簡樸．莊嚴 ～小島風情～

今年不斷跟網團玩左好多唔同既山線，澗線，但持續左兩年既離島之旅，今年竟然完全遺忘左
甕缸群島，索罟群島等等一大堆未去過既島嶼今年全部都錯過左，接近年尾
係時候搵返ｄ離島遊覽一下！
只有平日假期放既我，實在好高興呢個突如其來既星期六假期，星期六，雖然睇過潮汐
今日綑遊西流江都好吸引，不過都係一於搵返ｄ只有星期６日先有得玩既路線
於是今日就捨棄左好多吸引既長途山線，黎到西貢上既其中一個小島．鹽田仔！


前一晚搵完資料，嗯．十點鐘有船！滿心喜喜既我早左半個鐘就到碼頭！
接待處既職員都連忙拉客，放心，我今日既目標係鹽田仔，你唔拉我都會黎既！
點知一直等到十點鐘，都只係得５個客，我都明白你生意難做，所以十點鐘班船都冇左
冇啦啦多左半個鐘時間，只好起西貢既市集行一陣，我都係而家先知原來市集都有萬宜既防波石
行完一陣返返去，終於都有十幾個客，1030既加班船亦開到黎，$35來回船飛，一份地圖，抵玩！

上年去橋咀，今年就鹽田仔，起同一個海上出發，15分鐘就到鹽田仔碼頭上岸
上到岸第一時間，見到地道既特產．茶粿，諗都唔諗就買左兩個，好味！
之後就第一時間去呢個島上唯一既廟宇．．．教堂先岩^^鹽田仔最特別既就係島上冇中式廟宇
只有一座歷史悠久既天主教堂，難得黎到，雖然自己唔信神佛，不過都值得參觀！
睇完教堂，再走到下面既學校，不過就已經改建成為文物陳列室，都係一ｄ漁業同農業工具咁既野
望完之後，經過舊日村落既廢墟，聽到吱吱作響，經過一望，嘩！又係飛天老鼠呀
仲要唔係得一隻，係一群，同上次礦洞見既又係另一隻品種，飛起黎成隻手臂咁長
好大隻，好壯觀，我都真係第一次見咁多蝙蝠！望完影完，同時都餵飽左好多蚊
之後就跟地圖去古井，難得既係古井既水依然清澈，難道島上居民仍然用緊呢個井打水？












之後再走上兩個涼亭，涼亭之間可以遠處望返去教堂，再走返落山就到玉帶橋
將鹽田仔同滘西洲連接，嗯！冇乜特色姐！之後走到最後一個景點，叫得鹽田仔
最後一個景點當然就係鹽田啦，不過真係好可惜，因為話復修緊，鹽田慘變成地盤
只好期待他日復修後既風貌吧！簡簡單單，咁就玩完晒鹽田仔既景點，時間係下午１點
但下班船要起1420先開，有排等了！起島上無聊冇野好搞，只好又黎一碗餐蛋麵
連飲品又係$35，今次應該係食環境多過食麵，望住瞭闊既大海慢慢享受，感覺真寫意呢
夠鐘，終於上船，返到碼頭只係1440左右，原本冇預算今日會有下半場既我
呢個時間究竟仲可以去邊好呢．．．．．．









後記：
鹽田仔，原本想等埋朋友先一齊去，結果因為某ｄ原因黎唔到，唔緊要了
自己玩一樣過癮！島仔雖小，不過景點數量多，而且距離唔遠，難怪週末島上咁多一家大細
再加幾團學校既導賞團，整個小島又迫滿人了！

＞＞＞＞更多圖片＜＜＜＜

ＴＨＸ　ＦＯＲ　ＲＥＡＤＩＮＧ ．