警告：溯澗帶有危險性．遠足安全最重要！以下遊記只屬分享性質．新手勿試！
>>>>鰂魚湖石澗路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

短澗一條玩一朝．仍未止癮已玩完．．．＠＠

鰂魚湖石澗．網上有記載既相都有唔少，雖然知道此澗係短澗，一心一意諗住都玩到３，４點，點知原來係短得咁緊要，已經係非常閒咁行，每一個潭都大休，但都只係玩到下午一點左右就落山，極度唔夠喉之下我曾經提議過不如玩埋田尾坑，不過見大家都似乎好盡興呢，所以都跟返大隊走人啦！好彩之後朋友都有ｄ野比我消磨下，磨磨下原本諗住下半場睇日落既，點知連最美既時機都錯過埋，真係失策到爆．．．


鹿湖郊遊徑側邊既橋邊入澗，一落就已經要即時落水行，數步之遙就到分源位，左秋楓，右鰂魚湖。一開始就要先上山路避一段，落返澗又要過對面穿一段竹林小徑，避開一段長潭，搞一輪終於都入返澗，先行下降一望小瀑，再浸一浸降溫，越過小水壩後就係一段平緩澗途，伴隨多到唔恨既小潭小瀑，但澗道異常咁跣，青苔又係多都唔恨，睇落平路咁款既澗其實一Ｄ都唔易行，好快就到此澗最精彩既大瀑，落差都有十幾米既獅子觀瀑，落左都幾多日雨，但水量依然麻麻，回走幾步攀上瀑頂，可以望下隻所謂獅子，其實真係唔似囉，過後都有幾口深潭小瀑，每個都浸下玩下，磨下時間！














之後左右分源，全部分源位都係行右源，一轉水量就已經急跌，其實臨出澗前都有一個高瀑，但幾乎乾水了。好快就會接上一條類似古道既靚山路出澗，真係快到呢．．．九點半前入澗，出澗都未到一點，不過出到澗後既萬宜水庫遠景，又真係靚到嚇親人，最後起萬宜路出返黎，時間尚早，勁想玩多場呢，不過最終都係跟大隊走人算了！






後記：
鰂魚湖石澗，似乎係ｄ玩到玩冇可玩既人，先會選擇玩佢，成條澗都好似冇乜比人開發過咁，但好奇怪地出澗位竟然會有條明顯既靚山路，究竟係少人玩定係太多人玩呢？．．．


ＴＨＸ　ＦＯＲ　ＲＥＡＤＩＮＧ ．