![[bomb]](https://hkbf.org/images/smilies/Bomb.gif "Bomb")
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<
芝麻籠洞小天池．東北海岸五咀遊！
新界東北既海岸線，上年行過火紅海岸黃竹角段同大水湖段，又綑過西流江，今個月初亦玩埋鳳凰笏海岸
一整條二十公里多既海岸線，不足一年都幾乎完全踏足過，新界東北既所有景點似乎亦都玩晒
搵完又搵，終於又搵到一條「冷門」路線．東北五咀！相信亦係我踏足東北海岸當中最後既一段
此線冷門在於網上遊記真係少之有少，就只係得山野樂逍遙一篇較為詳盡，想事先了解路線變得困難重重
不過既然其他人都行到，亦表明唔會太難行，相信自己都能夠完成到！結果，夾到潮汐，夾唔到藍天
不過此線的確幾好玩，下次好天相信會黎玩多次！
早上到粉嶺等待入鹿頸既小巴，原來搭小巴一句唔好意思就可以打尖的，結果一架小巴坐足18人，好彩唔關我事
次次都以鹿頸做終點，反而做起點，咁多年以黎真係第一次，又係雞谷樹下，又係鳳坑，又係谷埔
一年都總會有一兩次經過三條村，之後走上山路，左轉墓地，直達小碼頭，開始五咀之行！
第一個咀．亞公咀，咀既盡頭更有個連島沙洲，今日大潮退底下，好難得可以綑埋出去個小島之上
地圖上標示有個海洞，結果洞係搵到，但細得失望！環走小島一圈後就進入亞公灣既泥灘
綑邊路線當中自己就最唔鐘意行到一腳泥既沼澤泥灘，好彩都有山路避左大部份！
花一點點時間走完個大海灣，之後就係第二咀．企山咀，地圖上又有一個海洞，今次呢個就有尐睇頭啦
一個唔算近海邊既山洞，洞口就似係一道門口咁，網上望過，名叫芝麻籠洞！
之後進入榕樹凹灣，榕樹凹既荒廢村落一直都冇乜留意過，難得綑邊黎到當然值得入村行下
再原路出返碼頭，橫過堤壩，跟住就係第三個咀．三角咀，先係岸邊一隻慘死既八爪魚
再黎叢林邊嚇到我彈起又嚇到佢彈起既野豬，好彩我夠霸氣，野豬速逃，仲諗住同佢影返輯沙龍添
三角咀過後就係兩道相對既小堤壩，亦係大深涌海灣，堤壩過後又係討厭既沼澤地
小心翼翼過完沼澤，就係小草原，根據山野樂逍遙所講，草原上既挖泥車默默守護左草原多少個年頭呢？
接上一段破舊既水泥小徑，黎到長排頭，岸邊既小天池，就係今次綑遊五咀既目的
睇相都已經覺得好特別，親眼望到，更令我唔捨得走，天池外亦有一段石灘可以走
一個水池配一個凸出既石灘，一個好獨特既景象！
可惜既係燈塔並唔係石灘之上，冇辦法一探了之後就係新舅埔角，呢到可以近距離望到鴨洲同細鴨洲，轉入滘仔既海灣，就係第四同第五個咀．水站咀，上角咀
出面既小島就叫長石咀，不過連今日只得１米高既低潮汐都冇連島可以過到去，似乎都冇機會一遊
上角咀過後，就沿水管旁直達鎖羅盤，今日既主題路線就此結束！
不過呢條迂迴既綑邊路線，慢慢行既我都只係綑遊三小時就玩完，到鎖羅盤都只係1335，太早了，所以追加一年點都要到一次既荔枝窩
到荔枝窩諗住好好地大休，卻引黎一家大細，可愛到極既狗仔黎黐餐，結果本身已經唔多既食物都奉獻晒比佢地
預計過時間，最終決定以烏蛟騰作為終點，行多一段未行過既亞媽笏山徑，趕及烏蛟騰開1645既小巴
嗯！好玩既一日！
後記：
文章開頭話呢條線係冷門線，文章既結尾，我相信呢條係熱門線！
綑邊路線當中，通常都係一條引路絲帶都冇，不過東北五咀，沿岸都有不絕既絲帶
明明有人玩，點解網上遊記會少得咁誇張呢？
ＴＨＸ ＦＯＲ ＲＥＡＤＩＮＧ ．
![[photo]](https://hkbf.org/images/smilies/Photo.gif "傾偈無圖無偈傾")
![[sosad]](https://hkbf.org/images/smilies/icon_sosad.gif "So Sad"){kind=icon}
