警告：行澗屬高危活動．遠足安全最重要！以下遊記只屬分享性質．新手勿試！
>>>>今次路線>>>>
＞＞＞＞更多圖片＜＜＜＜
>>>>更詳盡的遊記在此<<<<

---

劣地暴曬遊大澗．精彩群瀑匯乾白

乾白石澗，又係一條位於青山腹地既石澗
乳白混濁既溪水，以浮沙為主既河床，都係一貫腹地群澗既特色
然而乾白石澗瀑布眾多，相信係腹地群澗入面最精彩既一條！

前一晚計劃路線，原定今日一係黃龍龍尾瀑，一係就坳背灣坑
但都未搵齊料就已經收到短訊玩乾白，又一條想玩既澗，即刻轉過黎玩。


入澗位起鴨仔坑魚場附近，望多兩望，原來年幾前玩「劣地尋標」時已經黎過一次，
臨入澗經過雞場時比狗狗熱烈歡迎，狗狗更一直跟到雞場側邊入澗先收手！
一落澗，又係沙澗模式，叫金沙坑，個名係幾貼切，但澗途同大冷水幾乎都係一樣，冇咩自己既特色。
過埋個小水壩之後就正式似返條石澗啦，沿途大石處處，而且上溯一陣，經過一右一左轉就到乾白第一瀑，銀絮雙瀑
叫得雙瀑當然又係有兩條瀑布啦，最特別既係兩個瀑布同樣都可以走到瀑底，
左面既下面有一個小潭，瀑布流勢較弱，起瀑底感受絲絲水力都幾舒服，而右面既瀑布就顯得澎湃好多，瀑底冇潭但水力甚大
玩完瀑降下溫，可以起瀑左輕鬆上攀，回望瀑底，其實就咁望溪水真係幾濁，不過因為附近冇村落等既人為設施，其實澗水都算係潔淨既！





過後就係一段流瀑眾多既澗途，只係好短既一段，又有另一瀑啦，呢個就係石盤噴瀑！
瀑流經過多少歲月後，將巨壁切割成一深隙瀉落，同馬大英雄瀑一樣，明顯都係一個侵蝕出黎既瀑布，
瀑底有一平滑石台，又係可以走到瀑底感受強勁水力，打起身上更加會令人透唔到氣，
由於平台太過平滑，離開平台亦只能滑落潭中，精彩又好玩既一瀑！
而瀑布右邊仲有一個成直角形既平滑乾壁，雖然並冇流水置於其中，但係壁上被流水沖刷出黎既坑紋非常清晰，又係要唔知幾多年時間先可以做到
之後起右邊又係好輕鬆咁上到瀑頂！續行就係一段較長既澗途，先有一個小水壩，再有一段流瀑帶，
由於澗道明闊，沿途真係極難搵到樹蔭，難得搵到小樹蔭位，提早黎個大休。







之後就發現澗道左右分源，續行右源幾步就即刻到水梭瀑廊，原來呢到有一個大樹蔭位，早知起到大休啦！
水梭瀑廊，水潭置於坑峽當中，峽盡有一幽瀑，由左壁橫移過潭回望，「水梭瀑廊」呢個名真係完全解釋晒成個格局
瀑後澗道左轉，就即刻到乾白最後一瀑，斜縫瀑。又係一個有趣既坑瀑，據說仲可以起潭後沿瀑穿石室而上，
不過都係行完之後先知可以咁玩，右壁又係輕鬆咁攀上瀑頂，之後再行多十分鐘左右就會起澗左搵到出澗位
呢一刻．．．惡夢開始！








青山腹地既特色，除左沙澗同濁水，仲有就係裂谷，浮沙碎石同極少樹蔭，前者起碼都仲有水可以降溫，後者就只有捱，只能撐！
出澗後上山，原先全身濕透既衣服一下子就乾透，然後再一下子流汗流到濕透，幾經辛苦終於上到杯靈雙渡既山脊上，
一出黎側邊就已經係一線脊，但眼見前面仲有座乾山，出事啦，咁熱咁曬再上山肯定中暑，好彩左邊有捷徑直落紫田村，
中間仲有紫田坑可以再一次降溫，自己好似冇乜野中暑感覺，但行友見到我谷到紅晒，仲以為我死得．．．
最後點都要沖返個涼醒一醒個人先得！



後記：
似乎青山既澗都係要等秋涼少少先可以再玩，起澗入面冇乜所謂，出澗真係咪再咁搞細佬啦ＸＤ

＊乾白石澗．乾讀作乾隆既「乾」

AM730：乾白石澗 By 樂思

ＴＨＸ　ＦＯＲ　ＲＥＡＤＩＮＧ ．