警告：溯澗帶有危險性．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

炎夏消暑睇瀑布．精彩藏龍藏幽瀑

大半個５月比雷神玩晒，終於都有返一日藍天白雲，係時候追返晒計劃玩又玩唔到既路線
講明先，藏龍同北龍都係一早計劃左會玩，絕無跟風之嫌疑！ＸＤ
原本計劃今日一日裡面玩晒兩條龍，不過趕走左雷神又黎個太陽神，高溫底下
只係落條呻吟徑都已經呻晒吟，根據唔少新聞報導過既意外，逆天而行都係唔會有好結果的
所以玩完藏龍就提早走人，半日遊其實都唔錯丫！


又係黃龍坑道既車路，行到盡頭就落澗，一黎就左右都有水壩，左邊北龍，右邊黃龍
沿澗上溯黃龍石澗，下源一大段平緩易行既澗途，真係唔會估到黃龍會有三險咁誇張
行一段就見到有舊刻左個「靚」同埋「臥龍石澗」既大石，呢到就係臥龍支澗既澗口
不過講明係三大險澗之一，似乎有生之年都唔會夠膽玩，繼續上就開始有小水潭
大嶼山澗既優質靚水質真係異常咁吸引，澗水行到既都走晒去澗水行，冰涼既感覺
一下子暑氣全消！沿澗行半小時左右，右邊就有一條支澗，呢到就係藏龍既入口啦
不過唔好咁心急入澗，繼續沿黃龍直行而上，再多十幾分鐘左右就係黃龍主瀑
終於都可以一睹好靚既黃龍瀑，同埋黃龍潭出晒名既「玻璃水」啦，碧綠又見底既清潭
咁靚既水質真係唔易搵，難得黎到，點都要浸一浸，天氣幾熱都好，浸一浸就可以涼到你失溫
泳池一定冇呢ｄ感覺！




欣賞完黃龍瀑，走返回頭路就正式轉入藏龍石澗，初段起林蔭底下，再加漆黑帶點濁既流水
感覺好似唔太吸引，不過唔好咁快下定論，唔駛十分鐘就望到巨瀑，此澗谷就叫做龍吟峽
好勁好有氣勢既名，而且唔係得個名架，之後係一瀑接一瀑連續五個大瀑布，絕無冷場


先黎第一瀑．天梯瀑，據說左邊大斜崖壁曾經掛有繩梯，個崖就順理成章叫埋做天梯崖
不過「天梯」已拆，上攀瀑頂就要靠右邊棧道上，有晒繩又唔算好難，上到一半
到達天梯瀑第２層，似乎比第一層瀑更加幽美，瀑頂就有一個大水潭，水潭後面就係第二瀑
一條冇名既斜瀑，雖然唔係咩野大落差既瀑布，但不減其幽美既感覺，上斜瀑就要沿瀑邊而上
再上又一個靚潭，再上又一個大瀑，呢個係第三瀑．龍髯瀑，瀑布上窄下闊將水流打散
令瀑布更具層次，更加可觀，右邊就有險要山路繞道上瀑頂！瀑頂回望，成個黃龍坑澗谷一覽無遺
仲有大東周邊既群山，夏日綠色既山真係好得人鐘意！










仲未完架，瀑頂處就係第四瀑．．．咁靚既瀑布竟然冇人命名，搞錯呀，呢條瀑布相信係全澗落差最大既一瀑
上攀就冇山路避，一定要正攀瀑壁，其實都唔算易上，小心為上啦，瀑頂就有一舊巨石
前人叫佢做鬼頭石，除左大，我實在幻想唔到佢似邊鬼個頭，鬼頭石後澗分左右
左右都可以溯盡到呻吟徑，左右源都唔好放過，因為左源都有一瀑，就係第五瀑．飛絮瀑
嘩！真係好野永遠在後頭，呢條瀑除左靚，我唔識點形容啦，打直埋部相機都影唔晒
之後就返去右源，都有一格仔狀既崖瀑，雖然格仔瀑一級級咁，但都幾濕滑，又係唔易上
過晒瀑布之後，就係一大段林蔭悶途，水量亦漸漸收細，冇得再浸水降溫既情況底下
林澗之上真係越行越熱，由格仔瀑行到出澗位，竟然花左一小時，之後再落呻吟徑
每次行都要望一望既觀龍台，今次真係望一望就走，最後落到山，呻吟徑真係會熱到呻晒吟
之後走返黃龍坑道，藍天白雲加高清，「好想繼續留起座山到」既心情又有邊個會明白呢？







後記：
與其睇我咁長篇大論又詞不達意既文章，不如上網睇人地ｄ遊記，既方便又快捷！
反正大家講既野都係差唔多姐ＸＤ
雖然只玩到一條澗，但係瀑接瀑既風景都幾值得人回味！

＊　呻吟徑．為遠足界之戲稱，實際係黃龍坑郊遊徑

ＴＨＸ　ＦＯＲ　ＲＥＡＤＩＮＧ ．

---

又黎AM730了