警告：路線須要穿林．而且略有攀爬位置．遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

清水灣全走未夠喉？今次玩轉大嶺峒！

上年仲夏起烈日底下全走清水灣，雖然只係郊遊徑，但暴曬底下都不得不俾兩條郊遊徑一個五星！
而上年原本已經會去既藏佛峽，上年當然去唔成，之後亦一直冇左件事，只怪我係個唔用腦既人吧！
到左２０１４年，上年玩晒自己想去既地方，今年要諗尐新路線真係諗到頭都爆埋
又搵左幾晚人地既遊記，偶爾望到大雞坑，即刻勾起上年熱爆既回憶，原來仲有個藏佛峽！
結果再搵搵附近有尐乜，又再多個餓死雞，個名咁搞笑既？背後係咪有段故？
既然有左路線，咁就起行啦，一次過行晒所有景點！


又黎上年同樣既地方落車，接上車路直達龍蝦灣，途中有一古代石刻，上年其實已經到過
不過今次點都要再去，因為搵料時見到其中一個香港石景．靈蛇汲水，上年錯過左
走到石刻，真係嚇一跳，吹５級東風既今日，成個海岸都翻起驚濤駭浪，大獲啦，預計今日會綑果條邊仲綑到嗎？
望完靈蛇汲水，其實點望都望唔出，前人話係就係啦！之後就直上龍蝦灣郊遊徑
上年仲夏行唔夠５分鐘已經得返半條命，相比下，涼快既今日真係輕鬆得多，
直上到大嶺峒景點式石景．飯團石，行左邊隱徑再次落返山，路徑幾明顯，下降大約廿分鐘左右
望到左手邊有一峽，我仲以係就係目的地，結果轉錯左彎落峽，落到去其實已經知唔對路
不過既然已經錯左，不如就錯多少少，再行入尐睇下有尐乜，咁就真係錯有錯著啦
郊遊徑上面望到果幾個無名小島．呢邊可以近距離望望，再加上原本天陰陰既天氣又突然放晴
突然既藍天碧海實在今人陶醉！行錯路？錯得真好呢！




之後當然要原路返去分叉路口，向另一邊山脊進發！未見到藏佛峽前就已經見到大雞坑
雖然係小澗一條，但真係好出位，回個頭一望，藏佛峽！今次呢個真係藏佛峽啦！
沿小徑直出鐮刀狀，又尖又窄既山脊，走到盡頭望返對面山崖，藏佛峽～坐佛崖
一個山界幾出名既石景終於出現眼前，峽中藏一佛，前人既幻想力真係比我強得多！
當然只起脊上面望坐佛崖又點會好玩？起脊上其實已經望到有兩條木，相信落崖底既正確路徑亦起呢到
小心翼翼咁攀落崖底，又再起另一角度望坐佛崖，不過今日真係太大浪，自己實在唔敢太近海邊
搵位上崖望又搵唔到，結果今次捕捉唔到神似既角度，呢樣就係角度既重要性了！
上返去鐮刀脊，望埋另一邊既海岸，大浪都有大浪既好，原來已經識噴水既噴水岩
今次竟然噴出個幾層樓高既巨型水柱，實在好壯觀！原本自己計劃既路線係綑邊過去大雞坑
不過今次實在唔敢犯險，以今日既浪濤，就算游水高手都難以同大自然匹敵吧！
所以之後就行山路繞過海岸，冇得近距離欣賞大自然噴泉了！









山路過後，就係大雞坑小澗既入口，網上資料真係少之有少，不過見其他人都係落澗居多
向上山方向應該都唔難應付吧，不出所望，成條澗都冇乜高瀑水潭，初段亦似石河多過石澗，難度只值一星！
輕鬆上走半小時，出澗接返郊遊徑大路，再登大嶺峒，之後就係餓死雞，邊個改既名呀？真係好搞笑！
大雞坑山路出口十步內就係餓死雞山路既入口，好快就上到山頂既斷標，之後又要剷林
呢排真係剷林剷上癮=.=！剷足半小時後，到達大嶺峒既最後一個景點，呢個就係二戰用過既海防測距站
其實咪姐係暸望台！遺跡受盡風吹雨打，日曬雨淋都冇人理，難得都仲可以咁新淨
連牆上面既迷彩色都仲望得到，測距站背後亦有一個小型防空山洞，望過晒就接另一邊山路走
呢邊就明顯得多了！輕鬆返回郊遊徑，去返今日早上既起點，都只係16:20，時間有ｄ早
於是起相思灣巴士站再上埋釣魚翁，咁就岩岩好玩到一日，清水灣，真係好好玩！









後記：
「新」相機起上次水戰大嶼之後就壞左粒掣拎去整，好彩廷長左保養期，連換埋零件一蚊都唔駛
所以今輯相就用返舊相機黎影，估唔到舊相機冇花冇污漬，狀況仲好過部「新」機
證明以前行山我行得斯文好多ＸＤ！又難怪，以前一直都只係玩郊遊徑，乜野叫攀崖，綑邊，通通都唔識
就好似今次既路線，以前既我一定唔敢去，不過前人又真係講得岩，唔付出邊到有收獲？
往往尐險線景色都係比一般郊遊徑既好得多，難怪幾危既線都會有人玩啦！

ＴＨＸ　ＦＯＲ　ＲＥＡＤＩＮＧ ．