上次講到6300系由2007年開始由全新9300系取代，唔再行走特急列車。
但係唔好忘記，阪急係魔改造的專家。
所以呢批退下特急行列的6300系，係經過改造後，又開始左下半生
其中三抽（6351F-6353F）被改為四卡車，並翻新車廂，
改為2+1的對向座位及橫向座位，前照燈改為LED照明，但保留二門設計，係嵐山線作為普通列車行走
咁點解6300系唔好似2800系咁加返中門，變做三門通勤列車呢?
其實係由於6300系的車門位於車卡的兩端，無一個中間位加返第三度門，
而且幫2800系加門時亦有經驗證明加門會削減車身結構強度，
因此呢三抽車都繼續保留兩門設計，亦因此無再係京都本線服務
另外一抽，6354F，就進行大規模翻新及改為六卡車，並加上車身拉花，
包裝為「京とれいん」觀光列車，周末及假期時行走特別列車「快速特急」，為觀光客帶來更舒適的旅程
呢抽「京とれいん」的第三、四卡更改裝為以和式家居作基礎的卡位，而其他座位亦換上和風的皮套，十分豪華
同時6354F全車亦裝上自動廣播系統，並在行走快速特急時提供四種語言（日、英、韓、普）的自動廣播，方便遊客
而改為六卡車後，在特別情況下（例如京都夜燈展）「京とれいん」亦可以行走臨時列車由京都本線直通運轉入嵐山線（因嵐山線最長只可用六卡車行走），
而過往亦曾多次行走臨時快速急行及臨時快速來往大阪梅田及嵐山
至於其他的6300系就全部廢車
呢四部重生的6300系亦各自在自己新的崗位上，繼續為乘客服務
三款非常特別亦非常重要嘅「阪急Style車體」系列亦已經講晒。
講左咁耐，我地一直都係講阪急，所以下一集，我地會去神戶，講解下神戶高速鐵路大量的奇怪現象
(以下為小弟上年前往嵐山時乘坐的6351F，可惜落雨無法用相機拍攝，只有手機照 :/）
