呢次我搭嘅係枋寮往台東方向嘅3671次普快車，呢班車每日10:50係枋寮站發車，呢個時間即使坐由香港出發最早開往高雄嘅機，去到高雄轉車去枋寮都無可能趕到上車，所以建議想坐呢班車嘅版友可以早一晚到高雄或枋寮投宿，第二朝早啲起身再去枋寮上車。我個陣就早一晚搭尾班港龍去高雄機到高雄投宿一晚，然後第二朝坐3511次區間車(實際上應該係復興號)10:31去到枋寮轉上3671次。
當日由R128柴電負責拖3671次藍皮前往台東
藍皮車廂係不設冷氣，旅途中乘客只有車廂頂嘅風扇同沿途嘅「生風」降溫
準備出發嘅3671次藍皮同剛到達終點站嘅3511次復興同月台見面20分鐘，就要分道揚鑣
離開枋寮後就到達加祿站，3671次會係呢個站太約停留7分鐘以待避後方列車先行通過，係呢段時間列車長會提示乘客可以落車行下，到開車時就會提醒乘客上返車繼續行程
南迴線上山後治途都不斷係隧道同峽谷(好似係)間穿梭
由於南迴線大部分路段屬單線雙程路段，3671次去到枋野站就會停車等候大約6分鐘，等候同相反方向行駛嘅自強號交會(枋野站屬號誌站，無正式月台同埋唔辦理客務，所以乘客唔可以係呢到落車)
同自強號交會後，3671次就會進入枋野二號隧道
由於唔記得需要待避定交會嘅列車有延誤，所以3671次係大武站再次停留咗一段時間，乘客又可以把握機會落車行下影下相
係大武站開車後係車尾往後展望
過大武站後就開始同台9線公路並行，同時開始睇到太平洋景色
係瀧溪站同金崙站之間，3671次會經過堪稱台灣最靚海景車站嘅多良站，不過呢個站只有觀光列車有機會停靠，3671次唔會係到停低，所以要把握列車通過幾秒間嘅時間係到影張相啦
停靠埋太麻里、知本同康樂站，3671次就完成近3個鐘車程到達終點台東站，呢個時候R128柴電同藍皮脫勾，R120柴電亦係3671次到達後馬上從車尾掛上藍皮，準備黃昏回程3672次普快車
^沿途其他相片^
題外話，呢一次藍皮旅程，我認識咗呢班車嘅值班列車長，呢位列車長知我對台灣鐵道有興趣後，就送咗佢自己拍攝嘅兩張postcard同埋一個佢哋鐵道愛好者組織嘅鐵章俾我，而呢位列車長敬業樂業嘅精神亦好令人佩服
*有留意台灣鐵道嘅朋友應該都睇過無數次南迴藍皮遊記甚至已經坐過佢，不過都好多謝你哋仍然肯花時間睇呢篇劣相劣遊記
