（以下部份相片由手機拍攝，質素未必最好，敬請原諒）
最先講一講仙石線用車：
普通用的 205 系 3100 番台，2002 - 2004 年由山手線及埼京線轉過黎，全車 4 卡有一個廁所在第 4 卡，
主色為仙石線的藍色，而部份車一半坐位改裝成卡位，外表就使用代表仙石線四種風景的紅橙紫綠四色作為主色：

（上圖為 DV 影片截圖）
對於坐開 Citylight 的人黎講係長凳定卡位都係天堂，不過卡位椅背比較高，坐足全程個半小時會比長凳舒服及無咁累
張凳坐感就幾好，但部車加速衝動都幾厲害，而單線路段路軌狀況唔係太好，加上使用短軌關係如果無乜客部車都搖得幾厲害，
例如由東塩釜駅去陸前浜田駅期間車掌會巡一次車，有時見搖到車掌都企唔定

仙石線內部份直線路段可以跑至 90 km/h（甚至如果追時間可跑到 100 km/h），但都只係少數路段，
大多數路段因為時間表鬆動，加上部份多急彎，所以都係係開 70km/h 左右

「仙石東北ライン」快速就用 HB-E210 系新車，在開線時的 2015 年 5 月尾開始載客

每兩卡有一個廁所，因為機件關係車內都頗多陣柱；全車使用卡位，在車門附近就有兩人橫位，而所有車卡都無編定係第幾卡，
基本上係 4 卡一抽形式載客，但日中非繁忙時間會有一個來回係 2 卡載客，車速全線最高大約 95 km/h
始終新車乘坐感都幾好，例如開車即使一野推到盡都可以做到無衝動，慢慢咁開始加速；在仙石線內明顯無 205 系咁搖

---

我地由頭車開始搭


由あおば通駅出發 頭幾個地底站基本上都係一樣樣
發車音樂使用由榊原光裕所製作的「青葉城恋唄」發車音樂版，認真係幾好聽


在路面由あおば通駅出口行去仙台駅入口大約需要 5 分鐘左右
就咁講好似好近，不過由於仙石線月台係地底，所以由仙台駅入口再行落仙石線月台要再行多 5 分鐘
當時正值仙台七夕節，所以除了街道之外，仙台駅內亦掛起了巨型的「風幡」裝飾

係上圖位置穿過閘口之後，穿過埋落地面月台的長走廊，到盡頭搭扶手電梯落地底大堂，再搭扶手電梯先到仙石線月台
兩個站設計幾乎一樣，除了牆身線條改用啡色之外，繼續都係頭車時間


然後到榴ケ岡駅


再下個站到宮城野原駅，因為最近棒球隊東北楽天ゴールデンイーグルス大本營，所以牆身貼滿廣告，
同時用了隊球歌「羽ばたけ楽天イーグルス」作為發車音樂，音樂好振奮但個站平時就無乜人搭車

效果就可以參考下：https://youtu.be/UZu_NNofitI

黎到最後一個地底站陸前原ノ町駅，地底段唯一使用側式月台的站，
另外一提所有地底站如果暫時無車到，整個月台的燈光係會稍暗，有車到先會光返




上條大斜路由地底上天橋，彎都未轉完就到苦竹駅，月台亦都係彎的



之後一路向石卷進發，但時間關係無逐個站影到相

多賀城駅，2013 年高架化正式完工，所以好新淨

日中非繁忙時間每小時會有一班車係度作為終點站，掉頭車泊的 2 號月台對面就係往あおば通方向的 1 號月台，個邊比較多人等車
由於大堂同月台都無冷氣的關係，所以掉頭車未開車去あおば通之前而有其他車先到就充當了短暫的冷氣候車室

