警告：溯澗帶有危險性．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

平凡小瀑小坑澗．不凡靚潭天書壁！

其實！頭１４隻字已經完美地講晒成條澗係點樣啦！

北龍石澗．的確係一條純粹「到此一遊」既石澗，玩過一次，分分鐘以後都唔會再黎，因為就景色黎講，實在太過平淡。不過此澗都有令人欣賞既地方，每一個潭都係清澈透底，再加上陽光透過樹影照射落黎，清潭更會出現彷如夢幻既色彩，完完全全將全澗既瀑景比下去！


入澗位又係起黃龍坑道車路盡頭，上次右邊水壩入就係黃龍，今次左邊水壩入就係北龍，一開始就要起水壩右邊輕攀上壩頂，一望入去，下游都已經有一個清潭，北龍既水質真係靚得好誇張，而獨特既溢洪道口就成為北龍入澗既標記。


開始上溯，流瀑形態好單調，水量亦都唔算多，澗水行都唔會太深，大約半小時澗途左右，終於有一個小瀑布加一口深潭，望落估計都有兩三米深，但就完全見到底，終於都可以黎個全身一浸，行到滾晒既我即刻消暑，而且潭內既小生物都有唔少，只係浸下都好似同佢地開party咁。而且再加多個陽光照落黎，潭水即時變成藍綠色，超靚！





小休過後就起右邊山路上瀑頂，之後就係全澗唯一一段開揚位，但可惜崖瀑水量不足，又係麻麻地既景色！繼續都仲係一堆流瀑，最後起一個靚潭一浸降溫，之後就再冇得浸水了，水量亦大為減少，而且又係越上越陡，冇水，冇潭，冇風，開始行得比之前辛苦好多，最後天書壁之前仲有一塊惡搞濕壁，繩已斷，只能靠樹而上，估唔到北龍尾段完完全全唔似一條２星澗！







幾經辛苦終於到天書壁，依然未能夠欣賞到天書壁中既瀑布，睇黎要好大雨之後再去先係時機，起壁左有條垂直既樹根崖峽可以上壁頂，因為以前黎過，再次攀上就冇難度啦，終於都出澗啦！出澗陣陣清風吹埋黎，個人曬住都反而即刻低幾度，上次玩白芒澗落山直到白芒，今次就試下新路落東涌，係難行ｄ，但果然快好多，下次都係唔好落白芒啦！









後記：
唔經唔覺，原來東涌五龍入面已經玩左三條龍，下次再玩應該都係黃龍啦，而臥龍呢，相信自己冇能力玩了

ＴＨＸ　ＦＯＲ　ＲＥＡＤＩＮＧ ．