昇機坪
新桂田係難行，但都唔及塘肚咁辛苦，可能落過雨又打過風，比起４月果次，今次真係難行左好多
又唔經唔覺行左個幾鐘密不透風既林，出汗出到個人濕透，好似行完澗咁！終於都黎到上次錯過左既廢屋
真係大叫搞錯呢，原來上次只差幾步路就到，好彩今次終於搵到，間屋個屋主搞咩呢？
屋內傢俬陳設等等都留返晒起到，好似避難咁乜都冇帶走就人去樓空，參觀完３層既示範單位之後
再次接上密林，雖然已經係第２次行，不過都係唔知自己行左去邊，日落了，終於出返車路
經過堆填區之下，今次唔行悶到爆既禾徑山路，轉落坪洋睇大樟樹同咚咚石，
上次又係錯過左呢兩個景點，今次補飛，唔錯，走到咚咚石前，大隊分兩隊，走既走先
玩既繼續跟，結果上咚咚石既就只有幾個人，難得黎到冇理由唔去姐！結果原來只係行多幾步就到
咚咚石．唔係講緊形狀，而係舊石真係打得咚咚聲咁響既，成班傻人返晒去石器時代，係咁打石
總結，大樟樹好大，咚咚石好響，講完ＸＤ！

















後記：
唔用書面語打，果然打得快好多ＸＤ
仲有個蓮麻坑大洞未探過，塘肚古道，唔好再黎第３次啦=.="""
自己都算係行得之人，但都可以行到腳軟加腳酸，嗯！而家仲酸緊
估唔到路程唔算長既路會咁有威力呢！

＞＞＞＞更多圖片＜＜＜＜

相關路線＜＜＜＜新界禁區遊．探索蓮麻坑礦洞 (14-4-2013)＞＞＞＞

ＴＨＸ　ＦＯＲ　ＲＥＡＤＩＮＧ ．