突然之間走多轉．輕遊馬鞍"後花園"

上回講到：玩完鹽田仔落船先係1440，淨返大半日，去邊好呢？
冇計劃過既我一時之間都唔知仲有邊到好行，結果山友簡單一句回應．北港上昂平落馬鞍
一言驚醒夢中人呢！居於馬鞍山既我一直對自己既"後花園"都興趣不大，幾乎連香港有座馬鞍山都唔記得了
就係因為山友簡單講一句，就成了今日既下半場．馬鞍山昂平大金鐘！


知道左要去邊之後，就快快趣咁搭架車去北港起步，沿車路走到小水壩前進入山路
唔使一小時已經去到昂平，連自己都估唔到咁快呢！沿平緩山路走到觀景台
第一次到觀景台既我即時比眼前既景色呆住了！山下既西貢市，遠處萬宜水庫
側邊既大金鐘，仲可以望到今早玩過既鹽田仔，雖然要落足眼力．．．








起昂平高原之上兜兜轉轉左十幾分鐘，都係只1610，真係冇理由咁早就落山
但係附近就只係得座大金鐘叫近近地，考慮到自己一身出街look，鞋都只係一對平底鞋
實在冇乜信心走上大金鐘之上呢，不過睇黎我既擔心都係多餘，又只係廿分鐘既路
已經由昂平走上崎嶇既大金鐘山頂，回頭一望，昂平高原，一個廣闊既大平原出現起眼前
行山行在昂平之上都唔會覺得昂平咁廣闊，山頂回望，感覺又係煥然一新
另一邊仲有馬鞍山突出既山勢，山頂風景實在太好睇，行得既位唔多，反而坐左起到睇左廿幾分鐘
要落山了，返回麥４，向馬鞍山方向走人了！













後記：
起我以前仲未熟悉香港咁多花款既行山路線之前，馬鞍山上昂平落菠蘿輋，
係我由細個跟老豆行，到中學同朋友行都會行既路線，但昂平既觀景台卻一次都未去過
更莫講欣賞附近既景色，人大左，視野真係會唔同左，感受亦都唔一樣
以前唔會留意，望一眼就算既景色，原來要慢慢細味，先會搵到佢優美之處
今次突然既行程，的確冇黎錯呢！

＞＞＞＞更多圖片＜＜＜＜

ＴＨＸ　ＦＯＲ　ＲＥＡＤＩＮＧ ．