嚴重警告：黃龍三險極具危險性．以下遊記只屬分享性質．勿亂跟亂試！
>>>>今次路線>>>>
＞＞＞＞更多圖片＜＜＜＜
>>>>黃龍石澗上游及詳盡遊記在此<<<<

---

勇闖三險．直搗黃龍～～～！

成個９月虛度左幾個假期，連自己都覺得忍無可忍，所以決定玩大佢，黎一次全溯黃龍石澗！（跟風就跟風啦ＸＤ）

再次起黃龍坑道盡頭入澗，上次玩藏龍行過既黃龍下游今日又要行多次，下游難度只值一星
除左臨近黃龍瀑有少量攀爬之外，其餘都係開揚平緩既澗途，上溯40分鐘左右就到黃龍主瀑啦，颱風後行澗，水量都算係合理，
見到玻璃潭更冇可能唔浸，影瀑布就一定係指定動作，而今日煙霞極大既天氣，影完條瀑布睇返
非常似「柔焦」模式咁，背景矇矇的，感覺好有詩意！


欣賞過緩緩落下既黃龍瀑後，瀑左就有一條值三星既山路上攀，有晒繩又足晒手腳位，上攀可謂無驚無險
瀑頂上就係中游位置，澗道些微收窄成一巨峽，兩旁盡是高聳直立既崖壁，置身在峽底澗中，氣勢之磅礡實在係無澗能及！




經過一段澗途後，就到達由三條龍瀑組成既三龍峽，先係左龍爭珠，亦即係左龍瀑，
由瀑底上望到瀑頂，總落差肯定比起梧桐寨既長瀑更高，瀑頂更加係與天空連接起來
以「精彩」一詞黎形容明顯都已經不足夠，原本想登上左龍瀑第一層慢慢細賞，但發現即使有繩上攀都唔容易，
原路落應該更加難，都係無謂亂試…





左龍瀑後，只係數步之遙，右邊又有一瀑，順利成章此瀑當然叫做右龍瀑，瀑布高度亦可媲美左龍
但完全係另一種感受，飛絮如絲般分散落下，瀑高但水流毫不喘急，係一條非常幽美既大瀑
走到瀑底，水花輕輕灑起身上，比起花曬水龍頭更感舒暢！




再前行峽谷盡處就係龍尾瀑，網上講話有一密綠色深潭，似乎係以前既事啦
而家果到比巨石遮晒個潭面，已經睇唔到個恐怖深潭。


睇晒三龍峽既瀑布，之後就係山界出晒名既繞道．黃龍三險！
就係呢三險，將黃龍石澗難度由一兩星，直接推高至四星之上。

先係第一險，已經名存實亡既藤梯崖，藤梯已被拆，右邊有新加既粗繩直上，但更覺兇險，而左邊則有新開山路登上第一險
雖然話係名存實亡，但新山路本身都並非善類。


山路之後接住就係第二險，兇險情況更進一步既懸壁棧道，一條幾近垂直既直崖裂隙，雖然設有繩索輔助
但依然充滿難度，而且上攀距離長，背後接近十多層樓既懸空感更係相當嚇人
上攀到頂層就係觀龍台，可以望到整條右龍瀑，一大段黃龍澗谷，左龍瀑既上瀑，仲有可以下望懸壁棧道
即使已經完成，但其腳軟感覺仍然絲毫不減






最後就係第三險，蛇倒退，照字面解係話蛇都上唔到要退，但經過左懸壁既考驗，再上其實都已經唔會驚
不過都要小心蛇倒退下都係萬丈深淵，不容有失。



三險之後左邊就有出澗山路，但全溯的話就要行右邊落返龍尾瀑頂，瀑頂位原來又有一支流，
左邊係龍嚎，右邊先係黃龍，接入上游開始，澗道進入原始林中，而且開始上陡，雖然唔難但行起黎無風無潭都幾辛苦，
最後澗道隱沒於林中，此時就要直接踏上草坡山脊硬剷出澗，接回鳳凰徑後就點走都得啦！

後記：
闊別多時既大東山爛頭營，原本落左呻吟徑既我都忍唔住回頭上返去，點知雷暴既發展，
將我獨占大東山既計劃完全打消，最後仲要跑落山，太耐冇跑了，去到伯公坳仲要抽埋筋
雖然最終都係落唔出雨，不過起高山上都係早走為妙！

ＴＨＸ　ＦＯＲ　ＲＥＡＤＩＮＧ ．