警告：攀登老人南崖右崖帶危險性．遊記只屬分享性質．新手勿試！
>>>>今次路線>>>> (因為途中ＧＰＳ熄左，路線紀錄只有一半，不過兩個主題景點都起條線入面)
＞＞＞＞更多圖片＜＜＜＜
>>>>更詳盡的遊記在此<<<<

---

老人南崖輕易攀．芝麻石林闖網關=.=

無限上網，對於一眾手機用戶黎講可謂方便又抵用，但對於行山客黎講，可謂一場惡夢！
大嶼山唔少地方都已經踏足過，但芝麻灣半島卻一直冇計劃過，見上星期有山友跟「週二」玩過此線
今日又黎跟到十足既路線行返次，除左標題既兩個景點之外，成程郊遊徑路段都真係悶到爆炸
好彩易行又唔算長途，只為呢兩個景點都值得黎一遊！


第一次黎貝澳，沿芝麻灣道車路前走，途中已經可以一望廟仔墩同老人南崖既精彩山勢，過天后廟後直走
向望東灣方向走大約15分鐘就會見到左方明顯山路，此山路就可以直接登上郊遊徑，算係一條方便既捷徑
上望廟仔墩，已經可以望到整幅老人南崖，沿徑走至小石橋，至此就要接上頗密既坑澗上攀
只係上攀幾分鐘左右，石塔，巨壁出現，山下望起黎已感覺到壓迫感，沿澗上又濕又滑，其實唔算好行
所以決定轉向右邊山脊攀石又穿林咁上，其實段路連少少路胚都冇，但起碼唔駛濕腳先
逐漸走近南崖，開始見到南崖右崖下面既小石河，雖然已經知道自己偏離左網上其他人既路線
不過只要向著石河既方向前進，原來一樣可以黎得到石河，此石河非常短，只係上走幾分鐘已經玩完
隨即接上南崖右崖底上攀，難度唔高，危但不險，左望亦可以欣賞一瀉而下既南崖左崖
到崖壁中間就要接樹帶棧道橫移，又只係十幾分鐘已經攀到崖頂，再次接回頗密既叢林前進
好快就返到郊遊徑，輕鬆直奔到老人山山頂！








先起老人山頂休息一下，之後落山下降到龍尾，開始享受今日免費無限上網既服務，乜野網？當然係蜘蛛網啦！
上南崖穿林都冇得上網，但竟然起郊遊徑既大路之上會極速連線，由龍尾向下徑方向走，繼續都係悶爆林徑
望到山下既大浪灣之後，終於都有返ｄ開揚位，遠望長洲，上望巨石，下望仲有起海上既肥豬石
前行一小時左右，終於黎到芝麻石林，先跟絲帶下降到芝麻石林下段的動物園，但前進之路又係一場惡夢
隨意執一支樹枝做個拆網專家，避免再上網，短短路途已經拆散左唔少蜘蛛既家園，黎到下段動物石林
居然一ｄ幻想力都拎唔到出黎，大石一個接一個，就係認唔出動物既樣，草草影過幾張相後
原路拆返再上石林上段，入口回望就見到石頂樹，進入石河數步就要向右轉，之後大部份時間都係穿越石隙上走
終點就係芝麻石林既地標，據說係香港最大既呂字疊石，係咪最大就唔敢講，但起碼都有兩三層樓高
欣賞過後，原本係想繼續向山上走，但眼見前路極誇張咁出現十數個蜘蛛網，今日食網都食到飽晒
只好選舉原路拆返到郊遊徑，繼續悶爆既郊遊徑上網行程，之後黎到拾塱水塘，再去涌口返回貝澳
欣賞一下自己平時行山都好少見既水牛群，完成今日幾好玩既行程！













後記：
聽見個崖字，仲以為會係ｄ險野，原來右崖真係冇乜難度可言，相信真係險既路段應該起晒連崖棧道果邊
而芝麻石林呢，起現場一隻動物都唔見，但搭車睇返ｄ相先發覺動物既存在，石林本身唔算大
補飛既話好似都幾無謂，唉．．．
另外芝麻灣半島上既郊遊徑，其實都係一條越野單車徑，今次「視察」過條路應該幾好踩
但沿途真係冇咩景睇，睇黎將來踩車的話都唔會選擇佢啦！

ＴＨＸ　ＦＯＲ　ＲＥＡＤＩＮＧ ．