派車&時間表：http://www.wythall.org.uk/octoberbuses.pdf
當日嘅主角就係呢部DAF DB250LF／Optare Spectra，最近先至修復返做啱啱投入服務嘅模樣（同退役冇耐嘅狀態比較吓：https://www.flickr.com/photos/31973233@N08/21986418870/）。佢嘅身份有幾特別？佢就係英國第一部低地台雙層巴士，真正嘅「一哥」（車隊編號最初直頭係1）：
車尾亦係完全跟足原著：
屬於Midland Classic嘅「二哥」R2NEG，同「一哥」都有行停車場接駁線：
「二哥」嘅車尾：
跟住到「珍寶happy hour」，不過陣容同前兩年比就有啲失色，只得三部車。第一部係WDA956T，特別在佢喺1994年畀West Midlands Travel改裝成單層，同時車隊編號由6956變成1956。改裝嘅原因並唔係撞橋之類，而係想減低營運成本（單層巴士司機人工低啲），不過後來取消咗個計劃（將所有司機劃一人工），所以只係改裝咗呢一部：
同車頭嘅巨型牌箱比，車尾就冇咁唔順眼：
除咗因為冇咗條樓梯而光猛咗少少之外，個感覺基本上同雙層版冇分別。另外，留意右邊加咗個水塘位／多用途空間：
少咗一層之後，表現自然爽過雙層版，不過避震就硬咗同彈咗，而且我亦唔多鍾意司機嘅轉波手勢，雖然可能呢隻先係服役時最常見嘅揸法：
跟住係呢部1975年嘅Park Royal車身珍寶，丹拿嘅型號名同底盤編號，但係出產自利蘭廠房：
細心聽嘅話，會聽到每當入空波時（尤其係由一波入空波），都會有一吓鬆開波箱brake band嘅放氣聲：
最後又再搭到呢部KOX780F：
三部之中我最鍾意呢部，一來把聲最啱我口味，二來司機（同上兩次搭一樣）轉波轉得最好，喺空波停留得恰到好處，拖波又有補油，唔會挫亦唔拖泥帶水：
緊接住就到下一個環節，四部Birmingham City Transport嘅半駕駛艙雙層一齊去以前29A線嘅終點站The Baldwin合照：
去程搭呢部1937年丹拿COG5，係Birmingham City Transport戰前主力之一。值得一提，呢個Metro-Cammell車身並唔係原裝，而係喺1950年換上去（因為當年維修制度似London Transport，將底盤同車身分開大修），原本屬於1939年出廠嘅同款車FOF216：
車尾似乎加裝咗剎車燈同指揮燈：
部車嘅歷史簡介：
古色古香嘅車廂：
COG5嘅駕駛室，先選式波棍當然係4961嗰隻舊式設計。錶板左上角並唔係風錶，而係真空壓力錶，顯示嘅係缸內負壓，因為剎車系統本身係液壓，再加真空servo輔助，唔似得而家直接用風壓剎車。左邊個手抽係撻車同熄匙用，而左下角枝棍有塊牌叫司機「撻車時推入，撻著咗拉出」，應該係用嚟操作個compression relief lever（去到早期6LXCT都重有），頂起部分氣缸嘅進氣閥，以減低撻車阻力：
底盤出世紙：
COG5大概可以算係戰前版CVG5，兩者都係用吉拿5LW引擎同Wilson先選式波箱（最鍾意空波同低波嘅聲），再加丹拿自家液壓飛輪，唔知把聲似唔似？部車狀態極好，引擎唔震，車身唔嘈，避震重好坐過珍寶（當然可能係因為珍寶行得快好多）：
呢部CVA6（即係用AEC六氣缸引擎嘅CVG5）喺1947年出廠，都係用Metro-Cammell車身，望落明顯新過部COG5。回程就係搭佢，因為想試吓AEC+丹拿呢個組合，不過除咗空轉聽得出係AEC引擎之外，實在試唔出啲乜，因為唔知係唔係飛輪或直濕有事，一上高轉就猛咁震，所以冇拍到片：
注意，部車冇指揮燈！因為嗰個年代嘅標準仍然係向左右伸出去嘅trafficator（左邊嗰枝舉起咗），會著燈但唔會閃：
似乎嘥咗兩個位嘅直梯：
呢部1950年出廠嘅Titan PD2/1配上Park Royal車身，同跟足Birmingham City Transport標準設計嘅Metro-Cammell車身有明顯分別：
第四部就係用新款Metro-Cammell車身嘅阿拉伯四型，細節上仍然有上一代車身嘅影子：
