(麻帆良市時報記者高坂 穂乃果報導)
喺 1970年代, 正當香港嘅巴士公司希望可以揾到更適合香港環境使用,
而又更可靠嘅前置引擎雙層巴士車款,
以取代問題多多嘅 Fleetline "珍寶" 後置引擎巴士之際,
彼方嘅英國早喺 1973 年, 就已經有第一部反潮流嘅反叛分子出現--
位於蘇格蘭嘅 Ailsa 車廠, 喺當時 Leyland Atlantean,
Daimler Fleetline 同 Bristol VR 等後置引擎巴士車款喺英國本土大行其道之時,
推出前置引擎嘅 Alisa-Volvo B55-10 型雙層巴士,
聲稱其設計趨向簡單, 運作極其經濟同維修容易,
而且喺前置引設計嘅底盤上, 亦將上車門同時設於前輪之前,
更有助實施一人控制, 並且強調呢個係更為可靠嘅設計, 配以容積較細,
只有 6700cc 嘅 Volvo TD70E Turbo 引擎,
再連接 SCG 半自動波箱, 加上葉片彈簧懸掛, 就成為呢款車嘅標準配搭,
之後亦衍生出改良設計嘅 MKII 同 MKIII, 可選配 Voith D851 三前速自動波箱,
MKIII 更配備容積較大, 7700cc 嘅 Volvo TD70H Turbo 引擎同氣墊懸掛,
由第一部 B55-10 投產至 1985 年停產嘅時間, 一共生產左一千多部,
主要喺其原產地蘇格蘭最受歡迎, 當中包括 Scottish Bus Group,
Tayside Regional Transport, Strathclyde PTE. Midlands PTE 同 South Yorkshire PTE 等,
另外亦有出口海外, 當中中巴亦有引入共 8 部 Alisa-Volvo B55-10 型雙層巴士 (AV1-8),
其中除左 AV1 之外, 其餘 7 部, AV2-8 都係加長版嘅 10.3 雙門設計,
稱為 "Jumbo Ailsa", 印尼亦擁有 320 架 MKIII 嘅 Jumbo Ailsa,
成為 Ailsa-Volvo B55-10 型巴士嘅最大海外用家。
倫敦運輸局 London Transport 喺 1984 年,
當時仲正接收 Leyland Titan 同 MCW Metrobus 嘅新車之際,
亦引入三架 Ailsa-Volvo B55-10 型巴士, 同時亦引入 3 架 Dennis Dominator,
3 架 Leyland Olympian 同 2 架 MCW Metrobus MKII 作新車評估試之用,
作為 LT 日後購買下一代新倫敦雙層巴士嘅參考。
呢批被編為 V1-3 嘅 Ailsa-Volvo B55 屬 MKIII 版本,
並且配有由 Walter Alexander 提供嘅 RV 型雙門規格車身,
亦係 Walter Alexander 首次為倫敦巴士提供巴士車身。
其中 V3 更特別使用雙樓梯設計, 分別位於司機位之後同車尾,
雙門設計嘅車身, 落車門亦因為有車尾樓梯設計,
要由車身中部移至車尾, 但係與此同時亦為車長帶來嚴重嘅車尾盲點,
因此車上要有一位人員, 負責監察車乘客落車情況。
V1 同 V2 喺 1984 年四月投入服務, 但係 V3 因為前述嘅獨特設計,
雖然已經喺 1984 年六月交付倫敦, 但係要一直等到次年三月先至正式投入服務,
後來更喺 1986 年被封去車尾落車門, 成為單門規格, 但係依然保留後樓梯設計。
或者因為佢地前置引擎嘅關係, V1-3 並未為 Ailsa 帶更多新車訂單,
反而 Leyland Olympian 喺呢次新車評估試中脫穎而出得到更多後繼訂單。
雖然倫敦亦曾經有達 60 多架 Ailsa 服務,
但係佢地都係來自英國其他地區嘅二手車, 喺倫敦行走嘅時間亦唔長。
而呢三架獨特嘅倫敦 Ailsa 巴士, 當中 V1-2 最後喺千禧年代退役,
並且被私人保留, 而 V3 喺 1992 年曾經發生過一次嚴重嘅翻車事故,
正當佢面臨被退役拆毀嘅厄運之際, 被另一間巴士公司 Black Prince Buses 購入,
經過一番修復後重新投入服務。現時 V3 亦被私人保留,
並且重建成新車時嘅雙門規格, 喺一啲巴士大集會同 Running Day 等場合,
都有機會一睹佢地嘅風采。
今日, 麻帆良市正式歡迎 London Transport Ailsa-Volvo B55 MKIII V1 登場!!
Ailsa-Volvo 呢款巴士, 喺香港嘅巴士界中絕對係一個少數民族,
因為當年只有中巴有一批為數八架嘅 Ailsa-Volvo 喺車隊中服役,
市長 Super Bus 喺 80 年代讀小學果陣亦有機會領教過呢批中巴 AV 行 10 號去北角碼頭,
行車時果把同勝利二型不相伯仲嘅引擎聲嘅震撼力!
而一直以來 Super Bus 以為呢款巴士只有配上同勝利二型同款設計嘅 Alexander 車身,
後來有機會睇到一啲英國巴士書籍, 先至知呢款巴士原來亦有配 R 型車身嘅,
在此之前, Super Bus 一直以為 Alexander R 型車身只有配喺後置引擎巴士車款,
特別係當時一街都係嘅 Olympian 巴士上, 同埋 Volvo B10M "Citybus" 中置引擎雙層巴士,
先至會出現呢款 R 型車身, 原來連呢款 Ailsa-Volvo 都有配呢款車身,
但係亦比 Super Bus 一種特別嘅感覺。而呢架全紅車身嘅 V1,
Super Bus 話身為倫敦僅有嘅 Ailsa-Volvo 三子之一,
更加顯出佢地嘅獨特性, Ailsa-Volvo 作為 Super Bus 喜愛嘅車款之一,
呢架 V1 出左半年, 依家終於決定入手, 雖然貴但係依然值得,
佢同時亦後悔當初 V3 推出, 因為價錢關係而不斷忐忑,
結果錯失左入手嘅機會, 依家想揾番架又揾唔到,
希望有朝一日可以幸運地揾到呢架設計獨一無二嘅雙門雙梯 V3,
同 V1 來個世紀相會。
隆重歡迎! London Transport Ailsa-Volvo B55 MKIII 巴士, V1, 見參!!
玆證明此車編號 145, 只出 300 架
正式落地!! 呢架 V1 亦成為 2016 年本市第一架新巴模!!
巨大嘅車頭引擎水箱網同使用三頁摺前門嘅設計, 係 Ailsa-Volvo 嘅最大特色
因為前置引擎嘅關係, 右邊亦設有司機位用上落車門
1970 年代嘅反叛分子, 因為第一代後置引擎巴士例如 Daimler Fleetline (香港稱為 "珍寶"),
行車同運作表現都令英國同香港嘅巴士公司都感到強差人意,
於是希望揾到一款更可靠而且適合一人控制操作嘅巴士車款,
促成 Ailsa-Volvo、Dennis Jubilant 同香港獨有嘅利籣勝利二型嘅誕生
真車相, 姊妹車 V2 同樣行走 170
加送: V1 真車嘅行車片段, Are you ready for the ride~?
Thanks for reading~
![[photo]](https://hkbf.org/images/smilies/Photo.gif "傾偈無圖無偈傾")
～ 
![[sosad]](https://hkbf.org/images/smilies/icon_sosad.gif "So Sad"){kind=icon}