由於仙石線全線都要自己按車門旁邊的按鈕開關門上落車，雖則有時都會見人唔關門（因為車外無關門制），但都好少會走哂冷氣
去到呢度非繁忙時間仙石線大約 15 分鐘一班

多賀城駅之後就到下馬駅，好簡單的小型站

夜晚同好多站一樣落左站務室簾就無人看管，出入閘都係自己在閘機搞掂，
影相之時突然聽到出入口個邊狂響「叮噹、叮噹」的閘機警告聲，長達一分鐘 唔知係咪有人過唔到閘


本塩釜駅，附近有個港口，基本上去格離東塩釜的車係呢個站已經落左大半

當時三一一大地震的海嘯水浸大約 1.7 米高，由於損毀不算非常嚴重所以約一個月後開始臨時營業
附近的道路重新鋪過；站前面有間七十七銀行，當時大地震七十七銀行好多分行都損毀嚴重

此站亦係鐵路迷的熱門影車地之一，因為一邊入站有個大急彎 ..

第一次去的時候超曬同好熱，點知第二日再路過時落左場雨


去到呢度非繁忙時間仙石線大約 16 - 34 分鐘一班

過左本塩釜駅之後的東塩釜駅，係仙石線一個頗重要的掉頭位，
早上繁忙時間 6 班有 5 班，以及下午繁忙時間 5 班有 4 班車都以東塩釜駅為終點站
不過站只得 3 個月台，掉頭用的只得 1 個月台，繁忙時間唔夠用會用埋往石巻的 2 號月台黎掉頭

過左東塩釜駅之後直到石卷都係單線路段，在開去陸前浜田駅途中可以見到出面海岸的優美景色
至於望山呢邊就望到好多斜坡


單線段的第一站就係陸前浜田駅，月台位於一個細的急彎之上，加上其中一邊有速度限制 40，所以都係碌埋站 ..

呢邊走線和東北本線很接近，例如下圖出了站前少少有條好短的隧道，隧道頂其實就係東北本線

就咁企係月台都可以望見上面東北本線的車飛過（DV 截圖）

去到呢度非繁忙時間仙石線大約 26 - 47 分鐘一班

之後到旅遊觀光熱點松島海岸駅，假日日中每班車都百幾二百人一齊迫落車
月台就剩係得咁闊，成村人一齊落車的時候成個台都迫到爆，仲要係講緊出哂黃線個隻

因為旅客頗多的關係，所以特登有個英文、簡體同寵寵寵的指示牌，不過睇黎寵寵好似有啲甩漏 ..
2 號月台的指示由未全線恢復前的「高城町方面」格硬改做「高城町‧石巻方面」

影相時仲係早上，所以無人，站出面擺左兩部好普通（但好緊要）的汽水機
再行出啲一路沿馬路行會聞到好香的燒海鮮味，同埋會見到好多魚生飯的相


松島海岸過些少有個位可以「親親仙石線」，不過草高過人
相中的係以漫畫家石ノ森章太郎的作品為主題的「マンガッタンライナー」，車內都有裝飾



松島海岸 - 高城町中間的一條鐵橋，中午之前的時間有些少正光

黃昏又有另一邊的正光

由於該處岩岩過左仙石東北ライン轉入仙石線的位置，所以都可以影到新的 HB-E210 系

到呢個位置的最近方法係乘搭東北本線到松島駅，一出站就見到
亦因為仙石線東塩釜駅至高城町一段走線和東北本線十分接近，所以有條件興建接續線而開展「仙石東北ライン」

到高城町駅，全線恢復之前最後階段あおば通開出的列車以本站為終點站，
因為月台做緊起上蓋工程所以無影到相，即是話成個月台本身係無蓋的
非繁忙時間每小時有 1 班車以本站為終點站，該班車會接續由東北本線黎的「仙石東北ライン」快速往石巻

除了接續之外非繁忙時間每小時都會有普通列車在高城町交接，
所以為了夾岩班表，高城町掉頭的列車停不足 10 分鐘就會開車返あおば通

之後的站快速停車的話就一小時一班普通一班快速，如果快速唔停就得一小時一班普通
無計啦乘客唔多，因為搭中了高城町掉頭的列車，我地係度等半小時轉乘下一班普通，下集繼續