非常新淨嘅內籠：
仍然係直梯：
駕駛室一樣係閃令令，枝波棍係坐地式嘅先選式波棍？
驟眼睇落，呢兩部伯明翰咀雙層冇乜分別，原來一部係阿拉伯四型，一部係CVD6：
三部都係利蘭half-cab，單層係Tiger而雙層係Titan。HOV685個車身係Brush跟住Birmingham City Transport自己嘅設計而造，至於點解JOJ222嘅Park Royal車身唔使跟個設計就不得而知：
當日最令我驚喜嘅就係呢部矮身Ailsa，從來只得一部，絕對係珍禽異獸。部車本來屬於Derby City Transport，原車牌RTO1R，兩次被現車主4738 Group由劏車邊緣救返出嚟並修復：
車尾望落冇車頭咁唔合比例，但係咁細隻下層側窗同咁大嚿行星齒輪尾軸總係唔太夾：
車主帶咗我同朋友上車參觀，先影錶板，一見到枝手掣推咗上去真係嚇一嚇：
上到車先知原來矮身Ailsa除咗上層車頭之外，連下層都咁勉強，最明顯嘅係車廂中間凸咗個波箱冚出嚟，而左前輪拱旁邊亦比一般Ailsa多咗一級：
受個波箱冚影響，走廊要偏埋左邊，結果啲凳要左窄右闊，似乎真係整3+2排列都唔過份：
由車尾太平門望向前，除咗見到走廊偏埋一邊之外，亦可見到車頭天花板係平而唔係拱起，因為要為登車通道同司機位提供足夠headroom：
矮身Ailsa嘅上層車廂，後半部同一般Ailsa大同小異。另外，車主話車頭左邊四張單丁位嘅凳背塊墊都係來自Tyne & Wear PTE嘅Ailsa：
正因為下層車頭天花板係平而唔係拱起，所以上層車頭嘅凳（包括右邊樓梯前嘅二人位）都升高咗一級，亦令到上層車頭天花板都要變平嚟保持返個headroom，結果就係車頂望落腫起咗：
同一般Ailsa唔同，條樓梯係向後上，所以樓梯前可以裝到一張二人位。另外，頭窗係少見嘅平頂版（香港除咗AV1同V1都係平頂，但本土尖頂Alexander AV／L系列車身絕大多數都係用向中間斜上去嘅頭窗）：
梯級比一般Ailsa普通得多：
車主跟住帶埋我哋上去呢部West Midlands PTE嘅Ailsa（就係4738）：
上埋司機位，留意咪錶係VDO出品，其他都係英國車常用嘅Smiths：
水撥掣同波棍，算盤子左下角除咗係撻車時要入嘅S波，同時係開門要用嘅door lock：
車主話部車賣過去倫敦，當年曾經換過電牌（唔清楚係咩牌子），修復時裝返攪牌：
下層車廂工整過矮身版好多：
正常嘅波箱冚，車主話蓋上面嘅地板冇翻新過，因為佢哋搵唔到啲咁薄嘅地板：
同最典型嘅Ailsa上層車廂相比，WMPTE呢批50部車有兩樣嘢唔同，一係平頂頭窗，二係樓梯後裝咗倒頭位，而凳底嘅係上下層共用嘅暖風機：
因為樓梯係向前上，所以車頭比矮身版少一張單丁位：
最典型嘅Ailsa樓梯：
參觀完兩部Ailsa之後，已經過咗四點鐘，先至有時間去搭758呢條停車場穿梭線：
6835係West Midlands PTE喺1978年引入嘅頭五部樣辦Metrobus（6831-6835）之一，同MC同期，隻色亦巧合地同MC有七八成似。個人認為，咁似嘅原因係黑窗框、忌廉腰線同黑裙腳都係MCW當年出樣辦車時，喺巴士公司基本塗裝上面加上去嘅「創意」，結果中巴照單全收，WMPTE就改少少再用落量產版度。前幾次嚟都見佢泊喺倉入面，今次終於整返好有得搭：
修復得幾原汁原味，美中不足係頭燈框用咗新款（最早期嘅頭燈比較近中間，即係MB／MC嗰隻，同舊款長形霧燈對齊，新款頭燈就同圓形霧燈對齊），同埋下面個網冇咗向左右伸出嗰截（呢樣真係罕見，現存修復得最原裝嘅車咀可參見SELNEC Preservation Society嘅5001：https://www.flickr.com/photos/31973233@N08/27549058615/）：
內籠就當然唔會似MC：
一直想搭6835，今次終於如願以償。搭咗半日葉片懸掛嘅車之後，突然坐返部軟綿綿嘅都城，嗰種反差實在好正；而喺停車場返博物館嗰程幾乎係空車，行車表現就更加爽：
最後搭尾班車走嗰陣，補多張車尾相：
多謝點閱，歡迎討論
