警告：行澗多屬危險玩意．遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

不到長城非好漢．不到馬大非英雄～！～！

想做一個好漢，據說去一轉長城就可以做到，但如果係想做英雄呢？除左時勢可以造英雄之外
走一轉馬大石澗一樣做得到，尤其係春日天氣回暖之後，群蛛出動，要做一個滅蛛英雄真係一ｄ都唔易！


今日一早就起左身，原本係計劃玩青龍石澗上大東天池，不過早上天氣認真麻麻，行澗似乎帶點危險性
最後，紅van話去睇都冇左件事咁，所以都係決定睇返轉早場！
衰得佢丫，睇完戲出返黎，世界好似重生一樣，太陽伯伯向我展露溫暖既笑容，冇理由再流連起街到
即刻飛返程巴士返屋企換件衫，連晏晝飯都冇食就出發入澗，青龍太遠就冇辦法去啦，唯有近近地
玩返轉近期hit爆既馬大石澗。
由大水坑村後既引水道入澗，原來落引水道果一下係咁吸引途人目光，唔理人啦，開始沿澗而上
下游都真係幾悶，不斷起大石上跳黎跳去，其實大石都算係呢條澗既特色黎，去到石拱門就要穿門而過
過門後下游開始精彩，穿梭大石之間既飛瀑，仲有流水侵蝕而成既水潭，講緊既當然係貴妃池
平滑而又充滿流線形既岩石，足見流水沖刷既威力！










過後再上一段澗途就到達中游水壩．．．原來係呢到，中學時期曾經起側邊車路踩過單車上黎
果陣仲係路痴既我，原來已經一早黎過馬大，不過果陣連乜野係石澗都唔知，絕對係一個白痴黎！
起水壩右邊越過水壩，上望已經見到精彩既崖壁，就係宏偉既英雄崖啦！落返澗，澗途開始崎嶇起黎
崎嶇，亦即係代表會有更多既流瀑出現，到左一個超巨型大石側邊，就會見到水簾瀑，今日水量唔算太勁
水簾瀑好似唔太精彩，之後就要入林繞道，穿越巨石上瀑頂，瀑頂之上，就係一系列以英雄命名既景色
英雄瀑，英雄崖，英雄潭，回望水簾瀑下剛才講過既巨石，就係英雄石，同英雄有乜關係？
相信冇人知，應該係話我唔知！但就以英雄瀑黎講，起眾多石澗當中都算係特別既一條
因為真係甚少見瀑布可以將岩石侵蝕成一深溝，似乎馬大既岩石都幾唔夠硬淨！之後就係是日最「險」既一段
上攀英雄瀑崖，其實側邊似係有山路可以繞過，不過唔搵野爬下手腳都會痕，原本以為唔容易上攀
但其實手腳位真係多到你唔信！







上左第一層瀑頂，嘩！乜真係咁容易，網上仲評左此澗為三星，點解會覺得比二星既屏南仲要易
瀑頂就可以望到第二層既英雄瀑，回望下面既英雄深潭，好靚！上望瀑布左邊幾層樓高既英雄崖，好壯觀！
走過英雄之地，自己都即刻變成真英雄啦！




上游見網上大部份人都唔行，咁我都唔行啦，起英雄瀑頂離澗，接上村民墓地既小徑直出燒烤場！
剛剛成為英雄既我緊係要留返ｄ英雄事跡，咁真英雄先可以流芳百世，講緊既當然係拆除沿途所有僭建物啦
所有一直冇交地租既蜘蛛，一下子就痛失家園，果然係英雄非好漢呢！


後記：
以前都冇話會勁食蜘蛛網，今年情況好似特別嚴重
但掉返轉頭諗，其實以前都冇好似而家咁玩咁多隱徑穿林既野
似乎都要習慣一下點樣食蜘蛛網先夠好味了！


ＴＨＸ　ＦＯＲ　ＲＥＡＤＩＮＧ ．