警告：溯澗帶有危險性．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

曹公表示．玩澗者嚴禁落水！(ﾟДﾟ)

淋浴在燦爛陽光下的一天，今日就跟隊玩條荒坑小澗，曹公潭同白石橋坑
前者聽過下，後者就要學港女咁問「咩黎架 」網上睇過瀑景好似幾好咁
雖然今日天氣真係熱得誇張，不過照跟啦！


由愉景新城後面既大明渠入澗，一黎到曹公就先警告大家條澗死過人，而且怕你睇唔到
同一個牌短短路途上就整左好多個，再者出發前又講到明曹公潭水質受污染
情況就好似你口渴，比杯水你望但唔比你飲一樣，望住條澗但冇得落水，烈日底下簡直係虐待
望落其實Ｄ水幾清幾靚架，不過上面有唔少村，只好承認污染係事實！

行一段闊落既澗途之後，就到曹公潭既大瀑，唔好再比污染影響心情，此瀑真係好有大澗風範
瀑高潭又大，瀑布夠澎湃，真係靚景，起瀑右攀壁而上，上面都仲有一道瀑布藏起山影底下
暗暗地正好黎個慢快門，睇完大瀑就繼續上，真係嘔血啦，越行越熱，一身濕晒
唔係玩潭玩水玩到濕，明顯係汗黎啦，流汗仲流得勁過Ｄ瀑布，見到排洪既建築物
小小既「陰間」都照樣要遮一遮，好快就到分源位，右上大曹，左上白石橋，入口唔太明顯
開始進入白石橋坑，澗道明顯比之前窄得多，過小橋底之後就有兩個大潭阻路
前一個要落水過，水深及腰又睇唔清腳底Ｄ石位，行過都幾驚下，第２個就有山路避
水質變好左嗎？但上面仲有村喎．．．







橫越下花山西竺林引水道之後接回澗道，幾乎乾水，又冇野睇，又悶又熱又焗
行過呢段真係要靠意志，因為靚景起晒上面，死就死捱埋佢啦！
悶左一段又再見到另一條引水道，上源既水就係比佢截到渣都冇，引水道後就係此坑既精華
終於都落得水啦，澗水冰爽涼透心，浸多一陣反而會覺得寒，同而家既天氣好大對比
因為係小澗，瀑布全部都冇人命名，全程亦都要起藤蔓森林底下穿梭，就環境黎講真係唔多吸引
但瀑景就非常精彩，一瀑接一瀑再一瀑，之後起中間既水潭到大休，浸住水真係舒服
但越浸越凍，原來真係會玩到失溫，頂唔順出返水先！





大休後再上，一路行Ｄ瀑景真係未停過
荒坑小澗有如此景色真係好難得，過晒瀑布群景區之後就變成平坦溪流，搵位出澗
嗯，跟呢個人玩真係無時無刻都要有剷林既心理準備，出澗完全係硬闖叢林
出返澗後見到山路，原來係「煤氣管道徑」，一下子就出到川龍，又一day！










後記：
坑澗，玩既人相信少之有少，若然冇團既話自己就更加唔會黎
大澗，全部都比行者開發晒，反而任何時間幾時幾多人都玩得
對比大澗黎講，似乎坑澗都有佢珍貴之處呢～！

ＴＨＸ　ＦＯＲ　ＲＥＡＤＩＮＧ ．

估唔到礦工兄未去過曹公潭探險

唔知港島區又有冇待開發既澗呢

btw,期待下一期《石澗遊記》

RE1317.ChLoe~* on 2014年6月5日 00:24:38: 估唔到礦工兄未去過曹公潭探險

唔知港島區又有冇待開發既澗呢

btw,期待下一期《石澗遊記》

石澗路線我上年先開始接觸, 今年先開始搵多D 澗黎玩
但其實加埋全港三百幾條石澗路線, 我到而家都只係玩左十幾條澗, 所以簽名檔到先話可以玩到好多年

港島區, 除左源起紫羅蘭山既紫淺(流入淺水灣), 紫深(流入深水灣), 紫潭(流入大潭)石澗之外, 大部份水質都已經被嚴重污染
水唔單至濁, 仲會發臭, 雖然睇過其他相都見有唔少瀑潭係幾出色, 但都依然吸引唔到行友去玩

下次跟隊玩, 就係西貢既鰂魚湖澗, 自己玩既就仲計劃緊